ކަނޑައެޅިފައިވާ އުމުރުފުރާތަކުގެ %90 މީހުން ވެކްސިން ފުރިހަވެފައިވާ ރަށްރަށަށް ކަރަންޓީންވުމާއި ޕީ.ސީ.އާރް ޓެސްޓު ހަދަން ނުޖެހޭގޮތަށް ދަތުރުކުރެވޭނެގޮތް ހަދައިފިއެވެ. އިއްޔެއިން ފެށިގެން މިގޮތުން ދަތުރުކުރެވޭ 28 ރަށެއް ވަނީ ކަނޑައަޅާފައެވެ.

އެޗްޕީއޭއިން ބުނީ، ރަށުގައި ދިރިއުޅޭ ވެކްސިން ޖެހުމަށް ޝަރުޠު ހަމަވާ 12 އަހަރުންމަތީގެ އާބާދީގެ %90 އަށް ވެކްސިން ފުރިހަމަވާންޖެހެއެވެ. ރަށުގައި ދިރިއުޅޭ 65 އަހަރުން މަތީގެ މީހުންގެ %90އަށް ވެކްސިން ފުރިހަމަވުމުގެ އިތުރަށްގެސްޓް ހައުސް ހުންނަ ރަށްރަށުގައި ގެސްޓް ހައުސްތަކުގައި މަސައްކަތްކުރާމީހުންނާއި ޓުއަރިސްޓް ޚިދުމަތުގައި މަސައްކަތްކުރާ މީހުންގެ %95އަށް ވެކްސިން ފުރިހަމަވާންޖެހެއެވެ. މިގޮތުން މިހާތަނަށް 28 ރަށަކަށް ޕީސީއާރު ނުހަދައި ދަތުރުކުރެވޭނެކަމަށް އެޗްޕީއޭއިން ބުންޏެވެ.

ކަރަންޓީންވުމާއި ޕީ.ސީ.އާރް ހެދުމުގައި އަމަލުކުރެވޭނެ ގޮތާގުޅޭގޮތުން އެޗްޕީއޭއިން ވިދާޅުވީ ވެކްސިންގެ ޑޯޒްތައް ފުރިހަމަވެ 14 ދުވަސް ހަމަވެފައިވާ ފަރާތެއް ނަމަ، ދަރުކުރާ ރަށުގައި ވެކްސިން ކަވަރޭޖް ހަމަވެފައިވާނަމަ، ދަތުރު ފަށާ ރަށުގައި ހަފްތާއަކު ޓެސްޓުކުރެވޭ ސާމްޕަލްގެ ނިސްބަތުން ޕޮޒިޓިވިޓީ %5އަށްވުރެ ދަށްނަމަ ކަރަންޓީނުވާން ނުޖެހޭނެކަމަށާއި، އަދި ޕީ.ސީ.އާރް ޓެސްޓު ނުހަދާވެސް ދަތުރުކުރެވޭނެކަމަށެވެ.

ޕީސީއާރު ނުހަދާ އަދި ކަރަންޓީން ނުވެ ދަތުރުކުރެވޭނެ 28 ރަށަކީ:

1. ހއ. އުލިގަން
2. ހއ. މުރައިދޫ
3. ހދ. ހިރިމަރަދޫ
4. ހދ. ނެއްލައިދު
5. ރ. މަޑުއްވަރީ
6. ރ. މީދޫ
7. ރ. އަލިފުށި
8. ބ. ފެހެންދޫ
9. ބ. ފުޅަދޫ
10. ބ. ދޮންފަން
11. ބ. ކިހާދޫ
12. ބ. އޭދަފުށި
13. ބ. މާޅޮސް
14. ބ. ކަމަދޫ
15. އއ. މަތިވެރި
16. އދ. ދިގުރަށް
17. އދ. ފެންފުށި
18. އދ. ދިއްދޫ
19. ވ. ރަކީދޫ
20. ވ. ފެލިދޫ
21. ވ. ކެޔޮދޫ
22. ވ. ފުލިދޫ
23. ފ. މަގުދޫ
24. ފ. ދަރަނބޫދޫ
25. ފ. ފީއަލި
26. ލ. ހިތަދޫ
27. ގއ. ދެއްވަދޫ
28. ގދ. ރަތަފަންދޫ

މީގެ އިތުރުން ދަތުރު ފަށާ ރަށުގައި ހަފްތާއަކު ޓެސްޓުކުރެވޭ ސާމްޕަލްގެ ނިސްބަތުން ޕޮޒިޓިވިޓީ %5އަށްވުރެ މަތި ނަމަ ދަތުރުކުރެވޭނީ ފުރުމުގެ 72 ގަޑިއިރު ނުވާ ޕީ.ސީ.އާރް ނެގެޓިވް ނަތީޖާއާއެކުކަމަށްވެސް އެޗްޕީއޭއިން ވަނީ ބުނެފައެވެ.އަދި ވެކްސިންގެ ޑޯޒްތައް ފުރިހަމަނުވާ މީހެއްނަމަ، ދަތުރުކުރާ ރަށުގައި ވެކްސިން ކަވަރޭޖް ސަރުކާރުން ކަނޑައަޅާފައިވާ މިންވަރަށް ހަމަވެފައިވީ ނަމަވެސް 14 ދުވަހުގެ ފުރަބަންދު ކަރަންޓީނު ފުރިހަމަކުރުމާއި ކަރަންޓީނުން ދޫކުރުމަށް ހަދާ ޕީ.ސީ.އާރް ޓެސްޓުހަދަންޖެހޭނެއެވެ.

ވެކްސިންގެ ޑޯޒްތައް ފުރިހަމަނުވާ މީހެއްނަމަ ދަތުރުކުރާ ރަށުގައި ސަރުކާރުން ކަނޑައަޅާގައިވާ މިންވަރަށް ވެކްސިން ކަވަރޭޖް ހަމަނުވާނަމަ، ފުރުމުގެ 72 ގަޑިއިރު ނުވާ ޕީ.ސީ.އާރް ނެގެޓިވް ނަތީޖާ އޮތުމާއި، 14 ދުވަހުގެ ފުރަބަންދު ކަރަންޓީނު ފުރިހަމަކުރަންޖެހޭއިރު، ކަރަންޓީނުން ދޫކުރުމަށް ހަދާ ޕީ.ސީ.އާރް ޓެސްޓު ހަދަންޖެހޭނެކަމަށް އެޗްޕީއޭއިން ވަނީ ބުނެފައެވެ.

މީގެއިތުރުން ވެކްސިންގެ ޑޯޒްތައް ފުރިހަމަނުވާ މީހުން، ދަތުރުކުރުމުގެ ބޭނުމަށް ކުރަންޖެހޭ ޕީ.ސީ.އާރް ޓެސްޓް ނުވަތަ
ފުރުމުގައި ހަދަންޖެހޭ ޓެސްޓާއި ކަރަންޓީނުގެ މުއްދަތު ނިމުމަށްފަހު ހަދާ ރިލީސް ޓެސްޓު މިއަދުން ފެށިގެން ހަދަންޖެހޭނީ އަމިއްލަ ޚަރަދުގައިކަން އެޗްޕީއޭއިންވަނީ ހާމަކުރައްވާފައެވެ.

ވެކްސިންގެ އެއްވެސް ޑޯޒެއް ނުޖަހާ 30،000 މީހުން އަދިވެސް އެބަތިބިކަމަށް ސަރުކާރުން ވަނީ ބުނެފައެވެ.