ރޭ ބޭއްވި އެމްޑީޕީގެ ޤައުމީ މަޖިލީހުގައި އެޕާޓީގެ އިސްތިއުނާފް ފަނޑިޔާރުންގެ ކޮމިޓީއަށް އިންތިޚާބުކޮށްފައިވަނީ ޕީޕީއެމްގެ މެންބަރުންކަމަށް ވިދާޅުވެ މާފަންނު މެދު ދާއިރާގެ މެންބަރު އިބްރާހީމް ރަޝީދު (ބޮންޑެ) ފާޑުވިދާޅުވެއްޖެއެވެ.

އެމްޑީޕީގެ ގައުމީ މަޖިލީހުގެ 185 ވަނަ ޖަލްސާގައި އޮތީ، އިސްތިއުނާފް ފަނޑިޔާރުންގެ މަޖިލިސް ހޮވުމަށް ވޯޓު ދިނުމެވެ. އިސްތިއުނާފް ފަނޑިޔާރުންގެ މަޖިލީހަށް ކުރިމަތިލެއްވީ 18 ބޭފުޅުންނެވެ. އެހެންނަމަވެސް އިސްތިއުނާފް ފަނޑިޔާރުންގެ މަޖިލީހަށް ހޮވަނީ 9 މެމްބަރުންނެވެ. މިވޯޓު ކުރިއަށް ގެންދިއުމަށްޓަކައި، ސިއްރު ވޯޓެއްގެ ގޮތުގައި ވޯޓު ނެގުނުއިރު، މިއީ މިފަހުނުް އެންމެ ގިނަ އަދަ ދަކަށް މެމްބަރުން ހާޒިރުވި ޤާއުމީ މަޖިލިސްކަންވެސް ފާހަގަކޮށްލެވެއެވެ.

ރޭގެ ޤައުމީ މަޖިލީހަށް ފާޑުވިދާޅުވެ ބޮންޑެ ވިދާޅުވީ، ޤައުމީ މަޖިލިސް ރޭ ކުރިއަށްދިޔައީ ދުވަހަކުވެސް އެމްޑީޕީގެ އެތެރޭގައި ކަންކަން ނުހިނގަހާ ނާއިންސާފުންކަމަށެވެ. މިގޮތުން ވަކި ބަޔަކު ކަޓުވާލުމަށްފަހު އިންތިޚާބުކޮށްފައިވަނީ ޕީޕީއެމްގެ މެންބަރުންކަމަށާއި، އޭގެ ތެރޭގައި ޕީޕީއެމްގެ މެންބަރުންކަމަށް އިލެކްޝަންސް ކޮމިޝަންގެ ދަފްތަރުން ފެންނަ މީހުން ހިމެނޭކަމަށް ބޮންޑެ ވިދާޅުވިއެވެ. ބޮންޑެ ވިދާޅުވީ މީގެ ކުރިން ޤައުމީ މަޖިލީހުގައި ބައިވެރި ނުވާ މީހުންވެސް ރޭގެ ބައްދަލުވުމުގައި ބައިވެރިވިކަމަށެވެ.

އުމުރުހަމަވެފަ އޮތް މަޖިލީހަކުން އެއޮތީ އަނެއްކާ ވެސް އިސްތިއުނާފު ކޯޓެއް، އެއީ ކޮން ކޯޓެއްތޯ އެއީ އެމްޑީޕީގަ ޖެހޭ ހުރިހާ މައްސަލަތަކުގަ ފަހުބަސް ބުނަން އޮތް ކޯޓު މި ނެގީ މުއްދަތު ހަމަވެފަ އޮތް ގައުމީ މަޖިލީހަކުން.

– މާފަންނު މެދު ދާއިރާގެ މެންބަރު އިބްރާހީމް ރަޝީދު

ސަރުކާރު ހިންގާ ކޯލިޝަންގެ މައި ޕާޓީގެ އިސްތިއުނާފު ފަނޑިޔާރުންގެ މަޖިލީސްގެ އިންތިހާބުގައި އެ ޕާޓީގެ ގައުމީ މަޖިލީހުގެ 120 މެމްބަރުން ވޯޓު ދެއްވިއެވެ. އެމްޑީޕީގެ އެތެރޭގެ ވާދަވެރިކަން ބޮޑުވެފައި އޮތްވައި، ޕާޓީގެ ބާރުގަދަ ގުނަވަނެއް ކަަމަށްވާ އިސްތިއުނާފު ފަނޑިޔާރުންގެ މަޖިލީހަށް ރޭ އިންތިޚާބުކޮށްފައިވަނީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ތާއިދު ކުރެއްވި ކެންޑިޑޭޓުންނެވެ.

އިސްތިއުނާފު މަޖިލީހަށް ހޮވުނު ކެންޑިޑޭޓުން:

1. އަނަސް އަބްދުއްސައްތާރު، މއ. ބަޑިކުޅިމާލެ، މާލެ (76 ވޯޓު)

2. އަހުމަދު ރިޝްވާން، އާލަމް، ހއ. ދިއްދޫ (71 ވޯޓު)

3. އިބްރާހިމް މުހައްމަދު ދީދީ، ލެގޫން ވިއު، ސ. ހިތަދޫ (67 ވޯޓު)

4. އަހުމަދު މައުރޫފު، ނިއު ލައިޓް، ލ. ކަލައިދޫ (67 ވޯޓު)

5. ފާތިމަތު އިނާޝާ، ހ. ގްރީން ފެހި، މާލެ (66 ވޯޓު)

6. ހުސައިން ރަޝީދު، ތިބުރޯޒުގެ، ތ. އޮމަދޫ (66 ވޯޓު)

7. އާދަމް މާހިރު، މެޑޯޒް، ރ. އަލިފުށި (65 ވޯޓު)

8. އަހުމަދު ނިޝާދު، ނޫރު، މ. ދިއްގަރު (64 ވޯޓު)

9. ނައުޝާދު އަބްދުލް އަޒީޒު، ސުވޭދާ މަންޒިލު، އއ. ރަސްދޫ (63 ވޯޓު)

އިސްތިއުނާފް ފަނޑިޔާރުންގެ މަޖިލީހުގެ ޒިންމާއަކީ އެމްޑީޕީގެ އަސާސީ ގަވާއިދުގެ އެއްވެސް ކަމަކާ މެދު މެމްބަރަކު ޝަކުވާއެއް އިސްތިއުނާފްކުރަން ބޭނުންވާ ނަމަ އެ ޝަކުވާ ބެލުމެވެ. މީގެ އިތުރުން އަސާސީ ގަވާއިދު މާނުކުރުމާ މެދު އުފެދޭ ހުރިހާ ދެބަސްވުންތަކުގެ ހައްލަށް ވެސް އެ މަޖިލީހަށް ހުށަހެޅިދާނެ ކަމަށް އަސާސީ ގަވާއިދުގައިވެއެވެ.

އެމްޑީޕީގެ ޤައުމީ މަޖިލިސްގެ ދައުރުވެސް މިހާރު ހަމަވެފައިވާއިރު، ބައެއް ކޮމިޓީތަކުގެ މެމްބަރުންގެ ދައުރުވެސް ވަނީ ހަމަވެފައެވެ. ކޯވިޑް-19 އާއި ގުޅިގެން ޤައުމީ މަޖިލިސް އިންތިޚާބު ވަނީ 2 ފަހަރެއްގެ މަތީން ފަސްކޮށްފައެވެ. މި އިންތިޚާބު އަންނަ މަހުގެ 25 ވަނަ ދުވަހު ބޭއްވުމަށް އެމްޑީޕީން ވަނީ ނިންމާފައެވެ.