ނޫމަޑި ރިސޯޓްސް އެންޑް ރެސިޑެންސް މައްސަލާގައި މާލެ ސިޓީގެ މޭޔަރު ޑރ. މުޙައްމަދު މުއިއްޒުގެ މައްޗަށް ދައުލަތުން އުފުލާފައިވާ ދައުވާއަށް އިންކާރުކުރައްވައިފިއެވެ.
މި މައްސަލައިގައި ދައުލަތުގެ ފަރާތުން މުއިއްޒުގެ މައްޗަށް އުފުލާފައި ވަނީ ދޮގު ބަޔާން ދިނުމުގެ ކުށުގެ ދައުވާ އެވެ.
އެގޮތުން ޑރ. މުއިއްޒުގެ މައްޗަށް ކުރާ ދައުވާގައި ބުނެފައިވަނީ ހައުސިން ޔުނިޓް މަޝްރޫއާ ގުޅިގެން ނޫމަޑިއާއެކު ދިވެހި ސަރުކާރުން 2011 ވަނަ އަހަރު ވެފައިވާ ފޭސް އެކެއްގެ އެއްބަސްވުމާއި 2013 ގައި ވެފައިވާ ފޭސް ދޭއްގެ އެއްބަސްވުމުގެ މަސައްކަތް އެކުންފުނިން ޝެޑިއުލާއި އެއްގޮތަށް ލަސްތަކެއް ނުވެ ކުރަމުން ގެންދިޔަ ކަމަށާއި، ނޫމަޑިއަށް ލަގްޒަރީ ވިލާ އެޅުމަށް ދިވެހި ސަރުކާރުން ދޫކޮށްފައިވާ ޅ. ދިއްފުށިމާދޫ ސަރުކާރުގެ ބޭނުމަށް ނެގުމުގެ މަޝްވަރާގައި ބައިވެރިވެފައި ނުވާ ކަމަށް ބުނެ، ދޮގު ބާޔަނެއް ދީފައިވާ ކަމަށެވެ.
ކްރިމިނަލް ކޯޓުގައި މިއަދު ބޭއްވި އަޑުއެހުމުގައި، މުއިއްޒުގެ ފަރާތުން ދިފާއީ ވަކީލުންގެ ޓީމުން ވަނީ ދައުވާ ސާފުނުވާކަމަށް ބުނެ ދައުލަތަށް ގިނަ ސުވާލުތަކެއް ކުރިމަތި ކުރުވާފައެވެ. މީގެއިތުރުން މުއިއްޒުގެ ފަރާތުން ދައުވާތަކަށް ޖަވާބުދާރީވަމުން ވަކީލުންގެ ޓީމުން ވަނީ މުޅި ދައުވާއަށާއި އޭގައި ހިމެނޭ ވަކިވަކި ކަންކަމަށް ވެސް މުއިއްޒު އިންކާރު ކުރައްވާ ކަމަށް ވިދާޅުވެފައެވެ. އެގޮތުން ނޫމަޑި މައްސަލާގައި އެއްވެސް ބަޔާނެއް ދީފައިނުވާނެ ކަމަށާއި އެ މަޝްރޫއުއާ ގުޅޭ މަޝްވަރާއެއްގައި ވެސް ބައިވެރިވެފައިނުވާނެ ކަމަށް ވަކީލުން ވިދާޅުވިއެވެ.
މައްސަލަ ކުރިއަށް ގެންދަވަން ގާޒީ ނިންމެވީ ޝަރީއަތުގެ ކުރިން ހުށަހަޅާ ހުށަހެޅުންތައް، ހުށަހަޅައި އެއާ މެދު ގޮތެއް ކަނޑައެޅުމަށްފަހުއެވެ. އެހެންކަމުން ހުށަހެޅުންތައް ހުށަހަޅަން 15 ދުވަހުގެ މުއްދަތެއް ވަނީ ދީފައެވެ. އަދި މައްސަލައިގެ އަޑުއެހުމެއް ސެޕްޓޭމްބަރު 20 ވަނަ ދުވަހުގެ 13:30ގައި ބާއްވައި، އެ އަޑުއެހުމުގައި ހުށަހެޅުންތަކާ މެދު ގޮތެއް ނިންމަވާނެ ކަމަށް ގާޒީ ވިދާޅުވިއެވެ.
ރަސްމީ ދަތުރުފުޅެއްގައި ރާއްޖެއިން ބޭރަށް ވަޑައިގަތުމުގެ ހުއްދައަށް މުއިއްޒު އެދިފައި ވާތީ އެކަމަށް ވެސް ކޯޓުން މިއަދު ވަނީ ގޮތެއް ނިންމާފަ އެވެ. އެގޮތުން އަންނަ މަހުގެ 10 ވަނަ ދުވަހުން 18 ވަނަ ދުވަހަށް ރަސްމީ ދަތުރުފުޅެއްގައި ރާއްޖެއިން ބޭރަށް ވަޑައިގަތުމަށް ކޯޓުން ވަނީ ހުއްދަ ދީފައެވެ.
ނޫމަޑިއާއެކު އެއްބަސްވެފައިވަނީ އެކި ރަށްތަކުގައި 1100 ހައުސިން ޔުނިޓް އެޅުމަށެވެ. މި އެއްބަސްވުން އެއްވެސް ސަބަބެއްނެތި ކުރީގެ ސަރުކާރުން އުވާލުމާއި ގުޅިގެން އެއްބަސްވުން ބާޠިލްކުރި މައްސަލަ ސިންގަޕޫރުގެ އާބިޓްރޭޝަނަށް 2017ވަނަ އަހަރުވަނީ ހުށަހަޅާފައެވެ. ނެދަލޭންޑްސްގެ ދަ ހޭގްގައި ހުންނަ ޕާމަނަންޓް ކޯޓް އޮފް އާބިޓްރޭޝަނަށް ނޫމަޑިން ހުށަހެޅީ 2.3 ބިލިއަން ރުފިޔާ އާއި އާބިޓްރޭޝަނާގުޅޭ އެހެން ޚަރަދުތައް ހޯދުމަށެވެ.
އެކި ރަށްތަކުގައި 1100 ހައުސިން ޔުނިޓް އެޅުމަށް ނޫމަޑިއާއެކު ހެދި އެއްބަސްވުން، ކުރީގެ ރައީސް އަބްދުﷲ ޔާމީންގެ ސަރުކާރުގައި ބާޠިލްކުރި މައްސަލާގައި ބަދަލުގެ ގޮތުގައި އެކުންފުންޏަށް 155 މިލިއަން ޑޮލަރު ހޯދަން ނޫމަޑިން އާބިޓްރޭޝަނަށް ހުށަހެޅުމުން ސަރުކާރުން ވަނީ އާބިޓްރޭޝަނުން ބޭރުގައި މަޝްވަރާކޮށް، ބަދަލުގެ ގޮތުގައި 55 މިލިއަން ޑޮލަރު ނޫމަޑިއަށް ދީފައެވެ.
