ފުލުހުންގެ އިސް އޮފިސަރުންތަކެއް މަގާމުން ވަކިކުރަން ފުލުހުންގެ ބޯޑުން ނިންމި ނިންމުމަކީ ރަނގަޅު ނިންމުމެއްތޯ ކަށަވަރު ކުރުމަށް ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ (241) ކޮމިޓީ އަށް ހުށަހަޅައިފިއެވެ.

މިމައްސަލަ ހުށަހެޅުމުގެ ގޮތުން މަޖިލިސް ރައީސް މުހައްމަދު ނަޝީދަށް އެޑްރެސްކޮށް، ނާޒިމް ފޮނުވި ސިޓީގައި ބުނެފައިވަނީ ދިވެހި ފުލުހުންގެ ޚިދުމަތުގައި އެތަކެއް އަހަރުތަކެއް ހޭދަކޮށް، ފާއިތުވެގެން ދިޔަ ދިގު މާޒީގައި އެފަރާތްތަކުގެ މަސައްކަތުގެ އަޚްލާޤަށް ބަލައި ވަޒީފާގެ ކުރިއެރުން އެތަކެއް ފަހަރަކު ޙާޞިލްކޮށްފައިވާ ފަރާތްތަކަކަށް ވީހިނދު، ދިވެހި ފުލުހުންގެ ޤާނޫނު ތަންފީޒުކުރުމަށް ކަމަށްބުނެ، އެފަރާތްތަކަށް ޤާނޫނުން ކަށަވަރުކޮށްދީފައިވާ ވަޒީފާގެ ރައްކާތެރިކަން ގެއްލިފައިވާ ފަރާތްތަކެއްކަން ފާހަގަ ކުރެވިފައިވާކަމަށެވެ.

ދިވެހި ފުލުހުންގެ ޤާނޫނު ގެ 02 ވަނަ މާއްދާގައި މިޤާނޫނުގެ މަޤްޞަދު ސާފުކޮށް ބަޔާންކޮށްފައިވާ ކަމާއި، އެގޮތުން މިމާއްދާގެ (ހ) ގައި "ދިވެހި ފުލުހުންގެ ޚިދުމަތުގެ އެންމެހައި ކަންކަމަކީ ޤާނޫނު އަސާސީ އާއި، ޤާނޫނު އަސާސީގައި ބަޔާންކޮށްފައިވާ ދުސްތޫރީ ހަމަތަކާއި، އިންސާނީ ޙައްޤުތަކާއި ކުރާމަތައް އިޙްތިރާމް ކުރުމާއެކު ޤާނޫނީ ޙުކޫމަތުގެ ތެރެއިން ދެވޭ ޚިދުމަތެއްކަން ކަށަވަރު ކުރުން" ކަމުގައިވާއިރު، މިޤާނޫނުގެ ދަށުން ދިވެހި އެއްވެސް ފުލުހަކާއި ދޭތެރޭގައި ފިޔަވަޅު އެޅޭނީ ދިވެހި ޖުމްހޫރިއްޔާގެ ޤާނޫނު އަސާސީ އާއި ޤާނޫނު އަސާސީގައި ބަޔާންކޮށްފައިވާ ދުސްތޫރީ ހަމަތަކާއި، އަދި ހަމައެހެންމެ ކަމާގުޅޭ އެންމެހައި ޤާނޫނުތަކާއި ޤަވާއިދުތަކަށް ރިޢާޔަތް ކުރެވިގެންކަން ފާހަގަ ކުރަައްވާކަމަށެވެ.

އެހެން ނަމަވެސް މިމައްސަލަތައް ބެލުމުގައި އެފަރާތްތަކަށް ދިވެހި ޖުމްހޫރިއްޔާގެ ޤާނޫނު އަސާސީ އިން މުޞްލަޤަށް ކަށަވަރުކޮށްދީފައިވާ ޖަވާބުދާރީ ވުމުގެ ފުރުޞަތު ޢަދުލުވެރިކަމާއެކު ލިބިދީފައި ނުވާކަމަށް މަޢުލޫމާތު ލިބިފައިވާކަމަށް ނާޒިމްގެ މައްސަލާގައިވެއެވެ. އަދި ހަމައެހެންމެ މިމައްސަލަ އަކީ އޭގެ ޒާތުން ތަޢައްޞުފީ ގޮތެއްގައި ނިންމަވާފައި ނިންމެވުމެއްތޯ ކަށަވަރު ކުރުމަކީވެސް މިކޮމިޓީގެ ޛިންމާ އާއި މަސްޢޫލިއްޔަތުގެ ތެރޭގައި ހިމެނޭ ކަމެއްކަމަށް ވީހިނދު، އެފަރާތްތައް ވަޒީފާއިން ވަކިކުރުމަށް ޕޮލިސް ބޯޑުން ނިންމަވާފައި ވަނީ ދިވެހި ޖުމްހޫރިއްޔާގެ ޤާނޫނު އަސާސީއާއި ކަމާގުޅޭ ޤާނޫނުތަކުގެ ތަރަހައިގެ ތެރެއިންތޯ ސާފު ކުރަންޖެހޭ ކަމަށް ނާޒިމް ވިދާޅުވިއެވެ.

ޕޮލިސް ބޯޑުން ބެލި ކަންތައްތަކަށްފަހު ފުލުހުންގެ ބައެއް އޮފިސަރުންނާއިމެދު ފިޔަވަޅު އެޅުމަށް ވަނީ ކޮމިޝަނަރ އޮފް ޕޮލިސް މުހައްމަދު ހަމީދުއަށް ދަންނަވާފައެވެ. ފިޔަވަޅު އަޅަން ލަފާދީފައިވާ ފަރާތްތައް ކަމަށްބުނެ އާންމުކޮށްފައިވާ ލިސްޓުގައި ހިމެނޭ ބައެއް އޮފިސަރުންނަކީ އެފުލުހުންނާމެދު ޤާނޫނުގެ ތިން ވަނަ މާއްދާގައި ބުނާ އިޖުރާތު ހިންގި ފަރާތްތައްކަމަށް ނުވާތީ އެއީ ޕޮލިސް ބޯޑުގެ ރިޕޯޓުގައި ހިމެނޭ ފަރާތްތަކުގެ ސައްޚަ ލިސްޓު ނޫންކަމަށް ފުލުހުން ވަނީ ކަށަވަރު ކޮށްދީފައެވެ.

އެރިޕޯޓް މިހާރު ކޮމިޝަނާ އޮފް ޕޮލިސް މުހައްމަދު ހަމީދަށް އަރުވާފައިވާތީ، މިކަމުގައި ސީޕީ ނިންމަވާ ގޮތެއް ހިއްސާ ކުރައްވާނެކަމަށްވެސް ފުލުހުންގެ މީޑިއާ އޮފިޝަލް ވިދާޅުވިއެވެ. ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ފުލުހުންގެ ބޯޑު އެކުލަވައިލެއްވީ މި އަހަރުގެ އޭޕްރިލްމަހުގެ 9 ވަނަ ދުވަހުއެވެ. އެ ބޯޑު އުފެއްދިތާ ހަތަރު މަސް އިއްޔެއަށް ހަމަވިއިރު، ބޯޑުން އެމުއްދަތުގައި ކުރަންޖެހޭ ކަންކަން ނިންމައި ވަނީ ހުށަހަޅާފައެވެ.