މާލޭ ލޮނުޒިޔާރާތްކޮޅު އަޑި ޕާކުގެ ސަރަހައްދުގައި މާލޭ ސިޓީ ކައުންސިލުން ތަރައްގީ ކޮށްފައިވާ ޕާކްގެ މައްސަލައަކާއި ގުޅިގެން ދައުވާ އުފުލާފައިވާ މާލެ ސިޓީގެ ކުރީގެ މޭޔަރު ސިފާ މުހައްމަށް އެމްޑީޕީގެ އެތެރޭގެ އިންތިޚާބުގައި ވާދަކުރެވި، މިނިސްޓަރ މަހުލޫފްއާއި، އަކްރަމް ކަމާލުއްދީނަށް ވާދަނުކުރެވޭ ގޮތަށް ނިންމައިފިއެވެ.

އެމްޑީޕީގެ ދާއިރާތަކުގެ އިންތިހާބުގައި ވާދަކުރެވޭނެ މީހުންގެ ލިސްޓު ރޭވަނީ އާންމުކޮށްފައެވެ. ލިސްޓުގައި މަހުލޫފްއާއި، އަކްރަމް ކަމާލުއްދީނުގެ ނަންވަނީ އުނިކޮށްފައެވެ.

އެމްޑީޕީގެ ގައުމީ މަޖިލީހުން ނިންމާފައިވާ ގޮތުން އެ ޕާޓީގެ އެތެރޭގެ އިންތިހާބުގައި ބައިވެރިވެވޭނީ ވަކި ކަހަލަ ކަމަކުން ބަރީއަވެފައިވާ މީހުންނަށެވެ. އޭގެ ތެރޭގައި ހިމެނެނީ އެމްއެމްޕީއާރުސީގެ ހިޔާނާތާ ގުޅިގެން އޭސީސީން ތައްޔާރު ކޮށްފައިވާ ރިޕޯޓެއްގައި ފިޔަވަޅު އަޅައި ދިނުމަށް އެދި އެކިއެކި މުއައްސަސާތަކަށް ނަން ފޮނުވާފައިވާ މީހުންނާއި ކޮރަޕްޝަނާއި ހިޔާނާތާއި ގެއްލުވާލާފައިވާ މީހުންނާއި މަރާލާފައިވާ މީހުންގެ މައްސަލަތައް ބަލަން ރައީސް އިބްރާހިމް މުހައްމަދު ސޯލިހު އުފައްދާފައިވާ ރިޔާސީ ކޮމިޝަނުން ނެރެފައިވާ ރިޕޯޓެއްގައި ކުށެއް ކުރުމުގައި ބައިވެރިވެފައިވާ ކަމަށް ބަޔާން ކޮށްފައިވާ މީހުންނާއި މީހަކު މެރުމާއި ރޭޕްކުރުމާއި ކުޑަކުދިންނަށް ޖިންސީ ގޯނާކުރުމުގެ ކުށެއް ކޮށްފައިވާ މީހުންނެވެ.

ކޮރަޕްޝަންގެ ތުހުމަތު ކުރެވޭ މީހުންނަށް ވާދަނުކުރެވޭނެކަމަށް ޤައުމީ މަޖިލީހުން ނިންމާފައިވާއިރު، މާލެ ސިޓީގެ ރައީސްކަމަށް ވާދަކުރައްވާ ސިފާ މުހައްމަދަކީވެސް ކޮރަޕްޝަންގެ ތުހުމަތުގައި ދައުވާ ކޮށް ދިނުމަށް އޭސީސީން ޕީޖީއަށް ފޮނުވިފައިވާ ބޭފުޅެކެވެ.

ސިފާގެ މައްޗަށް ދައުވާ ކުރަނީ، ހާމަކަންބޮޑު ދެފުންފެންނަ އުޞޫލެއް ނެތި، އެއްބަސްވުމެއް އަދި ލިޔެކިޔުމެއް ނެތި، އަމީން ކޮންސްޓްރަކްޝަނާ، މަސައްކަތް ޙަވާލުކޮށް ކުރުވުމާއި، ހިލޭ އެހީގެ ހުށަހެޅުމެއް ލިބިފައި އޮއްވައި އެކަން ހިއްސާކުރަންޖެހޭ ފަރާތްތަކާ ޙިއްސާކޮށްފައި ނުވާތީކަމަށް އޭސީސީން ވިދާޅުވެއެވެ. އަދި ލިޔެކިޔުމެއް ނެތި އަމީން ކޮންސްޓްރަކްޝަނާ މަސައްކަތް ޙަވާލުކޮށް އެކުންފުނިން ޢަމަލީގޮތުން 2 ފާޚާނާބަރީގެ މަސައްކަތް ފެށިފަހުންވެސް ކައުންސިލްގެ އިދާރާގެ ބަޖެޓްގެ ތެރެއިން ބިޑް ކޮމިޓީ މެދުވެރިކޮށް މަސައްކަތް ޙަވާލުކުރާނެ ފަރާތެއް ކަނޑައެޅުމަށް މާލޭ ސިޓީގެ މޭޔަރ ސިފާ މުޙައްމަދު މަސައްކަތްކޮށްފައިވުމާއިއެކު ސިފާ އެފަދައިން ޢަމަލުކޮށްފައިވަނީ، އަމީން ކޮންސްޓްރަކްޝަން ޕވޓ. ލޓޑ.އަށް ނާޖާއިޒު މަންފާއެއް ހޯދައިދިނުމުގެ ނިޔަތުގައިކަން ތަޙުޤީޤަށް ލިބިފައިހުރި ހެކިތަކުން އެނގެން އޮތުމާއެކުކަމަށް އޭސީސީން ވަނީ ވިދާޅުވެފައެވެ.

އެމްޑީޕީން މަހްލޫފަށާއި އަކްރަމަށް އިއްޔެ ފޮނުވި ސިޓީއެއްގައި ބުނީ އެ ދެ ބޭފުޅުންގެ މައްސަލައެއް ބަލަމުން އަންނަ ކަމަށް އޭސީސީން ބުނެފައިވާ ކަމަށެވެ. އެހެންވެ، އެ ބޭފުޅުން އިންތިހާބަށް ޝަރުތު ހަމަނުވާ ކަމަށް ކަނޑައަޅައި ކެންޑިޑޭޓުންގެ ލިސްޓުން އުނިކޮށްފައިވާ ކަމަށް އެމްޑީޕީގެ ސެކްރެޓަރީ ޖެނެރަލް ޝާޒްލީ ޝަފީގް ސޮއިކުރައްވާފައިވާ ސިޓީގައި ވެއެވެ.

އެމްޑީޕީގެ ދާއިރާތަކުގެ އިންތިހާބުގައި ވާދަކުރުމުގެ ފުރުސަތު މިދިޔަ އޭޕްރީލް 24 ގައި ހުޅުވައިލުމާ ގުޅިގެން ކުރިމަތިލި މީހުންގެ ތެރެއިން ޝަރުތު ހަމަވާ ކެންޑިޑޭޓުންގެ ލިސްޓު އިއްޔެ ވަނީ އާންމުކޮށްފައެވެ.