ނާކޮޓިކްސް ކޮންޓްރޯލް ބިއުރޯ (އެންސީބީ) އިން ބޮލީވުޑްގެ ތަރި އަރްމާން ކޯލީ ހައްޔަރުކޮށްފިއެވެ.
އަރްމާން އާންމުންނަށް އެނގިގެން ދިއައީ "ބިގްބޮސް 7″ގައި ވާދަކުރި ފަހުންނެވެ.
އަރްމާން ވަނީ ބައެއް ފިލްމުތަކުގެ ސަޕޯޓިން ރޯލުތަކުން ފެނިގެން ގޮސްފައެވެ. ނަމަވެސް ބޮލީވުޑްގައި މާބޮޑު ކާމިޔާބެއް އަރްމާނަށް ހޯދިފައިއެއް ނުވެއެވެ.
އަރްމާން މިއަދު ހެނދުނު ހައްޔަރު ކުރުމުގެ ކުރިން ވަނީ އޭނާ ޖޫހޫގައި ދިރިއުޅެމުންދާ ގެ ބަލާ ފާސްކޮށްފައެވެ. އަދި އެތަނުން އެމީހުންނަށް ޑްރަގް ފެނިފައިވާ ކަމަށް އެންސީބީން ވަނީ ހާމަ ކޮށްފައިއެވެ.
"އަރްމާންގެ ގެއިން ވަނީ ޑްރަގް ފެނިފައި. އެކަމަކު އެއީ ވަރަށް މަދު އަދަދެއްގެ ޑްރަގް."
– އެންސީބީ މުމްބާއީ ޒޮނަލް ޔުނިޓްގެ ޑިރެކްޓަރު
އިތުރަށް ވާހަކަ ދައްކަމުން އެންސީބީ މުމްބާއީ ޒޮނަލް ޔުނިޓްގެ ޑިރެކްޓަރު ބުނެފައި ވަނީ އަތުލައިގަތް މަސްތުވާ ތަކެއްޗަކީ ސައުތު އެމެރިކާ އިން ގެނެސްފައިވާ ތަކެތި ކަމަށް ބެލެވޭ ކަމަށާއި އެކަމާ ގުޅުންހުރި ހުރިހާ ދިމާއަކުން އިންވެސްޓިގޭޝަން ކުރިއަށް ދާކަމަށެވެ.
"ބިގްބޮސް" ގައި އަރުމާން ފެނިގެން ގޮސްފައިވަނީ ވަރަށް ރުޅިގަދަ ޝޯޓް ޓެމްޕާ ބައިވެރިއެއްގެ ގޮތުގައެވެ. މީގެ އިތުރުން އޭނާ އާއި ބިގް ބޮސްގެ ބައިވެރިއެއް ކަމުގައިވާ ތަނީޝާ މުކަރްޖީ އާއި ދެމެދު ހިނގި ލޯބީގެ ގުޅުމުގެ ސަބަބުންވެސް އަރްމާން ވަނީ މަގުބޫލު ވެގެން ގޮސްފައެވެ.
މިދިއަ އަހަރު ސުޝާންތު ސިންގް ރާޖްޕުތު މަރުވުމާއި ގުޅިގެން ފުލުހުން ހިންގި ހާއްސަ އޮޕަރޭޝަން ގައި ޑްރަގްގެ މައްސަލަތަކެއް ތަހުގީގުކޮށް ބޮލީވުޑްގެ އޭ ލިސްޓްގެ ގިނަ ތަރިންތަކަކާއި ސުވާލުކޮށްފައި ވެއެވެ.
