ޖުމްހޫރީ ޕާޓީގެ މިހާރުގެ ހުރިހާ އަމާޒެއް ހުރީ ކުރިއަށް އޮތް ރިޔާސީ އިންތިޚާބަށް ކަމަށާއި، އެއިންތިޚާބަށް ތައްޔާރުވުމަށްޓަކައި، މިހާތަނަށް ޖޭޕީން ނުފެންނަ ވަރުގެ ވަރުގަދަ ޓީމެއް ދާދިއަވަހަށް ފެނިގެން ދާނެކަމަށް މަޖިލީހުގެ ދަނގެތީ ދާއިރާގެ ކުރީގެ މެމްބަރު އަދި ގާސިމް އިބްރާހިމްގެ ޕޮލިޓިކަލް އެޑްވައިޒަރ އިލްހާމް އަހުމަދު ވިދާޅުވެއްޖެއެވެ.

ވީޓީވީގައި ވާހަކަ ދައްކަވަމުން އިލްހާމް ވިދާޅުވީ ޖުމްހޫރީ ޕާޓީގެ ކައުންސިލުން ކުރިއަށް އޮތް ރިޔާސީ އިންތިޚާބުުގައި އެޕާޓީޏް ވާދަކުރަން ނިންމާފައިވާކަމަށެވެ. އެނިންމާއިއެކު ޕާޓީގެ ހުރިހާ މެމްބަރުންނަށް އޮތް އެންމެ ބޮޑު މަސައްކަތަކީ އިންތިޚާބު ކާމިޔާބު ކުރުމަށް ކުރަންޖެހޭ މަސައްކަތް ކުރުންކަމަށް އިލްހާމް ވިދާޅުވިއެވެ.

މިމަސައްކަތުގައި ޖުމްހޫރީ ޕާޓީއާއި، ހަސަދަވެރިކަމެއް އޮތް އެއްވެސް ސިޔާސީ ޕާޓީއެއް ނެތްކަމަށް އިލްހާމް ވިދާޅުވިއެވެ. ވާދަވެރި އެމްޑީޕީއާއި، ޕީޕީއެމްއަކީވެސް ޖުމްހޫރީ ޕާޓީން އިންތިޚާބު ކާމިޔާބު ކުރުމަށް މަޝްވަރާ ކުރަންޖެހޭ ހާލަތަކަށް ގޮސްފިނަމަ އެކަން ކުރާނެ ޕާޓީތަކެއްކަމަށް އިލްހާމް ވިދާޅުވިއެވެ. އިލްހާމް ވިދާޅުވީ، ޖުމްހޫރީ ޕާޓީ އަކީ އެމީހަކު ހިތްވަރާއެކު މަސައްކަތް ކޮށްފިނަމަ ފުރުސަތުތައް ފަހިވެގެންދާނެ، އަނިޔާވެރިވުމެއް ނެތް ޕާޓީއެއް ކަމަށާއި، ޕާޓީގެ ތެރޭގައި އެއްވެސް ތަފާތުކުރުމެއް ނުގެންގުޅޭނެކަމަށެވެ.

އޭނާ ވިދާޅުވީ ކޯވިޑް-19ގެ ބަލިމަޑުގެ ކަމުގެ ތެރޭގައި ޖުމްހޫރީ ޕާޓީ މަޑުމަޑުން އޮތީ ސިޔާސީ ހަރަކާތްތައް ނުހިންގިގެން ނޫންކަމަށެވެ. ޤައުމަށާއ، ރައްޔިތުންނަށް އެންމެ މަސްލަހަތު ގޮތަށް ބަލައި، އާންމު ރައްޔިތުންގެ ޞިއްޚީ ރައްކާތެރިކަމަކީ އެޕާޓީން އެންމެ ބޮޑަށް އިސްކަންދިން ކަންތައްކަމަށެވެ. ނަމަވެސް މިހާރު ހާލަތު ރަނގަޅުވުމުން ޖުމްހޫރީ ޕާޓީގެ ހަރަކާތްތައް އިތުރަށް ފުޅާވެ، ޕާޓީއަށް ސޮއިކުރާ މީހުންނާއި، ގުޅެންބޭނުންވާ މީހުންވެސް އިތުރުވަމުންދާކަމަށް އިލްހާމ ްވިދާޅުވިއެވެ.

އެނާ ވިދާޅުވީ ކުރިއަށް އޮތީ ޖުމްހޫރީ ޕާޓީގެ ވަރަށް ގިނަ ސިޔާސީ މަސައްކަތްތަކެއް ފެނިގެންދާނެ ދުވަސްތަކެއް ކަމަށާއި، އެންމެ ބޮޑު މަސައްކަތަކީ މިހާތަނަށް ޖުމްހޫރީ ޕާޓީގައި އެކުލަވާ ނުލެވޭވަރުގެ ވަރުގަދަ ޓީމެއް އެކުލަވާލައި އިންތިޚާބު ކާމިޔާބު ކުރުންކަމަށް އިލްހާމް ވަނީ ވިދާޅުވެފައެވެ.