މަޖިލިސް ރައީސް މުހައްމަދު ނަޝީދު ރާއްޖެ ވަޑައި ނުގަންނަވަނީ ޖާނުން ފިދާވެގެންވެސް ހަމަލަދީފާނެ ކަމުގެ އިންޒާރު ލިބޭތީ ކަމުގައި ރައްޔިތުންގެ މަޖިލީހުގެ ބިލެތްދޫ ދާއިރާގެ މެމްބަރު މުހައްމަދު ހަލީމް (ދޮންބިލޭ) ވިދާޅުވެއްޖެއެވެ.
މަޖިލީހުގެ މިއަދުގެ ޖަލްސާގައި އޮތް ބަހުސްގެ މަރުހަލާގައި މަޑުއްވަރީ ދާއިރާގެ މެމްބަރު އާދަމް ޝަރީފް، ރައީސް ނަޝީދު ރާއްޖެއަށް ވަޑައިނުގެންނެވި ހުންނެނި ހާލަތާއި ގުޅޭގޮތުން ދެއްކެވި ވާހަތަކާއިގުޅުން ނިޒާމީ ނުކުރާ ތަންނަވައި، ދޮންބިލޭ ވިދާޅުވީ ރައީސް ނަޝީދު ރާއްޖެ ވަޑައި ނުގެންނެވި ހުންނެވީ ރާއްޖެއިން ކުރަންޖެހޭ ބޭސްފަރުވާ ކުރެވެމުން ނޫންކަމަށެވެ.
ރައީސް ނަޝީދު ރާއްޖެ ވަޑައި ނުގަންނަވަނީ މިހާރުވެސް އެމަނިކުފާނަށް އެކި ގޮތްގޮތުން އިންޒާރުދީ، ޖާނުން ފިދާވުމުގެ ހަމަލާވެސް ދީފާނެ ކަމުގެ ނުރައްކާތެރިކަން އޮތުމުންކަމަށެވެ. މިނުރައްކަލީ މިއަދު އޮތް ބޮޑު ނުރައްކަލެއްކަން ސާފުކޮށް އެގިވަޑައި ގަންނަވާއިރު، އެމަނިކުފާނު ރާއްޖެ ވަޑައި ނުގަންނަވަނީ އަދިވެސް ބޮޑެތި އިންޒާރުތަކެއް ލިބޭތީ ކަމަށް ދޮންބިލޭ ވިދާޅުވިއެވެ.
މިވަގުތު ވަޑައިނުގެން އެހުންނެވީ އެމަނިކުފާނު އަވަހާރަ ކޮށްލަން، އެހަމަލާދިން މީހުން އަދިވެސް މަގުމަތީގައި ދޫވެފައި ތިބީމައާއި، އަދި މިހާރުވެސް އެމަނިކުފާނަށް ކެނޑިނޭޅި ޖާނުން ފިދާވުމުގެ ހަމަލާއެއް ދީފާނެ ކަމުގެ އިންޒާރު އަންނަމުންދާތީއާއި، އޭގެ މައުލޫމާތު ވަރަށް ރަނގަޅަށް ލިބޭތީ، އަދިވެސް އެމަނިކުފާނު ރާއްޖެ ވަޑައިގެން ސަލާމަތާއި ރައްކާތެރިކަން، ފެންނާތީ މަޑުކޮށްލައިގެން އެހުންނެވީ.
– ދޮންބިލޭ ވިދާޅުވިއެވެ.
6 މެއި ގައި ރައީސް ނަޝީދަށް ދެވުނު ހަމަލާއާއި ގުޅިގެން ތަހުގީގް ނިންމައި ހަމަލާގައި ބައިވެރިވި އެންމެން ހައްޔަރުކޮށް ތަހުގީގް ނިމުމުން ނޫނީ ރާއްޖެ ވަޑައި ނުގަތުމަށް މަޖިލިސް ރައީސް، ރައީސް ނަޝީދު ވަނީ ނިންމާފައެވެ. ރައީސް ވަނީ އެމަނިކުފާނަށް ދެވެނު ހަމަލާގެ ތަހުގީގް ނިމި އެހަމަލާއަށް ފަންޑު ކުރި މީހުންނާއި، ހަމަލާގައި ބައިވެރިވި އެންމެންގެ މައްސަލަތައް ތަހުގީގް ކުރެވުމުން ނޫނީ ރާއްޖެ ވަޑައިގަތުމަކީ އެމަނިކުފާނުގެ އާއިލާއާއި ހެޔޮއެދޭ އެތައް ބަޔަކު އެދޭ ގޮތެއް ނޫންކަމަށެވެ.
މަޖިލިސް ރައީސް ވަނީ މަޖިލީހުގެ ކިބައިން ޗުއްޓީގެ މުއްދަތު އިތުރުކޮށްދެއްވައި، ރާއްޖެއިން ބޭރުގައި ދިރިއުޅުމަށް ހިތް ޚަލާޞްކުރައްވައި، އެފުރުސަތު ފަހިކޮށްދެއްވުމަށް އެދިފައެވެ. އަދި ރާއްޖެއިން ބޭރުގައި ހުންނައިރު މަޖިލީހުގެ އެންމެހައި ކަންކަން ޤާނޫނުއަސާސީ އާއި މަޖިލީހުގެ ގަވާއިދުގައިވާ ގޮތުގެމަތިން މަޖިލީހުގެ މެންބަރުންގެ އިރުޝާދުގެ ދަށުން މަޖިލީހުގެ ނައިބު ރައީސް އިސްވެ ހުންނަވައި މަޖިލީހުގެ އިދާރާއިން ހިންގާނެކަމީ ހިތުގައި އެއްވެސް ޝައްކެއް އުފެދޭކަމެއްނޫންކަމަށް ވަނީ ވިދާޅުވެފައެވެ.
ރާއްޖެއިން ބޭރުގައި ހުންނައިރު ރައްޔިތުންގެ މަޖިލީހަށާއި ދިވެހި ދައުލަތަށް ޚިދުމަތްކުރުމުގައި މަސައްކަތް ކުރިއަށް ގެންދާނެކަމަށާއި، ޚާއްޞަ ގޮތެއްގައި އިންޓަރޕާލަމެންޓަރީ ޔޫނިއަންއާއި، ކޮމަންވެލްތް ޕާލިމަންޓަރީ އެސޯސިއޭޝަން މެދުވެރިކޮށް ހިންގާ މަސައްކަތްތަކާއި މޫސުމަށް އަންނަ ބަދަލުތަކާ ގުޅޭގޮތުން ކްލައިމެޓް ވަލްނަރަބްލް ފޯރަމްއާއެކު މަސައްކަތްތައް ކުރިއަށް ގެންދާނެ ކަމަށް މަޖިލިސް ރައީސް ވަނީ ވިދާޅުވެފައެވެ.
