އިދިކޮޅު ޕްރޮގްރެސިވް ކޯލިޝަނާއި އަލަށް ގުޅުނު 600 މީހުން ފޯމް އެޕާޓީއާއި ހަވާލުކޮށްފިއެވެ.
މިރޭ ޕީޕީއެމް ޕީއެންސީން ބޭއްވި ޖަލްސާގައި ހއ.އަތޮޅުގެ 6 ރަށުގައި އަދި ހދ.އ ހަނިމާދޫގައި ކުރިއަށްދިޔަ މަވެސް ޕީޕީއެމް މެމްބަރޝިޕް ޑްރައިވް ހަރަކާތުގައި ޕީޕީއެމްއަށް އަލަށް ގުޅުނު 600 ފޯމް ވަނީ އިދިކޮޅު ކޯލިޝަން ހިންގުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުﷲ އާއި ހަވާލު ކޮށްފައެވެ.
އަބްދުއްރަހީމްއާއި، ފޯމް ހަވާލު ކުރެއްވީ ހއ.އަތޮޅަށް ކުރި ދަތުރުގައި އިސްކޮށް ހަރަކާތްތެރިވި، ޕީއެންސީގެ ނާއިބް ރައީސް އިބްރާހިމް ޝުޖާއާއި، ދިއްދޫ ދާއިރާގެ ކުރީގެ މެމްބަރު މުހައްމަދު ލަތީފްއެވެ.
ޕީޕީއެމްއިން ދަނީ އެޕާޓީއަށް މެމްބަރުން އިތުރުކޮށް، އަތޮޅުތެރޭގައި ތިބި މެމްބަރުންގެ ކައިރިއަށް ޚާއްސަ ދަތުރުތަކެއް ކުރަމުންނެވެ. ފޯމުތަކާއި ހަވާލުވުމަށްފަހު ވާހަކަ ދައްކަވަމުން އަބްދުއްރަހީމް ވިދާޅުވީ ގިނަ ބަޔަކު ޕީޕީއެމްއާއި ގުޅެމުންދަނީ އުންމީދު އޮތީ ޕީޕީއެމްގައި ކަމަށް ކަށަވަރު ވުމުންކަމަށެވެ. މިއަދު އޮތް ސަރުކާރާއިމެދު ރައްޔިތުން އިތުބާރު ގެއްލި ނާއުންމީދު ވެފައިވާއިރު، ރައްޔިތުންތިބީ ވެރިކަން ބަދަލުވާނެ ދުވަހެއްގެ އިންތިޒާރުގައި ކަމަށް އަބްދުއްރަހީމް ވިދާޅުވިއެވެ.
އޭނާ ވިދާޅުވީ ސިޔާސީ ގޮތުން ޚިދުމަތް ކުރަން ކަމަށްބުނެ ޕާޓީތައް ހެދިޔަސް ރައްޔިތުންނަށް ޚިދުމަތެއް ނުދެވޭނެކަމަށެވެ. ރާއްޖެ ވިއްކާލުމަށާއި، މިވަންކަމަށް ބުރޫއަރާފަދަ އެތައް ކަމެއް މިއަދު ރާއްޖޭގައި ހިނގަމުންދާއިރު، އެކަންކަމާއި ދެކޮޅަށް ބަސްބުނަން ނުކެރޭ މީހުން ސިޔާސީ ޕާޓީހެދުމަކީ ރައްޔިތުން ބަލައި ގަންނަ ކަމެއް ނޫންކަމަށް އަބްދުއްރަހީމް ވިދާޅުވިއެވެ.
