ވެރިކަން ކުރަމުންދާ މައި ޕާޓީ އެމްޑީޕީގެ އެތެރޭގެ އިންތިޚާބުގައި ވާދަކުރެއްވުމަށް ހުށަހެޅުއްވި، ޔޫތު މިނިސްޓަރ އަހުމަދު މަހުލޫފަށް ވާދަކުރުމުގެ ފުރުސަތު ދީފައި ނުވަނީ ސިޔާސީ ޕާޓީތަކުގެ ގަވާއިދާއި، އެމްޑީޕީގެ އަސާސީ ޚިލާފަށް ކަމަށް އިލެކްޝަންސް ކޮމިޝަނުން އެޕާޓީއަށް އަންގައިފިއެވެ.
ވެރިކަން ކުރަމުންދާ މައި ޕާޓީ އެމްޑީޕީގެ އެތެރޭގެ އިންތިޚާބުގައި ވާދަކުރެއްވުމަށް ހުށަހެޅުއްވި، ޔޫތު މިނިސްޓަރ އަހުމަދު މަހުލޫފަށް ވާދަކުރުމުގެ ފުރުސަތު ދިނުމާއިމެދު ގޮތެއް ނުނިންމުން ލަސްވާތީ އެމައްސަލަ އިލެކްޝަން ކޮމިޝަނަށް ހުށަހެޅުއްވީ މިދިޔަ މަހުގެ 24 ވަނަ ދުވަހުއެވެ. އިލެކްޝަންސް ކޮމިޝަނުން ވަނީ މަހުލޫފްގެ މައްސަލާގައި ކަން ހިނގާފައިވާ ގޮތުން އޮޅުންބެލުމަށް އެމްޑީޕީއަށްވެސް ސިޓީއަކުން ދަންނަވާފައެވެ.
އެމްޑީޕީގެ ފަރާތުން ހޯދަންޖެހޭ ކަންކަން ހޯދައި، އެމްޑީޕީގެ އަސާސީ ގަވާއިދާއި، ސިޔާސީ ޕާޓީތަކުގެ ގަވާއިދަށް ބެލުމަށްފަހު އިލެކްޝަންސް ކޮމިޝަނުން ބުނެފައިވަނީ މަހުލޫފްގެ މައްސަލަ އެމްޑީޕީން ނިންމާފައިވަނީ މި ހުރިހާ ގަވާއިދުތަކާއި ޚިލާފަށް ކަމަށެވެ. އަދި މަހުލޫފަށް ވާދަނުކުރެވޭކަމަށް ނިންމޭނީ އަސާސީ ގަވާދަށް ބަދަލު ގެނެސްގެންކަމަށް އިލެކްޝަނުން އެމްޑީޕީއަށް އެންގި އެންގުމުގައި ބުނެފައިވެއެވެ.
އަޅުގަނޑަށް ވާދަނުކުރެވޭނެކަމަށް ނިންމާފައިވާ މައްސަލައިގަ،އެއީ ސިޔާސީ ޕާޓީތަކުގެ ޤާނޫނުގައި ވާގޮތަށް،MDPގެ އަސާސީ ގަވައިދުގައި ހިމެނިފައިވާ ޝަރުތެއް ނޫންކަމަށް EC އިންވަނީ MDP އަށް އަންގާފަ.އަދި ޝަރުތެއް ކުރެވޭނީ އަސާސީ ގަވައިދު އިސްލާހުކޮށް ނޫނީ ހަދާ ގަވައިދެއްގެ ދަށުންކަމަށް. pic.twitter.com/rWPzGYrVzk
— Ahmed Mahloof (@AhmedMahloof) September 1, 2021
އެމްޑީޕީންވަނީ އެޕާޓީގެ އެތެރޭގެ އިންތިޚާބުގައި އެސެޓް ރިކަވަރީ ކޮމިޝަނާއި، މަރާލާފައިވާ މީހުންނާއި، ގެއްލުވާލާފައިވާ މީހުންގެ މައްސަލަ ބަލާ ކޮމިޝަނުން ބަލާ މައްސަލައެއްގައި ތުހުމަތު ކުރެވޭ އެއްވެސް ބޭފުޅަކަށް ވާދަ ނުކުރެވޭނެކަމަށް ވަނީ ކަނޑައަޅާފައެވެ. މީގެ އިތުރުން އެމްއެމްޕީއާރްސީގެ ޚިޔާނާތާއި ގުޅިގެން އޭސީސީން ތައްޔާރުކޮށްފައިވާ ރިޕޯޓެއްގައި ފިޔަވަޅު އަޅައިދިނުމަށް އެދި އެކިއެކި މުއައްސަސާތަކަށް ނަން ފޮނުވާފައިވާ ފަރާތްތަކަށްވެސް ވާދަ ނުކުރެވޭނެ ކަމަށް ވަނީ ބުނެފައެވެ.
އެމްޑީޕީގެ ދާއިރާތަކުގެ އިންތިޚާބު އަންނަ މަހުގެ 25 ވަނަ ދުވަހު ބޭއްވުމަށް އެޕާޓީން ވަނީ ނިންމާފައެވެ.
