ޕާކިސްތާނުގެ ހުޅަގު ދެކުނުގެ ސިޓީއެއްކަމުގައިވާ ޕެޝާވަރުގައި ހުންނަ ދީނީ މަދަރުސާއެއްގައި ބޮމެއް ގޮއްވާލާ އެތައްބަޔަކު މަރާލައިފިއެވެ.
މައުލޫމާތި ލިބޭގޮތުގައި މި ހަމަލާގައި މިހާތަނަށް އައިއިރު 7 މީހަކު މަރުވެ 70 އަށްވުރެ ގިނަ މީހުންވަނީ ޒަޚަމް ވެފައެވެ. މަރުވި މީހުންގެ ތެރޭގައި ގިނައީ ކުޑަކުދިންނެވެ.
ޕާކިސްތާނުގެ ފުލުހުން މައުލޫމާތު ދޭގޮތުގައި ބޮން ގޮއްވާލާފައިވަނީ އަންގާރަ ދުވަހުގެ ހެދުނު 8:30ގައި ޕެޝާވަރު އަވަށުގައި ހުންނަ ސްޕީން ޖަމާތު މިސްކިތުގައެވެ. މި މިސްކިތަކީ ދިނީ މަދަރުސާއެއްގެ ގޮތުގައިވެސް ބޭނުން ކުރެވެމުން އަންނަ މިސްކިތެކެވެ.
ނަން ނުޖެހުމަށް ޝަރުތުކޮށް ޕާކިސްތާނު ފުލުހަކު އަލްޖަޒީރާއަށް މައުލޫމާތު ދީފައިވާ ގޮތުގައި، މި ހަމަލާއަކީ ޖާނުން ފިދާވެގެން ދީފައިވާ ހަމަލާއެއް ނޫނެވެ. އޭނާ މަޢުލޫމާތު ދީފައިވާ ގޮތުގައި ބޮން ގޮއްވާލާފައިވަނީ ދަބަހަކަށް ގޮވާ ތަކެތި އަޅާފައި، ދަބަސް މިސްކިތުގެ ތެރޭގައި ބަހައްޓައިގެންނެވެ. ހަމަލާއަށްފަހު އާންމު ވެގެންދިޔަ ވީޑިއޯ ފޫޓޭޖްތަކުން ހާމަވާ ގޮތުގައި މިގޮވުމުގެ ސަބަބުން މިސްކުތުގެ ނަމާދުކުރާ ބަޔަށް ވަނީ ބޮޑެތި ގެއްލުންތަކެއް ލިބިފައެވެ.
ޕާކިސްތާނުގެ ހެލްތު މިނިސްޓްރީން ހާމަކޮށްފައިވާ ގޮތުގައި މިހަމަލާގައި ޒަޚަމްވި ފަރާތްތަކަށް ޕެޝާވަރުގެ މައި ހޮސްޕިޓަލުގައި މިހާރު ދަނީ ފަރުވާ ދެވެމުންނެވެ.
ޕާކިސްތާނަކީ ފާއިތުވެދިޔަ ތަނުގައި ދީނީގޮތުން ހައްދުފަހަނަ އަޅާފައިވާ ފަރާތްތަކުން ޓެރަރިސްޓް އެތަކެއް ހަމަލާތަކެއް ދީފައިވާ ގައުމެކެވެ. އަދި އަލްގައިދާގެ ވެރިޔާ އުސާމާ ބިންލާދިން އެތައް އަހަރެއްވަންދެން ފިލައިގެން ދިރިއުޅެފައި ވަނީވެސް ޕާކިސްތާނުގައެވެ. އަދި އަލްގައިދާއާއި ދެކޮޅަށް އެމެރިކާއިން ކުރި ހަގުރާމައިގައި އެގައުމަށް އެންމެ ބޮޑު އެހީތެރިކަމެއް ފޯރުކޮށްދީފައިވާ އެއް ގައުމަކީވެސް ޕާކިސްތާނެވެ.
