ސޮނީ ޓީީވީން ގެނެސްދޭ ކާމިޔާބު ރިއަލިޓީ ޝޯވް "އިންޑިއަން އައިޑަލް"ގެ 12 ވަނަ ސީޒަންގެ ޓްރޮފީ ޕަވަންދީޕް ރާޖަން އުފުލާލައިފިއެވެ.
މިއީ ވަރަށް ގިނަ ބަޔަކު ތާއީދު ކުރި ލަވަ ކިއުންތެރިއެކެވެ. އަދި ޕަވަންދީޕަށް މިފަހަރުގެ ޝޯވް ކާމިޔާބު ކުރެވޭނެކަމުގެ ވަރަށް ބޮޑު ޔަގީން ކަމެއް އޭނައަށް ސަޕޯޓްކުރާ މީހުން ވަނީ ދީފައިއެވެ. މި ޝޯވް އިން އެއްވަނަ ލިބުމުން ޓްރޮފީ އާއި އެކު ކާރަކާއި 25 ލައްކަ ރުޕީސް އޭނާއަށް ވަނީ ލިބިފައެވެ.
އުތުރާކަންދަށް އުފަން 25 އަހަރުގެ ޕަވަންދީޕަކީ ހުރިހާވައްތަރެއްގެ ލަވައެއްވެސް ވަރަށް މޮޅަށް ކިޔާ، ހިތްގައިމު އަޑެއްގެ ވެރިއެކެވެ.
View this post on Instagram
ޕަވަންދީޕާ އެކު ޖުމްލަ ހަ ބައިވެރިޔަކު ފިނާލޭގައި ވާދަކުރިއެވެ. އެއީ ދެވަނަ ލިބުނު އަރުނީތާ ކަންޖީލާލްގެ އިތުރުން ސަޔިލީ ކަމްބްލޭއާއި، މުހައްމަދު ދާނިޝްއާއި، ޝަންމުކަޕްރިޔާ އަދި ނިހާލް ތައުރޯ އެވެ.
ފިނާލާ ޝޯވް ސޮނީއިން ވަނީ އިއްޔެ މެންދުރު 12 އިން ދަންވަރު 12 އަށް ކުރިއަށް ގެންގޮސްފައެވެ. މިއީ މިހާ ދިގުކޮށް އައިޑަލްގެ ފިނާލޭ ބޭއްވި ފުރަތަމަ ފަހަރެވެ.
ފިނާލޭގައި އިންޑިއާގެ މަޝްހޫރު ގިނަ ތަރިންނާއި ލަވަކިއުންތެރިންވަނީ ބައިވެރިވެފައެވެ.
