އާންމު ތަނެއްގައި މުސްލިމަކު ކާފަރެއްގެ ގޮތުގައި ސިފަކުރުންފަދަ ނަފުރަތުގެ އަމަލު ހިންގުން ޖިނާއީ ކުށަކަށް ހެދުމަށް ގާނޫނުލްއުގޫބާތަށް ތުޅާދޫ ދާއިރާގެ މެމްބަރު ހިސާން ހުސެއިން ހުށައަޅައްވާފައިވާ ބިލާގުޅޭ ގޮތުން، ކަމާބެހޭ މިނިސްޓްރީތަކުގެ ވެރިންނާއި، އިސްލާމީ ޝަރީޢާގެ ދާއިރާގެ ޢިލްމީ ބޭފުޅުންނާއި، ބަންޑާރަނައިބު ބައްދަލު ކުރައްވަމުން ގެންދަވާކަމަށް އެޓާރނީޖެނެރަލް އޮފީހުގެ ފަރާތުން ވިދާޅު ވެއްޖެއެވެ.
އެޓާރނީޖެނެރަލް އޮފީހުން ކުރެއްވި ޓުވީޓެއްގައި ބުނެފައިވަނީ، މި ބިލާ ގުޅުންހުރި ސަރުކާރުގެ އިދާރާތަކާއި، އަދި ދީނި އިލްމުވެރިންނާ އެކީ، ބަންޑާރ ނައިބުގެ އޮފީހުން ކުރިޔަށް ގެންދަވާ މަޝްވަރާތަކުގައި، ރައްޔިތުންގެ މަޖިލިހުގެ ޖުޑިޝަރީ ކޮމިޓީން ފާސްކުރައްވާފައިވާ ބިލުގެ ދެލިކޮޕީއާމެދު މަޝްވަރާކޮށް، އެ ބިލު އިތުރަށް ފުރިހަމަ ކުރުމަށްޓަކާ ގެނެވިދާނެ ބަދަލުތައް މިބައްދަލުވުންތަކުގެ ބައިވެރިންނަށް މިހާރުވަނީ ހުށަހެޅިފައެވެ.
ބަންޑާނައިބުގެ އޮފީހުން ވިދާޅުވެފައިވާ ގޮތުގައި މިއީ، ސިލްސިލާކޮށް ކުރިޔަށް ގެންދިއުމަށް ހަމަޖެހިފައިވާ ބައްދަލުވުން ތަކެކެވެ.
ނަފްރަތުގެ ޢަމަލުތަކަކީ ކުށެއް ކަމުގައި ކަނޑައެޅުމަށްޓަކައި ޤާނޫނުލްއުޤޫބާތަށް އިޞްލާޙުގެނައުމަށް ސަރުކާރުން ހުށަހަޅާފައިވާ ބިލާގުޅޭ ގޮތުން ކަމާބެހޭ މިނިސްޓްރީތަކުގެ ވެރިންނާއި އިސްލާމީ ޝަރީޢާގެ ދާއިރާގެ ޢިލްމީ ބޭފުޅުންނާ ބަންޑާރަ ނައިބުވަނީ މިއަދު ބައްދަލުކުރައްވާފައެވެ.
— AG Office Maldives (@AGOmv) August 24, 2021
ތުޅާދޫ ދާއިރާގެ މެމްބަރު ހިސާން ހުސެއިން ސްޕޮންސަރ ކުރައްވައިގެން ސަރުކާރުގެ ފަރާތުން ރައްޔިތުންގެ މަޖިލިހަށް ހުށަހެޅުއްވި ނަފްރަތުގެ ބިލް ވެގެން ދިޔައީ ފަހަކަށް އައިސް، އެބިލާގުޅޭގޮތުން މުޅި މުޖުތަމަޢުގެ ގިނަ ބައެއްގެ ފާޑިކިއުން އަމާޒުވެ، ގިނަ އަދަދެއްގެ ކައުންސިލްތަކާއި، ޖަމިއްޔާ ޖަމާއަތްތަކާއި، ދިނީ އިލްމުވެރިންނާއި އަދި މީގެ އިތުރުން އެމްޑީޕީ ފިޔަވާ ރާއްޖޭގެ އެހެން ހުރިހާ ސިޔާސީ ޕާޓިތަކުންވެސް އެބިލަކާ ދެކޮޅަށް ފާޅުގައި ތެދުވި ބިލަކަށެވެ.
ހަމަ އެއާއެކު، މުޅި މުޖަތަމަޢުގެ އެތައް ގިންތިއަކުން މިބިލާ ދެކޮޅު ހަދަމުންދިޔައިރު، އެންމެ ބޮޑަށް ފާހަގަވާން ވެގެންދިޔަ އަނެއްކަމަކީ، ރައްޔިތުންގެ މަޖިލީހުގެ ގިނަ އަދަދެއްގެ މެމްބަރުންވެސް މިބިލާ ފެށުނީއްސުރެ ދެކޮޅު ހައްދަވަމުން ގެންދަވާފައި ވާކަމެވެ. މީގެތެރޭގައި އެމްޑީޕީގެ ގިނަ މެމްބަރުންވެސް ހިމެނި ވަޑައިގަންނަވައެވެ. އަދި މި ބިލުގެ މައްސަލާގައި އެމްޑީޕީގެ މަޖިލިސް ރައީސް ނަޝީދަށް ތާއިދުކުރާ ފެކްޝަންގެ މެމްބަރުންގެ ފާޑުކިއުންވަނީ ސަރުކާރަށް ވަރަށް ބޮޑަށް އަމާޒުވެފައެވެ.
އެންމެ ފަހުން ރައީސުލްޖުމްހޫރިއްޔާ އިބުރާހިމް މުހައްމަދު ސާލިހު ބޭއްވެވި ނޫސްވެރިންގެ ބައްދަލުވުމުގައި ވިދާޅުވެފައިވަނީ، އާންމު ތަނެއްގައި މުސްލިމަކު ކާފަރެއްގެ ގޮތުގައި ސިފަކުރުން ފަދަ ނަފުރަތުގެ އަމަލު ހިންގުން ޖިނާއީ ކުށަކަށް ހެދުމަށް ޤާނޫނުލް އުގޫބާތަށް ހުށާހެޅި މިއިސްލާހު ސަރުކާރުން ފުރަތަމަ ހުށަހެޅިގޮތަށް ފާސްކުރަން މިހާރު ނޭދޭ ކަމަށާއި ރައްޔިތުން އެދޭ ގޮތަށް މިބިލަށް އިސްލާހު ގެންނަން ޖެހޭ ކަމަށެވެ.
ނަފްރަތުގެ ބިލް ވަކީން ޚާއްސަގޮތެއްގައި ފާހަގަވެެގެން ދިޔައީ، މަޖިލިސް ރައީސް މުހައްމަދު ނަޝީދު ވަރަށް ބޮޑަށް ތާޢީދު ކުރައްވާ ބިލަކަށެވެ. އަދި ނަޝީދު ފަހުން ވިދާޅުވެފައިވަނީ، މިބިލަށް ސަރުކާރުން ތާޢީދު ނުކުރާނަމަ، ރައީސް ސާލިހާއެކީ އިތުރަށްދެން ސިޔާސީ މަސައްކަތެއް ނުކުރައްވާނެ ކަމުގައެވެ.
ބައެއްފަރާތްތަކުން ގަބޫލު ކުރައްވާގޮތުގައި، ނަޝީދު ރާއްޖެ އެބުރިވަޑައި ނުގެން އިގިރޭސިވިލާތުގައި މަޑުކުރައްވާ އެއް ސަބަބަކީ މިބިލް މަޖިލީހުން ފާސްވެގެން ނުދިއުމެވެ.
