ޖިންސީ ގޯނާގެ ކުށުގެ ދަޢުވާ އުފުލާފައިވަނިކޮށް ރާއްޖެ ދޫކޮށް އިނގިރޭސިވިލާތަށް ވަޑައިގެންނެވި ކުރީގެ ޓޫރިޒަމް މިނިސްޓަރ ޢަލީ ވަޙީދު ހައްޔަރުކޮށްފައިވާކަމެއް ރާއްޖޭގެ ކަމާއިބެހޭ އެއްވެސް އިދާރާއަކަށް ނޭނގޭކަމަށް ހާމަކޮށްފިއެވެ.
އަލީ ވަހީދު ހައްޔަރުކުރި ކަމަށް ބުނީ އޭނާ އަށް ކުރާ ދައުވާތަކާ ބެހޭ ގޮތުން ރާއްޖޭގެ ބައެއް މީޑިއާތައް ބައިވެރިކޮށްގެން އޮންލައިންކޮށް މިއަދު ހަވީރު ޕްރެސް ކޮންފަރެންސެއް ބާއްވަން އުޅެނިކޮށެވެ. އޭނާ ހައްޔަރުކުރި އިރު، ސުޕްރީމް ކޯޓުގެ ޝަރީއަތަކަށް ހާޒިރުވުމަށް ފޮނުވި އަމުރަށް ތަބާ ނުވުމުން ކޯޓުގެ ހުރުމަތް ކެނޑި ކަމުގެ ކުށުގައި ދެ މަހާއި 12 ދުވަހަށް ޖަލަށް ލުމުގެ ހުކުމެއް ވެސް އެބަ އޮތެވެ. ހުކުމް ތަންފީޒު ކުރުމަށްޓަކައި، ފުލުހުން ވަނީ އަލީ ވަހީދު ރާއްޖެ ގެނައުމާއި ގުޅޭގޮތުން ކުރަންޖެހޭ މަސައްކަތްތައް ކުރަމުންގެންދާކަމަށް ބުނެފައެވެ.
މިމައްސަލައާއި ގުޅިގެން ރާއްޖޭގެ ފުލުހުންގެ އިދާރާއިން ބުނެފައިވަނީ އަލީ ވަހީދު ހައްޔަރުކުރިކަމުގެ މައުލޫމާތެއް ފުލުހުންނާއި ގުޅޭ އެއްވެސް ފަރާތަކުން ހިއްސާކޮށްފައި ނުވާކަމަށެވެ. އަދި އެފަދަ މައުލޫމާތެއްވެސް ފުލުހުންނަށް ލިބިފައިނުވާކަމަށެވެ.
މިމައްސަލާގައި ރާއްޖޭގެ ޚާރީޖީ ވުޒާރާއިންވެސް ބުނެފައިވަނީ އަލީ ވަހީދު ހައްޔަރުކުރިކަމެއް ނޭގޭކަމަށެވެ. އަލީ ވަހީދު ހައްޔަރުކުރިކަމެއް ރާއްޖޭގެ ކަމާއިގުޅުންހުރި އެއްވެސް އިދާރާއަކަށް އެނގިފައިނުވާއިރު، އޭނާ ހައްޔަރުކުރިކަމަށްބުނެ ދެކެވޭ ވާހަތަކަކީ ހަގީގަތެއްކަމެއް އަދި ހަގީތެއް ނޫންކަމެއްވެސް ސާފެއްނުވެއެވެ. އަދި އޭނާ ހުރީ މިހާރު ޤައުމެއްގައިކަމެއްވެސް އެނގިފައިނުވެއެވެ. އޭނާ އެންމެފަހުން ކޮށްފައިވާ ޓްވީޓުގައިވަނީ މިއަދު ހަވީރު ޕްރެސް ކޮންފަރެންސެއް ބާއްވާނެކަމަށެވެ.
Looking forward to the press conference today at 4pm ?? pic.twitter.com/lcvTZqMQfp
— Ali Waheed (@ali20waheed) August 25, 2021
ޢަލީ ވަހީދު ތަމްސީލުކުރާ މެކްސީމް ޗެމްބާސް ލޯ ފާމުން ވަކީލުން ނެރުނު ބަޔާނުގައި ބުނެފައިވަނީ އަލީ ވަހީދާއި ދޭތެރޭ މައިގަނޑު ގޮތެއްގައި ދައުލަތުން ހިންގާފައި ވަނީ ބޭއިންސާފު އަމަލުތަކެއް ކަމަށްބުނެ ވަކީލުން ވަނީ ބައެއް ކަންތައްތައް ނޫސްބަޔާނުގައި ފާހަގަކޮށްފައެވެ. އޭގެ ތެރޭގައި އެއްވެސް ތަހުގީގެއް ކުރުމެއްނެތި، ޖަވާބުދާރީވުމުގެ ފުރުސަތެއް ނެތި ވަޒީރުކަމުން ވަކި ކުރުމާއި، ތަހުގީގުގައި އެއްވެސް ކުށެއްގެ ތުހުމަތު ސާފުކޮށް ދީފައިނުވުން އަދި ޕީޖީ އޮފީހުން އޮފީހުން އުފުލި އެއްވެސް ދައުވާއަކާ ގުޅޭގޮތުން ތަހުގީގު މަރުހަލާގައި ސުވާލުކޮށްފައިނުވާ ކަމަށްވެސް ވަކީލުން ފާހަގަކޮށްފައިވެއެވެ.
ކުށެއް ކުރެވުނީ ކޮން ފަރާތަކާ މެދު ކިހިނެއްކަން ތުހުމަތު ކުރެވޭ ފަރާތަށް އެނގެން ޖެހޭނެ ކަމަށް ގާނޫނުއަސާސީ އާއި ޖިނާއީ އިޖުރާއަތުގެ ގާނޫނުގައި ސާފުކޮށް ބަޔާންކޮށްފައިވީ ނަމަވެސް ކުށް ކުރި ތަނެއް އަދި ތާރީހު ވެސް އަލީ ވަހީދަށް ސިއްރު ކޮށްފައިވާ ކަމަށް ވަކީލުންގެ ބަޔާނުގައި ބުނެފައިވެއެވެ. އަލީ ވަހީދުގެ ޝަރީއަތް ކުރިއަށް ގެންދަނީ ޖިންސީ އެހެން މައްސަލަތަކެކޭ ވެސް އެއްގޮތަށް އަޑުއެހުންތައް ސިއްރު ކޮށްގެންނެވެ. ނަމަވެސް އޭނާގެ ވަކީލުންގެ ބަޔާނުގައި ބުނީ، އަޑުއެހުންތއް އާންމުންނާއި ނޫސްވެރިންނަށް ހުޅުވައިލަން އަލީ ވަހީދުގެ ފަރާތުން އެދުނަސް އެގޮތަށް އަމަލު ކޮށްފައި ނުވާ ކަމަށެވެ. އަދި ޕީޖީ އޮފީހުން ކޯޓުތަކަށާއި މީޑިއާ އަށް ދޮގު މައުލޫމާތު ދީ، އޮޅުވައިލަމުންދާ ކަމަށް ބުނެފައިވެއެވެ.
އަލީގެ މައްޗަށް ސުޕްރީމް ކޯޓުން ކުރި ހުކުމް ތަންފީޒު ކުރުމަށް ރާއްޖެ ގެނައުމަށްޓަކައި އިންޓަޕޯލް މެދުވެރިކޮށް ކުރަން ޖެހޭ ކަންކަން ކުރަމުން އަންނަ ކަމަށް ފުލުހުން ވަނީ ވިދާޅުވެފައެވެ. އަދި ފުލުހުންގެ ފަރާތުން ޕޮލިސް ޓު ޕޮލިސް ކޯޕަރޭޝަން މެދުވެރިކޮށް ވެސް އިތުރަށް މަސައްކަތް ކުރަމުން އަންނަ ކަމަށް ފުލުހުން މައުލޫމާތުދެއެވެ.
