އިނގިރޭސި ލީގުގައި ފަހަތުން އަރައި ލީޑްސް ޔުނައިޓެޑުން އެވަޓަން މޮޅުވެ ނުދީ ހިފަހައްޓައިފިއެވެ.
އަމިއްލަ ދަނޑުގައި ކުޅުނު މެޗު ލީޑްސް އިން އެއްވަރުކުރީ އެވަޓަންއާ ވާދަކޮށް 2-2 ލަނޑުންނެވެ. ކުލައިވެޓް ލެވިންގެ ޕެނެލްޓީއަކުން އެވަޓަން އިން ލީޑް ނެގިއިރު ފުރަތަމަ ހާފް ނިމުމުގެ ކުރިން ލީޑްސް އިން އެއްވަރުކުރީ ކިލްޗްގެ ލަނޑުންނެވެ. މެޗުގެ ދެވަނަހާފް ފަށައިގެން ފަސް މިނުޓުގެ ތެރޭގައި އެވަޓަންއަށް މެޗުގައި ދެވަނަ ފަހަރަށް ލީޑް ނަގައިދިނީ ގްރޭ ކާމިޔާބުކޮއްދިން ލަނޑުންނެވެ.
މެޗު ނަތީޖާ ލީޑްސް ހަމަހަމަކުރީ 72 ވަނަ މިނިޓުގައި ރަފީނިޔާ ކާމިޔާބުކޮއްދިން ލަނޑުންނެވެ. ރޭގެ މެޗަކީ ވޭތުވެދަ 17 އަހަރު ދުވަހުގެ ތެރޭގައި ލީޑްސްގެ ދަނޑުގައި ކުޅުނު މެޗެއް ބަލަން ސަޕޯޓަރުން ވަދެ ދަނޑު އެއްކޮށް ފުރުނު ފުރަތަމަ ފަހަރެވެ. ރޭގެ މެޗު ބަލަން ލީޑްސް ޔުނައިޓުގެ ދަނޑަށް 36،293 ސަޕޯޓަރުން ވަނީ ކުޅިބަލަން ވަދެފައެވެ.
މި ނަތީޖާއާއެކު ރަފޭލް ބެނިޓޭޒްގެ ކޯޗުކޮއްދޭ އެވަޓަން ލީގުގެ ދެމެޗު ނިންމާލީ ބަލިނުވެއެވެ. ދެމެޗުން ހޯދި ހަތަރު ޕޮއިންޓާއެކު އެވަޓަން އޮތީ ތިންވަނާގައެވެ.
