ފަސް އަހަރު ދުވަހުގެ ޖަލު ޙުކުމެއް ތަންފީޒްކުރައްވަމުން ގެންދަވާ ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް މިނިވަންކުރުމަށް އިދިކޮޅު އިސް ފަރާތްތަކުން ބޭނުންނުވާކަމުގެ ތުހުމަތު ގެމަނަފުށީ ދާއިރާގެ ކުރީގެ މެންބަރު އަދި ޖޭޕީގެ ލީޑަރުގެ އެޑްވައިޒަރު އިލްހާމް އަހުމަދު ވިދާޅުވެއްޖެއެވެ.
އިލްހާމް މިހެން ވިދާޅުވެފައިމިވަނީ، ޖުމްހޫރީ ޕާޓީއާއި ޕީޕީއެމްއާއި ދެމެދު ބަހުގެ ހޫނު ހަމަލާތަކެއް ރައްދުކުރަމުންދާ ދަނޑިވަޅެއްގައެވެ. ހޫނު ބަހުގެ ހަމަލާތައް އަމާޒުވެފައިވަނީ މަޖިލީހުގެ ޖަލްސާގައި ޖޭޕީގެ ލީޑަރު ޤާސިމް އިބްރާހީމް ރައީސް ޔާމީނަށް ނިސްބަތްކުރައްވާ އެމަނިކުފާނަކީ އެންމެ އަނިޔާވެރި އަދި ބޮޑު "ވަގެއް"ކަމަށް ތުހުމަތުކުރެއްވުމުންނެވެ. ރައްދުގައި ޕީޕީއެމް އިން ވަނީ ރައީސް ޔާމީން ޖަލަށް ލުމަށް ޙުކުމްކުރުމަށް ޤާސިމް އިބްރާހީމް ޤާޟީއަށް ރިޝްވަތު ދިނުމަށް މަސައްކަތްކުރިކަމަށް ތުހުމަތުކުރައްވާފައެވެ.
މި ދަނޑިވަޅުގައި އިލްހާމް ކުރެއްވި ޓްވީޓެއްގައި ވަނީ ރައީސް ޔާމީން މިނިވަންކުރުމަށް ޕީޕީއެމްގެ އިސްބޭފުޅުން ބޭނުން ނުވާކަމަށް ތުހުމަތުކުރައްވާފައެވެ. އޭނާ ވިދާޅުވީ، ރިޔާސީ ޓިކެޓް ލިބޭނީ ރައީސް ޔާމީން ބަދެވިގެންކަމަށް އިދިކޮޅުގެ އިސް ފަރާތްތަކުން ބުނަމުންދާކަމަށާއި، އެގޮތުން އެކި ޑީލްތައް ރާވާ، ސިޔާސީ ފަރާތްތަކާއި ބައްދަލުކުރާކަމުގެ ތުހުމަތު އިލްހާމް ކުރެއްވިއެވެ.
މިކަން ރައީސް ޔާމީން އަށްވެސް މިހާރު އެނގިވަޑައިގަންނަވާނެ.
– އިލްހާމް އަޙްމަދު
ރައީސް ޔާމީން މިނިވަން ކުރާކަށް ޕީޕީއެމަށް ނިސްބަތްވާ އިސްބޭފުޅުން ބޭނުންނުވޭ. ރިޔާސީ ޓިކެޓް ލިބޭނީ ރައީސް ޔާމީން ބަދެވިގެންކަމަށް އެމީހުން ބުނަނީ. މިދަންނަވާ މީހުން އެކި ޑީލްތައް ރާވާ، ސިޔާސީ ފަރާތްތަކާއި މީޓްކުރި. މިކަން ރައީސް ޔާމީން އަށްވެސް މިހާރު އެނގިވަޑައިގަންނަވާނެ pic.twitter.com/cbC4hI6u2m
— Ilham Ahmed (@ilhammaldives) September 2, 2021
އިލްހާމް މިހެން ބުނެފައިވާއިރު، 2023 ވަނަ އަހަރު އޮންނަ ރިޔާސީ އިންތިޚާބުގައި އިދކޮޅުން ވާދަކުރައްވާނެ ލީޑަރަކީ ރައީސް ޔާމީންކަމަށް ޕީޕީއެމް އިން އަންނަނީ ބުނަމުންނެވެ. ފަސް އަހަރުގެ ޖަލު ހުކުމެއް ތަންފީޒްކުރައްވަމުން ގެންދަވާ ބޭފުޅަކަށް ކުރިއަށް އޮތް އިންތިޚާބުގައި ވާދަނުކުރެއްވޭކަމަށް ޤާނޫނު އަސާސީގައި ބަޔާންކުރިނަމަވެސް އެންމެ ފަހުވަގުތާއި ހަމައަށް ޕީޕީއެމް އިން ބަލާނީ ރައީސް ޔާމީން ރިޔާސީ ކެނޑިޑޭޓަކަށް ނެރުމަށްކަމަށްވެސް ޕީޕީއެމް އިން ބުނެފައިވެއެވެ.
ރައީސް ޔާމީން ތަންފީޒްކުރައްވަމުން ގެންދަވާ 5 އަހަރު ދުވަހުގެ ޖަލުޙުކުމުގައި ކޯވީޑާއި ގުޅިގެން އެމަނިކުފާނު މިހާރު ވަނީ ގެއަށް ބަދަލުކުރައްވާފައެވެ.
