އިދިކޮޅު ޕްރޮގްރެސިވް ކޯލިޝަނުން އަތޮޅު ތެރެއަށް ކުރަމުންދާ ދަތުރުތަކުގެ ތެރެއިން ހުވަދު އަތޮޅަށާއި، އައްޑޫ ސިޓީއަށް ކުރާ ދަތުރު މިއަދު ފަށައިފިއެވެ.
ދަތުރަށް ފުރުމުގެ ކުރިން ޕީޕީއެމްގެ ލީޑަރޝިޕްގެ ބޭފުޅުންވަނީ މިޑިޔާތަކާއި ބައްދަލުކޮށްފައެވެ. ޕްރެސްގައި ވާހަކަ ދައްކަވަމުން ޕީޕީއެމްގެ ނާއިބް ރައީސް އަހުމަދު ޝިޔާމް ވިދާޅުވީ މިދަތުރުގެ ބޭނުމަކީ ރައްޔިތުންގެ އަޑު ކައިރިންް އޮޅުން ފިލުވައި، ރައްޔިތުންނާއި ގާތުން ބައްދަލުކުރުންކަމަށެވެ. އަދި މިދަތުރުގައި ދެ އަތޮޅުން ގިނަ ބަޔަކު ޕީޕީއެމްއާއި ގުޅުމަށް ޝައުގުވެރިވެފައިވާތީ ޕާޓީއަށް މެމްބަރުން ސޮއިކުރުމުގެ ހަރަކާތްތައްވެސް ކުރިއަށް ދާނެކަމަށެވެ.
ޝިޔާމް ވިދާޅުވީ އައްޑޫ ސިޓީއާއި، ހުވަދު އަތޮޅަކީ ސަރުކާރުން ވަރަށް ބޮޑަށް އަޅާނުލައި ދޫކޮށްލާފައިވާ ދެ އަތޮޅުކަމަށެވެ. އަދި ތަރައްޤީގެ ނަމުގައި ރައްޔިތުންނަށް ކުލަ ހުވަފެން ދައިގެން މިސަރުކާރުންވަނީ ބޮޑެތި އޮޅުވާލުންތަކެއް އޮޅުވާލާފައިކަމަށެވެ.
ޝިޔާމް ވިދާޅުވީ ގދ. އަށް ދަތުރުކުރާ ޕީޕީއެމްގެ ޓީމުން އެ އަތޮޅުގެ ދެ ދާއިރާ އަކަށް ދަތުރު ކުރާނެ ކަމަށެވެ. އެގޮތުން މިފަހަރު ދަތުކުރާނީ ގައްދޫ އާއި ފަރެސްމާތޮޑާ ދާއިރާ ކަމުގައި ވިދާޅުވި އެވެ. އަދި އައްޑޫއަށް ދަތުުރުކުރާ ޕީޕީއެމްގެ ޓީމުގައި ހިމެނޭ ބޭފުޅުން އެ ސިޓީގެ ހުރިހާ ރަށަކަށް ވަޑައިގަންނަވާނެ ކަމުގައިވެސް ވިދާޅުވިއެވެ.
ޕީޕީއެމްގެ ޓީމުތަކުން އަތޮޅުތަކަށް ކުރަމުން ގެންދާ މިދަތުރުތަކުގައި ކުރިއަށް އޮތް ރިޔާސީ އިންތިހާބަށް އެ ޕާޓީން އެކުލަވާލާ މެނިފެސްޓޯ އަށް ރައްޔިތުންގެ ހިޔާލު ހޯދުމަށްވެސް ނިންމާފައިވެއެވެ. މީގެއިތުރުން ޕީޕީއެމްގެ ރައީސް އަދި ކުރީގެ ރައީސް އަބްދުﷲ ޔާމީން މިނިވަންކުރުމަށް ޕީޕީއެމުން ކުރާ މަސައްކަތްތައް އިތުރަށް ވަރުގަދަކުރުމަށް ރައްޔިތުންގެ އެހީތެރިކަމަށް އެދުމަށްވެސް ނިންމާފައިވެއެވެ.
