ރައީސް ޔާމީންގެ އަރިސް ބޭފުޅުންގެ ގޮތުގައި ތިއްބެވި ބޭފުޅުންނަށްވުރެ، ރައީސް ޔާމީން އޭނާއަށްވެސް މާބޮޑަށް އިތުބާރު ކުރައްވާނެ ކަމުގައި ޖުމްހޫރީ ޕާޓީގެ ނާއިބް ލީޑަރު އިލްހާމް އަހުމަދު ވިދާޅުވެއްޖެއެވެ.

ޖުމްހޫރީ ޕާޓީން ބޭއްވި ނޫސްވެރިންގެ ވައްދަލުވުމުގައި ވާހަކަ ދައްކަވަމުން އިލްހާމް ވިދާޅުވީ ސިޔާސީ މަސްރަހުގައި ކަންކަން ހިނގަމުންދާ ގޮތަކީ މާދަމާވެސް ބަދަލުވެދާނެ ކަންތައްތަކެއް ކަމަށެވެ. ޖުމްހޫރީ ޕާޓީން ތައްތާރުވަމުންދަނީ ރިޔާސީ ގޮތުން ކުރަންޖެހޭ ކޮންމެ މަސައްކަތެއް ކޮށްގެންވެސް ޖުމްހޫރީ ޕާޓީގެ ލީޑަރު 2023 ވަނަ އަހަރު ރާއްޖޭގެ ވެރިކަމަށް ގެނައުމަށް ކަމަށާއި، ކުރާނެކަމަށެވެ.

އިލްހާމް ވިދާޅުވީ ސިޔާސީ ގޮތުން ޖުމްހޫރީ ޕާޓީގައި މަސައްކަތް ކުރެއްވި އިސް ބޭފުޅުންތަކެއް ވަކިން ޕާޓީއެއް ހެއްދެވުމާއި، އިދިކޮޅު ޕީޕީއެމްގައި ތިބުމަކީ މައްސަލައެއް ނޫންކަމަށެވެ. ޕީޕީއެމްގެ ރައީސް ޔާމީނަކީ ސިޔާސީ ގޮތުން މިހާރުވެސް އެމަނިކުފާނުގެ އަރިހުގައި ތިއްބެވި ބޭފުޅުންނަށްވެރެއް އޭނާއަށްވެސް ޓްރަސްޓް ކުރައްވާނެ ބޭފުޅެއްކަމަށް އިލްހާމް ވިދާޅުވިއެވެ.

އެކަން ކުރުމުގައި ރިޔާސީ އިންތިޚާބުގެ ފުރަތަމަ ބުރު ފަހަނަ އަޅައިގޮސް ދެވަނަ ބުރުގައި ކޯލިޝަން ހަދަން ޖެހުނު ކޮންމެ ބަޔަކާއި ކޯލިޝަން ހަދައިގެންވެސް ވެރިކަމަށް އައުމަކީ ޖުމްހޫރީ ޕާޓީގެ އަމާޒުކަމަށެވެ. ދެވަނަ ބުރުގައި އެމްޑީޕީ ނުވަތަ ޕީޕީއެމްއާއި އެކީ ކޯލިޝަން ހަދައިގެންވެސް ވެރިކަމަށް އާދެވެން އޮތް ގޮތަކަށް މަސައްކަތް ކުރައްވާނެކަމަށް އިލްހާމް ވިދާޅުވިއެވެ.

އިލްހާމް ވިދާޅުވީ ސިޔާސީ ގޮތުން ވާދަވެރި ރޫހެއްގައި މަސައްކަތް ކުރިނަމަވެސް އެއްވެސް މީހަކަށް އަނިޔާދީ ހެދުމަކީ ތާއީދު ކުރައްވާ ކަމެއްނޫންކަމަށެވެ. އަދި ރައީސް ޔާމީނަށްވެސް ޖަލުގައި އަނިޔާ ދިނުމަކީ ތާއީދު ކުރައްވާ ކަމެއްނޫންކަަށެވެ. މިހާރުވެސް ބައެއް ޝަރީއަތް ފެށި ސިޔާސީ މީހުންގެ އަބުރު ކަތިލުމަށް ކުރަމުންދާ މަަސައްކަތް ހުއްޓާލުމަށް އިލްހާމް ވަނީ ގޮވާލާފައެވެ.