ޓްރެއިނިން ކޭމްޕަކަށް 23 އަހަރުން ދަށުގެ ގައުމީ ފުޓްބޯޅަ ޓީމު ޅ.އަތޮޅަށް

ޓްރެއިނިން ކޭމްޕަކަށް ރާއްޖޭގެ 23 އަހަރުން ދަށުގެ ޤައުމީ ފުޓްބޯޅަ ޓީމު ޅ.އަތޮޅަށް ދިއުމަށް ހަމަޖެހިއްޖެއެވެ.

23 އަހަރުން ދަށުުގެ ޓީމު ޅ.އަތޮޅުގައި ކޭމްޕް ކުރުމަށް ހަމަޖެހިފައިވަނީ އަންނަ ސެޕްޓެމްބަރު މަހުގެ ހަތަރުވަނަ ދުވަހުން ފެށިގެން ބާރަ ވަނަ ދުވަހުގެ ނިޔަލަށެވެ. މި ދަތުރުގައި ފަސް މެޗު ކުޅޭ ގޮތަށް ވަނީ ހަމަޖެހިފައެވެ. އެއީ ނ. ކުޑަފަރި، ނ. ހޮޅުދޫ، ޅ. ނައިފަރު، ރ. މީދޫ އަދި ޅ. ހިންނަވަރުއާ ދެކޮޅަށް ކުޅޭ މެޗުތަކެެވެ.

23 އަހަރުން ދަށުގެ ގައުމީ ފުޓްބޯޅަ ޓީމު އަންނަނީ 28 އޮގަސްޓް އިން ފެށިގެން މާލޭގައި ފަރިތަކުރުންތައް ކުރިޔަށް ގެންދަމުންނެވެ. ގައުމީ 23 އަހަރުން ދަށުގެ ޓީމުގެ ކޯޗަކީ ސީނިއާ ޓީމުގެ ވެސް ކޯޗަކަށް ހުރި ތަޖުރިބާކާރު ކޯޗު ސުޒޭންއެވެ. އެސިސްޓަންޓް ކޯޗުންނަށް ހަމަޖެއްސީ ޒުވާން ކޯޗު ސޮބާހު މުޙައްމަދު އިބްރާހީމް (ސޮބާ) އާއި މުޙައްމަދު ޝާހިދު (ޝާޑު) އެވެ.

23 އަހަރުގެ ދަށުގެ ގައުމީ ފުޓްބޯޅަ ޓީމު މިހާރު ތައްޔާރުވަމުން އަންނަނީ މިއަހަރުގެ އޮކްޓޯބަރ މަހުގެ 23 އިން 31 އޮންނަ 23 އަހަރުން ދަށުގެ އޭއެފްސީ އޭޝިއަން ކަޕުގެ ކޮލިފައިންގައި ވާދަކުރުމަށެވެ. ކޮލިފައިންގައި ރާއްޖެ ހިމެނެނީ އިރާގް، ބަހުރޭން އަދި އަފްގާނިސްތާނާ އެއް ގްރޫޕެއްގައެވެ.