އިދިކޮޅު ޕްރޮގްރެސިވް ކޯލިޝަނުން އައްޑޫ ސިޓީއަށާއި، ގދ.އަތޮޅުގެ ދެރަށަށް ކުރާ ދަތުރުގައި، އައްޑު ސިޓީއާއިމ ގދ.ގައްދޫ އިން ގިނަ ބަޔަކު އިދިކޮޅު ޕީޕީއެމްއާއި ގުޅިއްޖެއެވެ.
އިދިކޮޅު ޕްރޮގްރެސިވް ކޯލިޝަނުން އަތޮޅުތެރެއަށް ކުރަމުންދާ ދަތުރުތަކުގެ ތެރެއިން ގދ.ގައްދޫއަށް ކުރި ދަތުރުގައި ރޭވަނީ ޚާއްސަ ޖަލްސާއެއްވެސް ބާއްވާފައެވެ. މިޖަލްސާގައި ޕީޕީއެމްގެ ނާއިބް ރައީސް އަދި ގުރަދޫ ދާއިރާގެ މެމްބަރު މުހައްމަދު ޣައްސާން މައުމޫންއާއި، ޕީޕީއެމްގެ ނާއިބް ރައީސް އަހުމަދު ޝިޔާމް މުހައްމަދާއި، ފަރެސްމާތޮޑާ ދާއިރާގެ މެމްބަރު ހުސެއިން މުހައްމަދު ލަތީފް އިތުރުން މުއާޒު މުހައްމަދު ރަޝީދުވެސް ވާހަކަ ދައްކަވާފައިވެއެވެ.
މިޖަލްސާގައިވެސް ޕީޕީއެމްއާއި އަލަށް ގުޅުނު މެމްބަރުން ވަނީ ސޮއިކޮށްފައެވެ. ދެދުވަސް މަތީން ގައްދޫގައި ހަރަކާތްތެރިވި ޕީޕީއެމް ޓީމުންވަނީ ރައްޔިތުންގެ ކައިރިއަށް ގޮސް، ރައްޔިތުންގެ ހުރި ކަންބޮޑުވުން އޮޅުންފިލުވާފައެވެ.
އައްޑޫ ސިޓީއަށް އިދިކޮޅު ޕީޕީއެމްއިން ކުރަމުންދާ ދަތުރުގައިވެސް ގިނަ ބަޔަކު ދަނީ ސޮއިކުރަނުންނެވެ. އޭގެ ތެރޭގައި ކުރިން އެމްޑީޕީގައި ހަރަކާތްތެރިވި މެމްބަރުންނާއި، ޕާޓީއަކާއި ނުގުޅިތިބި ގިނަ ބަޔަކުވެސް ހިމެނެއެވެ.
ޕީޕީއެމްގެ ޓީމުތަކުން އަތޮޅުތަކަށް ކުރަމުން ގެންދާ މިދަތުރުތަކުގައި ކުރިއަށް އޮތް ރިޔާސީ އިންތިހާބަށް އެ ޕާޓީން އެކުލަވާލާ މެނިފެސްޓޯ އަށް ރައްޔިތުންގެ ހިޔާލު ހޯދުމަށްވެސް ނިންމާފައިވެއެވެ. މީގެއިތުރުން ޕީޕީއެމްގެ ރައީސް އަދި ކުރީގެ ރައީސް އަބްދުﷲ ޔާމީން މިނިވަންކުރުމަށް ޕީޕީއެމުން ކުރާ މަސައްކަތްތައް އިތުރަށް ވަރުގަދަކުރުމަށް ރައްޔިތުންގެ އެހީތެރިކަމަށް އެދުމަށްވެސް ނިންމާފައިވެއެވެ.
