ސަރުކާރުގެ ބޯހިޔާވަހިކަމުގެ ވައުދުތައް ލަސްނުކޮށް ފުއްދުމަށް ރައްޔިތުންގެ މަޖިލީހުގެ މާފަންނު މެދު ދާއިރާގެ މެންބަރު އިބްރާހީމް ރަޝީދު (ބޮންޑެ) ގޮވާލައްވައިފިއެވެ.
ބޮންޑެ ވިދާޅުވީ، އާއިލާތަކަށް ދިރިނޫޅެވޭ ވަރުގެ ކުދި ބިންކޮޅުކޮޅުގައާއި، ކުދިކުދި ފްލެޓްތަކުގައި ދިރިއުޅޭ ފަރާތްތަކަށް އެމީހުން އިޚްތިޔާރުކުރާ އެހެންތަނަކުން އެކަށީގެންވާ ވަރުގެ ގޯއްޗެއް ފޯރުވައިދިނުމަކީ ޖަޒީރާ ރާއްޖޭގެ މެނިފެސްޓޯގައި ހިމެނޭ ވައުދެއްކަމަށެވެ. އެއީ ލަސްނުކޮށް ސަރުކާރުން ފުއްދަންޖެހޭ ވައުދެއްކަމަށްވެސް ބޮންޑެ ވިދާޅުވިއެވެ.
އާއިލާތަކަށް ދިރިނޫޅެވޭ ވަރުގެ ކުދި ބިންކޮޅުކޮޅުގައާއި، ކުދިކުދި ފްލެޓްތަކުގައި ދިރިއުޅޭ ފަރާތްތަކަށް އެމީހުން އިޚްތިޔާރުކުރާ އެހެންތަނަކުން އެކަށީގެންވާ ވަރުގެ ގޯއްޗެއް ފޯރުވައިދިނުމަކީ ޖަޒީރާ ރާއްޖޭގެ މެނިފެސްޓޯގައި ހިމެނޭ ވައުދެއް . ލަސްނުކޮށް ސަރުކާރުން ފުއްދަންޖެހޭ ވައުދެއް! pic.twitter.com/42QND8fJmX
— Ibrahim Rasheed (@BondeM4) August 26, 2021
ބޯހިޔާވަހިކަމުގެ ވައުދު ފުއްދުމަށް ސަރުކާރަށް ބޮންޑެ ގޮވާލައްވާފައިވާއިރު، އޭނާ ގެންދަވަނީ ސަރުކާރުގެ ބައެއް ސިޔާސަތުތަކަށް ފާޑުވިދާޅުވަމުންނެވެ. މިގޮތުން ނިމިގެންދިޔަ ލޯކަލް ކައުންސިލްތަކުގެ އިންތިޚާބު އެމްޑީޕީއަށް ނާކާމިޔާބުވުން ގުޅެނީ ރައްޔިތުން ގެދޮރުވެރިކުރުވަން ސަރުކާރުން ގެންގުޅޭ ސިޔާސަތު ކޯލިޝަންތެރޭން ތާށިކޮށްގެން ގެންގުޅުމުގެ ނަތީޖާއާއިކަމަށްވެސް ބޮންޑެ ކުރިން ވިދާޅުވެފައިވެއެވެ.
މިސަރުކާރުގެ ބޯހިޔާވަހިކަމާގުޅޭ ސިޔާސަތުތައް އަވަހަށް ތަންފީޒުކޮށް، އެ ސިޔާސަތުތައް ކަނޑައަޅާފައިވާ މުއްދަތުގެ ތެރޭގައި ނިންމުމަށް ސަރުކާރަށް ދެންނެވުމަށް ރައްޔިތުންގެ މަޖިލީހުން އޭޕްރީލްމަހު ފާސްކޮށްފައި ވެއެވެ. އެގޮތުން މަޖިލީހުން އޭރު ފާސްކޮށްފައިވާ ރިޕޯޓުގައި ވަނީ ސަރުކާރުގެ “ސްޓްރެޓ ޖިކް އެކްޝަން ޕްލޭން 2023-2019” ގައި ބޯހިޔާވަހިކަމާގުޅޭ މައިގަނޑު ސިޔާސަތުތައް ތަންފީޒު ކުރުމާއި ގާތައްވެސް އަދި މިހާތަނަށް މަސައްކަތް ކުރެވިފައި ނުވާކަމަށް ބުނެފައެވެ.
މިސަރުކާރުން ވެރިކަމަށް އައުމަށް ރައްޔިތުންނަށް ވެފައިވާ ބޯހިޔާވަހިކަމުގެ ވައުދު ނުފުއްދި ގިނަ ދުވަސްތަކެއް ވަމުންދާތީ ގިނަބައެއްގެ ނުރުހުން ވަނީ ސަރުކާރަށް އަމާޒުވެފައެވެ. އަދި ނިމިދިޔަ ކައުންސިލް އިންތިޚާބުގައި މާލެ ސިޓީގެ ސާފު އައުލަބިއްޔަތު އިދިކޮޅު ޕްރޮގްރެސިވް ކޯލިޝަން ވަނީ ދީފައެވެ. މާލެ ސިޓީން އެމްޑީޕީއަށް މިފަހަރު ބޮޑު ނާކާމިޔާބީއެއް ލިބިފައިވަނީ ބޯހިޔާވަހިކަމަށް ވެފައިވާ ވައުދުތައް ނުފުއްދުމުންކަމަށް އެމްޑީޕީގެ ގިނަ މެމްބަރުންވެސް ވަނީ ބުނެފައެވެ.
ބޯހިޔާވަހިކަމަށް ސަރުކާރަށް އެކަށީގެންވާ މަސައްކަތެއް މިހާތަނަށް ކުރެވިފައި ނުވާއިރު، ރައީސް ޞާލިހު ވިދާޅުވީ މިދައުރުގެ ތެރޭގައި 15،000 ހައުސިން ޔުނިޓް އަޅައި ދެއްވާނެކަމަށެވެ.
2 Responses
Kobaathoa petition
އިބޫއަށް ރަނގަޅަށް އެނގޭނެ ގޯތި ދިނީމާ ދުރު ރާސްތާގައި ފައިދާތަ ކެއް ހުރި ކަން. ވިޔަފާރިއަށް ބިން ވިއް ކަން އެޗް.ޑީ.ސީ ވިޔަފާރި ކުން ފުނިން ވިސްނުން ހުރީ. ސިޓީ ކައުންސިލުންް އަސާސީ ބޯހިޔާވަހި ކަމަށް ކކ ކުރެވޭނެ ކަމެއް ނެތް.