މަސްތުވާތަކެތީގެ ސަޕްލައި މަދު ކުރުމުގެ މަސައްކަތް ކާމިޔާބު ކުރެވެނީ މަސްތުވާތަކެތީގެ ވިޔަފާރިކުރާ މީހުންނަށް މިސަރުކާރުން ސިޔާސީ ހިމާޔާތް ނުދޭތީ ކަމުގައި ހޯމް މިނިސްޓަރ އިމްރާން އަބްދުﷲ ވިދާޅުވެއްޖެ އެވެ.
އައްޑޫ ސިޓީގައި ފުލުހުން ކުރިއަށްގެންދިޔަ ޚާއްސަ އޮޕަރޭޝަނެއްގައި 80 ކިލޯގެ މަސްތުވާތަކެތި އަތުލައިގަތުމާއި ގުޅިގެން މިނިސްޓަރ އިމްރާން ކުރެއްވި ޓްވީޓެއްގައި ވިދާޅުވީ، މިސަރުކާރުން މަސްތުވާތަކެތީގެ ވިޔަފާރިކޮށް، އެތަކެތި އެތެރެކުރަން މަސައްކަތް ކުރާ މީހުންނަށް ހިމާޔަތް ނުދޭނެ ކަމަށެވެ. އެފަދަ ފަރާތްތަކާއި މެދު ޤާނޫނުގެ ތެރެއިން އަޅަންޖެހޭ ފިޔަވަޅުތައް މިސަރުކާރުން އަޅާނެކަމަށް މިނިސްޓަރ އިމްރާން ވިދާޅުވި އެވެ.
"މަސްތުވާތަކެތީގެ ސަޕްލައި މަދު ކުރުމުގެ މަސައްކަތް ކާމިޔާބު ކުރެވެނީ މަސްތުވާތަކެތީގެ ވިޔަފާރިކުރާ މީހުންނަށް މިސަރުކާރުން ސިޔާސީ ހިމާޔާތް ނުދޭތީ. 88 ކިލޯގެ މަސްތުވާތަކެތި އަތުލައިގަތީ ފުލުހުންގެ އެކި ފަންނުތަކުގެ ޚާއްސަކޮށް "DED" ގެ ހުނަރާއި ޤާބިލްކަން ބޭނުންކޮށްގެން" މިނިސްޓަރ އިމްރާން ވިދާޅުވި އެވެ.
ފުލުހުންގެ ޑްރަގް އިންޓެލިޖެންސްއާއި ޑްރަގް އެންފޯސްމަންޓް ޑިޕާޓްމަންޓާއި، މެރިން ޕޮލިސް އާއި ސައުތު ޑިވިޝަން ގުޅިގެން އައްޑޫސިޓީގައި މިހާރު ކުރިއަށްދާ އޮޕަރޭޝަންގައި ގިނަ އަދަދެއްގެ މަސްތުވާތަކެތި އަތުލައިގަނެ ބަޔަކު ވަނީ ހައްޔަރުކޮށްފައެވެ.
ސީޕީ ޙަމީދު މިއަދު ކުރެއްވި ޓްވީޓެއްގައި ވިދާޅުވީ އައްޑޫ އޮޕަރޭޝަންގައި ގާތްގަނޑަކަށް 80 ކިލޯގެ ޑްރަގްސް ވަނީ އަތުލައިގަނެވިފައި ވާކަމަށެވެ. މިއީ ސީދާ ދިވެހި ފުލުހުންގެ އިންޓެލިޖެންސުގެ މައްޗަށް ދިވެހި ފުލުހުންގެ ހިންގި އޮޕަރޭޝަނެއްކަމަށާއި، ތަހުގީގު ކުރިއަށްދާ ވަރަކުން އެހެން ގައުމުތަކާ ވެސް ހިއްސާކުރާނެކަމުގައި ސީޕީ ހަމީދު ވިދާޅުވި އެވެ.
ރާއްޖޭގެ ކަނޑުގެ ސަރަޙައްދުން އިއްޔެ އަތުލައިގަތް މަސްތުވާތަކެއްޗަކީ، ޕާކިސްތާނުގެ ޑްރަގް އިންޓެލިޖެންސުން ދިން މައުލޫމާތަކަށް ހިންގި އޮޕަރޭޝަނެއްގައި އަތުލައިގަތް މަސްތުވާތަކެތިކަމަށް ޕާކިސްތާނުގެ ބައެއް ނޫސްތަކުން ވަނީ ބުނެފައެވެ.
ކޮމިޝަނަރ އޮފް ޕޮލިސް މުޙައްމަދު ހަމީދު ވިދާޅުވީ، ރާއްޖޭގައި މަސްތުވާތަކެތީގެ ވިޔަފާރިއަށް ހުޅުވިފައިހުރި ދޮރުތައް ބަންދުކުރުމަށް ފުލުހުން މަސައްކަތްކުރާނެކަމަށެވެ. އަދި އައްޑޫގައި ކުރިއަށްދާ މި އޮޕަރޭޝަން ކުރިއަށްދާ ވަރަކުން މިކަމާގުޅުންހުރި ބައިނަލްއަޤްވާމީ ފަރާތްތަކާ މަޝްވަރާކުރައްވާނެކަމަށްވެސް ސީޕީ ހަމީދު ވިދާޅުވިއެވެ.
މި މަސްތުވާތަކެތި އަތުލައިގެންފައި ވަނީ ރާއްޖޭގެ ކަނޑާއި އަރަބި ކަނޑު ގުޅުނު ސަރަޙައްދުން، އެތަކެތި ހިފައިގެން ޑިންގީއެއްގައި ބަޔަކު ދަތުރުކޮށްފައި ދަނިކޮށެވެ. ސަލާމަތީ ބާރުތަކުން މި މީހުން އަތުލައިގަތް ވަގުތު ނަގާފައިވާ ކުރު ވީޑިއޯއެއްވެސް މިހާރު އަންނަނީ ދައުރުވަމުންނެވެ. ސަލާމަތީ ބާރުތައް ފެނުމުން ޑިންގީގައި ތިބި މީހުން އެތަކެތި ކަނޑަށް އުކާލި އިރު، އޭގެތެރޭގައި މަސްތުވާތަކެތި ހުރިކަމަށް ބެލެވޭ ދެ ގޯންޏެއް އޮތެވެ. މި މައްސަލައާ ގުޅިގެން ޑިންގީގައި ތިބި މީހުން މިހާރު ވަނީ ހައްޔަރުކޮށްފައެވެ.
