މިއަދު ޤައުމު ހުއްޓިފައިވަނީ ރައީސް އޮފީސް ހިންގުމުގައި ތަޖުރިބާ ނެތް ބަޔަކު އެތަނުގައި ތިބުމުންކަމަށް ޕީއެންސީގެ ނާއިބު ރައީސް އަދި މާވަށު ދާއިރާގެ މެންބަރު މުޙައްމަދު ސަޢީދު ވިދާޅުވެއްޖެއެވެ.
ސައީދު މިހެން ވިދާޅުވީ، މޯލްޑިވްސް އެއަރޕޯޓްސް ކޮމްޕެނީ (އެމްއޭސީއެލް)ގެ ކޮންސަލްޓެންޓެއްގެ މަޤާމަށް އެ ކުންފުނީގެ ސީއީއޯގެ ގާތް ފަރާތެއް ހަމަޖެއްސާފައިވާތީއެވެ. އެމްއޭސީއެލްގެ އިސްވެރިންގެ މަޤާމުތަކަށް އައު ސީއީއޯ ގެންދަވަނީ ގިނަ އަދަދަކަށް ބިދޭސީން އައްޔަންކުރަމުންކަމަށް ބައެއް ފަރާތްތަކުން ދަނީ ބުނަމުންނެވެ.
މިކަމާއި ގުޅިގެން ސަޢީދު ވިދާޅުވީ އެމްޑީޕީއަށް ބާރުލިބޭ ކޮންމެ ފަހަރަކު ދިވެހިން ދުރަށްލުމަށްފަހު އިސްކަންދެނީ ބިދޭސީންނަށްކަމަށެވެ. އަދި ޤައުމު ހުއްޓިފައިމިވަނީ އެއްވެސް ތަޖުރިބާއެއް ނެތް މީހުން ރައީސް އޮފީހުގައި ތިއްބެވުމުންކަމަށް ވިދާލުވެ ސަޢީދު ވަނީ އެކަމުގެ ހައްލަކީ ބޭރު މީހުން އައްޔަންކުރުންތޯ ސުވާލުކުރައްވާފައެވެ.
އެމްޑީޕީއަށް ބާރުލިބޭ ކޮންމެ ފަހަރަކު ދިވެހިން ކަންކަމުން ދުރައްލުން މިއީ ދޭ އަނިޔާއެއް! މިއަދު ޤައުމު ހުއްޓިފައިވަނީ ރައީސް އޮފީސް ހިންގުމުގައި ތަޖުރިބާ ނެތް ބަޔަކު އެތަނުގައި ތިބީމަ. ދެން ހައްލަކީ ބޭރުމީހަކު ލުންތޯ؟ އެމްއޭސީއެލް ހިންގީ ދިވެހިން؟
– މުޙައްމަދު ސަޢީދު
އެމްއޭސީއެލްގެ ކޮންސަލްޓެންޓުގެ މަޤާމަށް ހަމަޖައްސާފައިވަނީ ލިންސޭ ޑަބްލިއު ނަމަކަށް ކިޔާ ބޭފުޅެއްކަމަށާއި، އޭނާއަކީ ސީއީއޯ ގޯޑަންއާ ވަރަށް ގާތް ގުޅުމެއް އޮންނަ މީހެއްކަމަށް ބައެއް ޚަބަރުތައް ބުނެއެވެ. އެމްއޭސީއެލްގެ ހިންގުމުގެ ނިޒާމަށް ބޭރުގެ ފަރާތްތައް އައްޔަންކުރާތީ އެ ކުންފުނީގެ ބައެއް މުވައްޒަފުން ގެންދަނީ ކަންބޮޑުވުން ފާޅުކުރަމުންނެވެ. މިގޮތުން ބިދޭސީން އިސް މަޤާމުތަކަށް ހަމަޖައްސަމުންދަނީ ތައުލީމާއި ތަޖުރިބާގެ ގޮތުން އެމީހުންނާ ވާދަކުރެވޭ ފެންވަރުގެ ދިވެހިން ކުންފުނީގައި ތިއްބައިކަމަށްވެސް އެމްއޭސީއެލްގެ ބައެއް މުވައްޒަފުން ބުނެއެވެ.
