އޭއެފްސީ އޭޝިއަން ކަޕުގެ 23 އަހަރުން ދަށުގެ ކޮލިފައިން މެޗުތަކަށް ތައްޔާރުވުމުގެ ގޮތުން 23 އަހަރު ދަށުގެ ގައުމީ ފުޓްބޯޅަ ޓީމު ޅ.އަތޮޅުގައި ކުރިޔަށްގެންދާ ޓްރެއިނިން ކޭމްޕްގައި ފުރަތަމަ ކުޅުނު ދެ މެޗުވެސް އެއްވަރުވެއްޖެއެވެ.
މިމަހުގެ 4 އިން 12 ވަނަ ދުވަހުގެ ނިޔަލަށް ޅ.އަތޮޅުގައި ހަދަމުންދާ މި ޓްރެއިނިންގައި 23 އަހަރުން ދަށުގެ ފުޓްބޯޅަ ޓީމު ނުކުތީ، ޅ.ނައިފަރާ ދެކޮޅަށެވެ. މި މެޗު ނިމުނީ 1-1 ގެ ނަތީޖާއަކުން އެއްވަރު ވެގެންނެވެ. މި މެޗުގައި ގައުމީ ޓީމުން ކާމިޔާބުކުރި ހަމައެކަނި ލަނޑު ކާމިޔާބުކޮށްދިނީ ކެޕްޓަން އަދި ފޯވާޑް އަބްދުﷲ ޔާމީން (ޔާން) އެވެ.
މި ކޭމްޕުގައި ގައުމީ 23 އަހަރުންދަށުގެ ޓީމު ކުޅުނު ދެވަނަ މެޗުގައި އިއްޔެ ހަވީރު ނުކުތީ ނ. ހޮޅުދޫއާ ދެކޮޅަށެވެ. މި މެޗުވެސް ނިމުނީ 1-1 ގެ ނަތީޖާއަކުން އެއްވަރުވެގެންނެވެ. މި މެޗުގައިވެސް ޒުވާން ގައުމީ ޓީމުން ޖެހި ހަމައެކަނި ލަނޑު ކާމިޔާބުކޮށްދިނީ އަބްދުﷲ ޔާމީން (ޔާން) އެވެ.
މި ޓްރެއިނިން ކޭމްޕްގައި 23 އަހަރުން ދަށުގެ ގައުމީ ޓީމު މިއަދު ކުޅޭ މެޗުގައި ނުކުންނާނީ، ނ.ކުޑަފަރި އާއި ދެކޮޅަށެވެ. މި މެޗުވެސް ކުޅުމަށް ހަމަޖެހިފައިވަނީ ޅ.ނައިފަރު ޓާފް ދަނޑުގައެވެ.
މި މެޗަށް ފަހު ބުދަ ދުވަހު ޒުވާން ގައުމީ ދާނީ ޅ. ހިންނަވަރަށެވެ. އެ ރަށުގައި ޖުމްލަ ތިން މެޗު ކުޅޭނެއެވެ. އެ މެޗުތަކުގައި ބައްދަލުކުރާނީ ޅ.ކުރެންދޫ އާއި ޅ. ހިންނަވަރުގެ އިތުރުން ރ. މީދޫއާއެވެ.
އޮކްޓޯބަރު މަހުގެ 27 ވަނަ ދުވަހުން ފެށިގެން 31 ވަނަ ދުވަހުގެ ނިޔަލަށް ބާއްވާ ކޮލިފައިންގައި ރާއްޖެ ލައްވާލީ ގްރޫޕް ސީގައެވެ. މި ގްރޫޕުގައި ރާއްޖެއާއެކު ދެން ހިމެނެނީ އަފްގާނިސްތާން އާއި ބަހްރެއިންގެ އިތުރުން އިރާގެވެ. ކޮލިފައިންގެ ކުރިން ގައުމީ ޓީމު ބަހްރެއިންގައި 10 ދުވަހުގެ ކޭމްޕް އެއް ކުރާގޮތަށް ވަނީ ހަމަޖެހިފައެވެ.
ކޮމެންޓު ފޮނުވާ