ޔޫތު މިނިސްޓަރ އަޙްމަދު މަހުލޫފްގެ މައްޗަށް ތުހުމަތުކުރާ ކޮރަޕްޝަންގެ މައްސަލާގައި، އެއްވެސް ހެއްކެއްނެތި ކޯޓަށް ހުށައަޅައިފިނަމަ، މިމައްސަލައިގަ ދައުލަތުން ހޭވި ހަޑި ހާމަވެ "އޮރިޔާން ވާނެ"ކަމުގެ އިންޒާރު އެމަނިކުފާނު ދެއްވައިފިއެވެ.
މަހުލޫފްގެ މައްޗަށް ދެ ދައުވާކުރުމަށް އޭސީސީން ޕީޖީއަށް ފޮނުވާފައިވެއެވެ. އެއީ މަަހްލޫފް ރައްޔިތުންގެ މަޖިލީހުގެ މެންބަރަކަށް ހުރިއިރު ސްޕެޝަލް އިކޮނޮމިކް ޒޯން، އެސް.އީ.ޒެޑްގެ ބިލަށް ވޯޓުދިނުމާއި ޕީ.ޕީ.އެމްގައި ދެމި ހުރުމުގެ މުޤާބިލުގައި 33,000 އެމެރިކާ ޑޮލަރު އަމިއްލަފުޅު އެކައުންޓަށް ޖަމާވި މައްސަލައާއި، ރަސްމީ އިދާރާއަކަށް ދޮގު މަޢުލޫމާތު ދީފައިވާކަން ތަޙްޤީޤަށް އެނގެން އޮތުމުން ޤާނޫނުލް އުޤޫބާތުގެ ދަށުން، ދައުވާކޮށްދިނުމަށް ފޮނުވާފައިވާ މައްސަލައެވެ.
ރޭ ކްލަބް ހައުސްގައި ވާހަކަފުޅު ދައްކަވަމުން މިނިސްޓަރ މަޚްލޫފް ވަނީ އެމަނިކުފާނުގެ މައްޗަށް ކުރެވޭ ތުހުމަތުތަކުގެ ދިފާޢުގައި ގިނަ ވާހަކަތަކެއް ހިއްސާކުރައްވާފައެވެ. އެސްއީޒެޑް ޤާނޫނު ފާސްކުރުމަށް ވޯޓު ދެއްވުމަށް ވަޑައިގަތީ މެލޭޝިއާގައި ހުންނެވުމަށްފަހުއެވެ. މަހުލޫފް ވިދާޅުވީ، ރާއްޖެ ވަޑައިގަތުމުގެ ކުރިން އޭރުގެ މަޖިލީހުގެ ރައީސް ޢަބްދުﷲ މަސީޙް މުހައްމަދަށް ގުޅުއްވައި ވޯޓު ނެގުމަށް އޮތް ބިލެއް އޮތްތޯ ސާފުކުރެއްވިކަމަށެވެ.
މަހުލޫފް ވިދާލުވީ މެލޭޝިއާއިން ރާއޖެ ވަޑައިގަތީ ބިޒްނަޒް ކްލާހުގައިކަމަށާއި، ޕާޓީން ލިބުހާވެސް އެއްޗަކީ ބިޒްނަސް ކްލާސް ޓިކެޓްކަމަށެވެ. އަދި ރާއްޖެ ވަޑައިގަތީ ދަރިފުޅައި އަނބިކަނބަލުންވެސް މެލޭޝިއާގައި ބަހައްޓާފައިކަމަށްވެސް މަހުލޫފް ވިދާޅުވިއެވެ.
މަހުލޫފް ވިދާޅުވީ، އޭސީސީގެ ރައީސް މަރްޔަމް ޝިއުނާއާއި އެސެޓް ރިކަވަރީ ކޮމިޝަންގެ ރައީސް އަޙްމަދު އަސްޢަދުގެ ޗެޓްލޮގްތަކެއް ލިބިވަޑައިގެންފައިވާކަމަށެވެ. މަހުލޫފް ވިދާޅުވީ ޝަރީއަތަށް އޭނަގެ މައްސަލަ ގޮސްފިނަމަ އެ ވާހަކަތައް ހާމަކުރައްވާނެކަމަށާއި، އެއީ ދައުލަތް "އޮރިޔާން" ވާނެ ފަދަ ވަހަކަތަކެއްކަމަށެވެ. އަދި އެމްއެމްޕީއާރުސީގެ މައްސަލާގައި އެއްވެސް މީހަކަށް ދައުވާ ނުކުރެވަރުގެ މައްސަލައަކަށް ވާނެކަމަށް މަހުލޫފް ވިދާޅުވިއެވެ.
ސަޓަޑޭ ފޮރެންސިކްސްގަ މި ބުނަނީ އަންނާށޭ ކޯޓުގައި ޓެސްޓިފައި ކުރަން. އޮންލައިންކޮށް ބައިވެރި ކުރުވަން އެބަ އުޅޭ. އެ ވެސް އަދި ލާރި ވެެސް ދޭ ގޮތަށް. ކޯޓުގައި ހެކިބަސްދޭ މީހުންނަށް ދައުލަތުން ލާރިދޭ ގޮތަށް ދިޔައިމަ ކިހާ ބޮޑު ޖޯކެއް ތޯ؟
– އަޙްމަދު މަހުލޫފް
މަހުލޫފް ވިދާޅުވީ، ދައުވާކުރުމަށް ޕީޖީ އޮފީހަށް ފޮނުވުމުން އޭގައި އަމަލުކުރެވެންޖެހޭ ގޮތަކީ، ދައުވާކުރެވޭވަރަށް ހެކި ހުރެއްޖެނަމަ ދައުވާކުރުންކަމަށާއި، ހެކި ނެތްނަމަ ދައުވާ ނުކޮށް އަނބުރާ ގެނދިއުންކަމަށެވެ. ނަމަވެސް އެމަނިކުފާނުގެ މައްސަލަ ބާއްވައިގެން ހެކި އުފައްދަން މަސައްކަތްކުރައްވާކަމުގެ ތުހުމަތު މަހުލޫފް ކުރެއްވިއެވެ.
މަހްލޫފް މިހެން ވިދާޅުވެފައިވާއިރު، މަހުލޫފް ވިދާޅުވެފައިވަނީ، ކުރިން ނިންމަވައިގެން ހުންނެވީ ޕީޖީ އޮފީހުން މައްސަލާގައި ގޮތެއް ނިންމީމަ އިސްތިއުފާ ދޭން ނަމަވެސް ދެން ދައުވާ ކުރިޔަސް އިސްތިއުފާދިނުމާ މެދު އިތުރަށް ވިސްނާނެކަމަށެވެ.މަހްލޫފު ވިދާޅުވީ ފެށުނީއްސުރެ އޭނާގެ މައްސަލައިގެ ތެރެއަށް ނުފޫޒުގަދަ ސިޔާސީ ބަޔަކު ވަދެ މިކަން ހިންގަނީ ސީދާ ޒާތީ ގޮތުން ކަމަށެވެ. އަދި ދައުވާކޮށްފިނަމަ ކޯޓުތެރޭން އެހުރިހާ ކަމެއް ހާމަވާނެ ކަމަށްވެސް މަހްލޫފު ވިދާޅުވިއެވެ. އަދި ޕީޖީގެ މައްޗަށް މަހްލޫފު ވަނީ މި މައްސަލާގައި ގިނަ ތުހުމަތު ތަކެއް ކޮށްފައެވެ.
މީގެ އިތުރުން ސްރީލަންކާގައި ހުންނަވާ ދިވެހި ސަފީރު މެދުވެރިކޮށް ލަންކާ ރައްޔިތެއްގެ ބަޔާން ރާއްޖެއާއި ލަންކާގެ ގާނޫނޫތަކާ ހިލާފަށް ނެގިމައްސަލައެއް ލަންކާއިންނާއި ރާއްޖޭގެ ފޮރިން މިނިސްޓްރީންވެސް ބަލަމުން ގެންދާކަމަށް މަހްލޫފު ވަނީ ވިދާޅުވެފައެވެ.
އަދި ލަންކާގަ ހުންނަވާ ދިވެހި ސަފީރު މިނިސްޓްރީ އަަށްވެސް މިކަން ސިއްރުން ހިންގަވާފައިވާ ކަން ފަޅާއަރާ އެމައްސަލަ ފޮރިން މިނިސްޓްރީ އިންވެސް ތަހުގީގު އެބަ ކުރޭ. ޖިނާއީ ތަހުގީގު ޒޫމް މެދުވެރިކޮށް ހިންގިއިރު ސަފީރު އެތާ އިންނެވިތަން ވީޑިއޯއިން ފެނޭ، ރައީސް އަށްްވެސް އެތާ ނީއްނެވޭނެ
– މަހްލޫފު
މީގެ އިތުރުން ގިނަވެގެން 6 ދުވަސްތެރޭ ދައުވާ ކުރުމާމެދު ގޮތެއް ނިންމާކަމަށް ޕީޖީ ޕްރެސްގަ ވިދާޅުވި ކަމަށާއި އޭނާގެ މައްސަލަ އޮންނަތާ 60 ދުވަސް ވެފައި ވާކަމަށްވެސް މަހްލޫފު ވަނީ ވިދާޅުވެފައެވެ.
އެމްއެމްޕީއާރްސީގެ މައްސަލަތައް ނިންމަން ނަގާފައޮތް ކޮމިޓީ އިން ދައުވާ ނުކުރެވޭނެކަމަށް ބުނުމުން، އެމީހުންގެއަތުން މައްސަލަ އަތުލާ ހަވާލުކުރީ އެހެން ބަޔަކާ.
– މަހްލޫފު
މަހްލޫފުގެ ޗެޓްލޮގެއް ކަމަށް ބުނާ ޗެޓްލޮގްގެ އެނެލެސިސް ހެދި ފަރާތްތަކުން ކޯޓަށް ހާޒިރުކުރަން މަސައްކަތްކުރިއިރު އެމީހުން ކޯޓަށް އަޔަސް ޗެއިން އޮފް ކަސްޓަޑީ ނެތް އެއްޗެއްގެ އެއްވެސް ޤާނޫނީ ބުރަދަނެއް ކަމަށް އެމީހުން ބުނެފައި ވާކަމަށްވެސް މަހްލޫފު ވިދާޅުވިއެވެ. މީގެ އިތުރުން އެ ޗެޓް ލޮގްތަކުގަ އޭނާ ދެއްކި ކަމަށް ބުނާ އެއްވެސް ވާހަކައެއްވެސް ނެތް ކަމަށް މަހްލޫފު ވިދާޅުވިއެވެ.
