ރައްޔިތުންގެ މަޖިލީސް ރައީސް މުޙައްމަދު ނަޝީދުގެ ސެކިއުރިޓީއާ ގުޅޭގޮތުން ރައްޔިތުންގެ މަޖިލީހުގެ މިއަދުގެ ޖަލްސާގައި އެމްޑީޕީގެ ދިއްގަރު ދާއިރާގެ މެންބަރު އިކްރާމް ހަސަން ދެއްކެވި ވާހަކަފުޅާ ގުޅިގެން ނަޝީދުގެ ގާނޫނީ ޓީމުން ކަންބޮޑުވުން ފާޅުކޮށްފި އެވެ.
މެއި މަހުގެ 6 ވަނަ ދުވަހު މަޖިލިސް ރައީސް މުހައްމަދު ނަޝީދަށް ދިން ހަމަލާއަށްފަހު، އެމަނިކުފާނުގެ ސެކިއުރިޓީ ވަނީ ވަރަށް ވަރުގަދަ ކޮށްފައި ކަމަށާއި، ރާއްޖެ ވަޑައި ނުގެންނެވެންވީ ސަބަބެއް ނެތްކަމަށް ދިއްގަރު ދާއިރާގެ އެމްޑީޕީގެ މެމްބަރު އިކްރާމް ހަސަން މިއަދު މަޖިލީހުގެ ޖަލްސާގައި ވަނީ ވިދާޅުވެފައެވެ.
އިކްރާމް ވިދާޅުވީ، ޓެރަރިސްޓު ހަމަލާއަށް ފަހު ސަރުކާރުން އަޅާފައިވާ ފިޔަވަޅުތަކާއެކު، ނަޝީދަށް ކުރިއަށް ވުރެ ބޮޑަށް މިހާރު ސެކިއުރިޓީ ލިބިވަޑައިގަންނަވާނެ ކަމަށާއި ސެކިއުރިޓީ ދޭ ވަރު އިތުރު ކުރުމުގެ ފުރުސަތު ވެސް އެބައޮތް ކަމަށެވެ. އެހެންކަމުން އެ މަނިކުފާނު ރާއްޖެ ވަޑައިނުގަނެވިގެން މިއަދު ހުންނަވަން ޖެހޭ ސަބަބެއް ނެތް ކަމަށާއި ކަންކަން ރަނގަޅު ކުރަން ރާއްޖެ ވަޑައިގެން މަސައްކަތްޕުޅު ކުރައްވަން ޖެހޭ ކަމަށް އިކްރާމް ވިދާޅުވިއެވެ.
އިކުރާމްގެ މި ވާހަކަފުޅުތަށް ކުށްވެރިކޮށް ނަޝީދުގެ ގާނޫނީ ވަކީލުން ނެރުނު ބަޔާނުގައި ބުނެފައިވަނީ ރައީސް ނަޝީދަށް ރާއްޖެ ވަޑައިނުގެންނެވޭނެ ސަބަބެއް މިހާރު ނެތް ކަމަށް އިކްރާމު މަޖިލީހުގައި ވިދާޅުވި ބަސްފުޅާ މެދު ރައީސް ނަޝީދުގެ ފަރާތްޕުޅުން ކަންބޮޑުވާ ކަމަށެވެ.
ޓެރަރިސްޓް ހަމަލާއަށް ފަހު ސަރުކާރުން އަޅާފައިވާ ފިޔަވަޅުތަކާއެކު ނަޝީދަށް ކުރިއަށް ވުރެ ބޮޑަށް މިހާރު ސެކިއުރިޓީ ލިބިވަޑައިގަންނަވާނެ ކަމަށް އިކްރާމު ވިދާޅުވިއިރު އެމަނިކުފާނުގެ ހަށިކޮޅަށް ބޮމުގެ ހަމަލާ ދިން އެތި ފަހަރު، ރާވައި ފަންޑުކުރި ފަރާތްތައް އަދި ހިފިފައި ނުވާ ކަމުގައި ފުލުހުން އިއުތިރާފުވެފައި ވާކަމަށް ގާނޫނީ ޓީމުގެ ބަޔާނުގައި ވަނީ ބުނެފައެވެ.
"ނަޝީދަށް ކުރިމަތި ކުރުވި ހަމަލާއިން އެމަނިކުފާނުގެ ހިމަގޮހޮރަށް ދާންދެން ފޫއަޅުވާލާފައި ވަނިކޮށް، އީދުއަސް ހައްދައިގެން، ހުވަފެން ދައްކައިގެން ރައީސް ނަޝީދު ރާއްޖެ ގެނެވޭތޯ ގަދައެޅުމަކީ، އެމަނިކުފާނުގެ ހައްޓާއި ލެޔަށް ނުރައްކާވާ ގޮތަށް، އެ ނުރައްކަލަށް ހިތްވަރު ދިނުމުގެ ގޮތުން ކުރާ ކަމެއް ކަމުގައި ދެކެމެވެ." ބަޔާނުގައި ބުނެފައިވެއެވެ.
ރައީސް ނަޝީދު ރާއްޖެ ވަޑައިގަތުމުގެ މާހައުލު އޮތީ އަމާންކޮށް ކަމުގައި ދޭހަވާ ގޮތަށް އިކްރާމް ވާހަކަ ދެއްކެވުމަކީ ނަޝީދުގެ ފުރާފުޅަށް މިހާރުވެސް އޮތް ނުރައްކާ ސީރިއަސް ކަމަށް އެއްވެސް ފަރުވާލެއްނެތި ދެއްކެވި ޒިންމާދާރުކަން ކުޑަ ވާހަކައެއް ކަމަށްވެސް ބަޔާނުގައިވެ އެވެ. އަދި އެ ވާހަކަ ތަކަކީ ދިއްގަރު ދާއިރާގެ ރައްޔިތުންގެ ތާއީދު ނެތް ވިޔާނުދާ ވާހަކަތަކެއް ކަމަށްވެސް ބަޔާނުގައި ބުނެފައިވެ އެވެ.
