ޗެމްޕިއަންސް ލީގުގައި ރޭ ޖަރުމަނުގެ ބަޔާން މިއުނިކާއި ރަޝިއާގެ ލޮކޮމޮޓިވް މޮސްކޯ އާއި ބައްދަލުކުރި މެޗުން މޮޅުވެ ބަޔާނުން ޗެމްޕިއަންސް ލީގުގައި ހަދަމުން އައި މޮޅުވުމުގެ ރެކޯޑު ދަމަހައްޓައިފިއެވެ.
ރަޝިއާގެ ލޮކޮމޮޓިވް މޮސްކޯއާއި ދެކޮޅަށް އެޓީމުގެ ދަނޑުގައި ކުޅުނު މެޗުން ބަޔާން މޮޅުވީ 1-2 ލަނޑުންނެވެ.
ބަޔާނުން ވަނީ މެޗުގެ ކުރީކޮޅު ލަނޑެއް ޖަހާ ލީޑުނަގާފައެވެ. ފުރަތަމަ ހާފުގެ 13 ވަނަ މިނިޓުގައި މިލަނޑު އެޓީމަށް ކާމިޔާބުކޮށްދިނީ ލިއޯން ގޮރެޓްޒްކާއެވެ.
މޮސްކޯއިން މެޗުގެ ނަތީޖާ ހަމަހަމަ ކުރީ މެޗުގެ 70 ވަނަ މިނިޓުގައެވެ. މި ލަނޑު އެޓީމަށް ކާމިޔާބުކޮށްދިނީ އެންޓޮން މިރަންޗުކެވެ.
މެޗުން ބަޔާން މޮޅުވި ލަނޑު އެޓީމަށް ކާމިޔާބު ކޮށްދިނީ ޖޯޝުއަރ ކިމިޗެވެ. މި މޮޅާއެކު ބަޔާން މިއުނިކް ވަނީ ޗެމްޕިއަންސް ލީގުގައި ވިދިވިދިގެން 13 މެޗުން މޮޅުވެފައެވެ. މި 13 މެޗުގައި އެޓީމުން 49 ލަނޑުޖެހި އިރު ބައިކޮޅަށް ވަނީ 9 ލަނޑެވެ.
މި ނަތީޖާތަކާ އެކު މިވަގުތު ގްރޫޕް އޭގެ އެއްވަނާގައި، ކުޅުނު ދެ މެޗުން 6 ޕޮއިންޓު ހޯދައިގެން އޮތީ ބަޔާން މިއުނިކެވެ. ދެވަނާގައި ތިން ޕޮއިންޓާއެކު އޮތީ އެތުލެޓިކޯ މެޑްރިޑެވެ. ގޯލްގެ ތަފާތުން ތިންވަނާގައި ލޮކޮމޮޓިވް މޮސްކޯ އޮތްއިރު ފުލުގައި އޮތީ ސާލްސްބާގެވެ.
