ރާއްޖޭގެ އެންމެ ބޮޑު އެއް ސުޕަރމާކެޓް، ރެޑްވޭވުން ކޮންމެ ހަފްތާ ބަންދަކާ ދިމާކޮށް ޚާއްސަ ސޭލެއް ފަށައިފިއެވެ.
19 އޮގަސްޓުން ފެށިގެން 19 ސެޕްޓެމްބަރަށް ކުރިއަށް ގެންދާ މި ސޭލުގައި ތަރުކާރީ، މޭވާ، ކުކުޅު އަދި ފްރޯޒަން ފުޑްސްގެ ބާވަތްތަކުން 5 އިންސައްތަ އާއި 20 އިންސައްތަ އާ ދެމެދުގެ ޑިސްކައުންޓެއް ލިބިގެންދާނެކަމަށް ރެޑްވޭވުން މައުލޫމާތުދެއެވެ.
މި ސޭލްގެ ތެރެއިން ކުރިއަށްއޮތް މަސްދުވަހު ކޮންމެ ބުރާސްފަތި ދުވަހުގެ ހަވީރު 16:00 ން 23:00 އަށް އަދި ހުކުރު ދުވަހުގެ ހެނދުނު 08:00 ން 11:00 އާ ދެމެދު ރެޑްވޭވްގެ ސުޕަރމާކެޓް ފިހާރަތަކުން ވިޔަފާރުކުރާ ފަރާތްތަކަށް ޑިސްކައުންޓް ލިބޭނެ ކަމަށް އެކުންފުނިން ބުނެއެވެ. މިއީ ގިނަ އަދަދެއްގެ ކަސްޓަމަރުން ހަފްތާ ބަންދުގައި ކުރާ ވިޔަފާރިއަށް ލިބިގެންދާނެ ލުޔެއްކަމުގައި ރެޑްވޭވުން ދެކެއެވެ.
ދުނިޔޭގެ އިގްތިޞާދީ ހާލަތު ދަށްވެ، ރައްޔިތުންގެ މާލީ ހާލަތަށްވެސް ނޭދެވޭ ބަދަލެއް އައިސްފައިވާ މި ދަނޑިވަޅުގައި ރެޑްވޭވުން މަސއްކަތްކުރަނީ ކަސްޓަމަރުންނަށް އެކަށިގެންވާ ހެޔޮއަގެއްގައި ތަކެތި ފޯރުކޮށްދިނުމަށް ކަމަށް އެކުންފުނިން ބުންޏެވެ. އެގޮތުން މި ފަދަ ސޭލްތަކާއި ޕްރޮމޯޝަންތައް ގިނަގިނައިން ކުރިއަށްގެންދާނެކަމަށް އެކުންފުނިން މައުލޫމާތު ދެއެވެ.
