ސ. ޖުޑީޝަލް ދާއިރާގެ އިސް މެޖިސްޓްރޭޓްގެ ސްލޫކީ މައްސަލައެއް ބަލަން ޖުޑީޝަލް ސަރވިސް ކޮމިޝަންއިން ނިންމައިފިއެވެ.
މިމަހުގެ 1ވަނަ ދުވަހު ޖުޑީޝަލް ސަރވިސް ކޮމިޝަންއިން ބޭއްވި އެކޮމިޝަންގެ 66ވަނަ ބައްދަލުވުމުގައި، ސްލޫކީ މައްސަލަ ބަލަން ނިންމާފައިވަނީ، ސ.ޖުޑީޝަލް ދާއިރާގެ އިސްމެޖިސްޓްރޭޓް މުހަންމަދު ހާޝިމްގެއެވެ. ޖޭއެސްސީ އިން ބުނީ، މި މައްސަލަ ބަލަން ހަމަޖެހިފައިވަނީ، ސ.ހިތަދޫ މެޖިސްޓްރޭޓް ކޯޓަށް ހުށަހަޅާފައިވާ މައްސަލަތަކެއްގެ ހަސްމަކާއި އެ ދާއިރާގެ އިސް މެޖިސްޓްރޭޓް ބައްދަލުކުރެއްވި ކަމަށްބުނާ މައްސަލައަކާއި ގުޅިގެންކަމުގައެވެ. އެގޮތުން މިމައްސަލަ ބެލުމަށް ޖޭއެސްސީއިން ވަނީ މިމަހުގެ 1 ވަނަ ދުވަހު ޚާއްސަ ކޮމިޓީއެއްވެސް އެކުލަވާލައިފައެވެ.
ޖޭއެސްސީއިން ވަނީ މީގެ ކުރިންވެސް ފަނޑިޔާރުންގެ ފަރާތުން ފެންމަތިވި ގިނަ ސްލޫކީ މައްސަލަތަކެއް ބަލައި ފިޔަވަޅުއަޅާފައެވެ. އެގޮތުން، މިއަހަރުގެ ޖޫން މަހު، ސ. މަރަދޫފޭދޫ މެޖިސްޓްރޭޓް ކޯޓްގެ އިސްމެޖިސްޓްރޭޓް އިބްރާހިމް ނަފީސްގެ ހުސައިންގެ ސްލޫކީ މައްސަލައެއްވެސް ބަލާފައިވެއެވެ. މިސަރުކާރު އައިފަހުން ޖޭއެސްސީއިން ފަނޑިޔާރުންގެ ސުލޫކީ މައްސަލަތައް ބެލުމަށްފަހު ބައެއް ފަނޑިޔާރުން ވަނީ ސަސްޕެންޑްވެސް ކޮށްފައެވެ.
