ރާއްޖޭގައި މިހާތަނަށް އުފެދުނު އެންމެ މޮޅު ކުޅުންތެރިޔާ އަލީ އަޝްފާޤް (ދަގަނޑޭ) ހުރީ ކުރިއަށް އޮތް ސާފް ޗެންޕިއަންޝިޕްގައި ކުޅެ މުބާރާތް ރާއްޖެއަށް ހޯދުމަށް ކެތްމަދުވެފައި ކަމަށް އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.
އޮކްޓޯބަރު 1-13 އަށް ރާއްޖޭގައި ބާއްވާ ސާފް ޗެންޕިއަންޝިޕް މުބާރާތް ކާމިޔާބް ކުރުމަށް ކުޅުންތެރިގެ ރޫހު ހުރި ގޮތާއި ގުޅޭގޮތުން ބައްސާމް ވިދާޅުވީ މިވަގުތު ޤައުމީ ޓީމުގައި ހިމެނޭ ޒުވާން ކުޅުންތެރިންނާއި، ދުވަސްވީ ކުޅުންތެރިންވެސް މުބާރާތް ކާމިޔާބް ކުރުމަށް ވަރަށް ބޮޑަށް ބޭނުންވެފައިވާކަމަށެވެ.
މިހާރުގެ ޓީމުގައި ހިމެނޭ ކުޅުންތެރިންގެ ތެރެއިން ރާއްޖޭގައި އުފެދުނު އެންމެ މޮޅު އެއްކުޅުންތެރިޔާ އަލީ އަޝްފާޤާއި ގުޅޭގޮތުން ބައްސާމް ވިދާޅުވީ، މުބާރާތް ރާއްޖޭގައި ބާއްވާނެކަން އެގުނުތާ 15 ވަރަކަށް މިނިޓްފަހުން އަޝްފާގާއި ދިމާވެ ވާހކަ ދެކެވުނުކަމަށެވެ. އަޝްފާޤަކީ މިސަރަހައްދުގެވެސް އެންމެ މަތީ ސަފުގައި ގުނާލެވޭ ކުޅުންތެރިޔަކަށްވާއިރު މިމުބާރާތަށް އަޝްފާގު ފިޓުވާން މަސައްކަތް ފެއްޓުމަށް ދެންނެވިކަމަށް ބައްސާމް ވިދާޅުވިއެވެ.
ކޯވިޑާއި، ގުޅިގެން ސީޒަން މެދު ކަނޑާލުމުން ކުޅުމާއި ދުރުގައި ގިނަ ދުވަސްތަކެއް އަޝްފަގު ހުންނަން ޖެހުމުން، ޤައުމީ ޓީމުގެ ސްކޮޑްގައި ހިމެނުމަށް، އަމިއްލައަށް ފިޓްނަސް ރަނގަޅުކޮށް، ރަނގަޅު ފޯމެއްގައ ހުރުމަށް އިރުޝާދު ދީފައިވާނެކަމަށް ބައްސާމް ވިދާޅުވިއެވެ.
އަޝްފާގުކައިރީގައި، މުބާރާތައް ތާއްޔާރުވުމަށް އެދުނިން. މުބާރާތައް އަދި ޓީމަށް އެރުމަށް އަމިއްލަ ފިޓްނަސް ހިފެހެއްޓުމަށް އަޅުގަނޑު އެދުނިން. ނަމަވެސް ޓީމަށް އަރާނެތޯ ނޫންތޯ ނިންމާނީ ކޯޗުންކަމަށް ދެންނެވިން. އަޝްފާގަކީ ރާއްޖޭގައި އުފެދުނު އެންމެ މޮޅު އަދި މިހާރުވެސް މޮޅަށް ކުޅެމުންދާ ކުޅުންތެރިޔަކަށްވުމުން، މިމުބާރާތުގައި އަޝްފާގުގެ ބޭނުން ވަރަށް ބޮޑަށް ހިފޭނެކަމަށް ދެންނެވިން.
– ބައްސާމް ވިދާޅުވިއެވެ.
ބައްސާމް ވިދާޅުވީ މުބާރާތަށް ތައްޔާރުގެ މުބާރާތުގައި ކުޅުމަށް އަޝްފާގު ހުރީ ކެތްމަދު ވެފައިކަމަށެވެ. އަދި އަމިއްލައަށް ފިޓްނަސް ރަނގަޅުކޮށް މިހާރު އީގަލްސްއާއިއެކު ކުރަމުންދާ ޕްރެކްޓިސްތަކުގައިވެސް ސާފަށް ޚާއްސަ ސަމާލުކަމެއް ދީގެން މަސައްކަތް ކުރާނެކަމަށް އަޝްފާގު ބުނެފައިވާކަމަށް ބައްސާމް ވިދާޅުވިއެވެ.
އަޅުގަނޑުކައިރީގައި އަޝްފާގު ވިދާޅުވި މިއަދުން ފެށިގެން ތިމަންނަ ވަރަށް ވަރުގަދައަށް ތައްޔާރުވާން ފައްޓާނަމޭ. ފަހަރުގައި މީ ވެދާނެއޭ ތިމަންނަ ކުޅޭ އެންމެ ފަހު ސާފް މުބާރާތައްވެސް، އެހެންކަމަށްވުމުން މިމުބާރާތަކީ ވަރަށް ކާމިޔާބު މުބާރާތަކަށް ހެދުމަށް މަސއްކަތް ކުރާނެ ވާހަކަ.
– ބައްސާމް ވިދާޅުވިއެވެ.
ދަަގަނޑޭ މިދިޔަ އަހަރު ކުޅެފައިވަނީ ކުލަބު ވެލެންސިޔާ އަށެވެ. ރާއްޖޭގެ މޮޅު ކުޅުންތެެރިޔާގެ މަޤާމް ހަ ފަހަރު ހޯދާފައިވާ ދަގަނޑޭވަނީ ރާއްޖޭގެ ގިނަ ކުލަބްތަކަށް ކުޅެފައެވެ.
ސާފް ޗެންޕިއަންޝިޕް މުބާރާތް ބޭއްވުމަށް ތިން ގައުމްއަކުން ޝައުގުވެރިކަން ފާޅު ކުރިނަމަވެސް، މުބާރާތްތަށް ބިޑްކޮށްފައިވަނީ ރާއްޖެއާއި ނޭޕާލްއިން އެކަންޏެވެ. ސައުތު އޭޝިއާގެ ފުޓްބޯޅަ ފެޑެރޭޝަނުން ރާއްޖެއަށް މިފުރުސަތު ދިނީ ކޯވިޑް-19ގެ ހާލަތު ނޭޕާލްއަށް ވުރެއް ރަނގަޅުވުންކަމަށް ބެލެވެއެވެ. މި ފަހަރުގެ ސާފް ޗެމްޕިއަންޝިޕްގައި ޕާކިސްތާނަށް ނުކުޅެވޭނެއެވެ. އެއީ އެ ގައުމު މި ވަގުތު ފީފާގެ ސަސްޕެންޝަނެއްގައި އޮތުމުންނެވެ.
ފަސް ގައުމު ކުޅޭނަމަ ސާފްގެ ވިސްނުމަކީ މި ފަހަރުގެ މުބާރާތް ލީގު އުސޫލުން ކުޅުމެވެ. އެކަމަކު، ބޫޓާން ކުޅޭނަމަ މި ފަަހަރުގެ ސާފްގެ މެޗުތައް ކުރިއަށްދާނީ ހަ ގައުމުގެ މެދުގައި ދެ ގްރޫޕަށް ބަހާލައިގެންނެވެ. އެއީ ރާއްޖެ، އިންޑިއާ، ނޭޕާލް، ބަންގްލަދޭޝް، ސްރީ ލަންކާ އަދި ބޫޓާންގެ މެދުގައެވެ.
އެންމެ ފަހުން ސާފް ޗެމްޕިއަންޝިޕް ބޭއްވީ 2018 ވަނަ އަހަރު ބަންގްލަދޭޝްގެ ޑާކާގަ އެވެ. އެ ފަހަރުގެ މުބާރާތުގެ ފައިނަލުގައި އިންޑިއާ ބަލިކޮށް ރާއްޖޭން ވަނީ ދެ ވަނަ ފަހަރަށް ސަރަހައްދުގެ ޗެމްޕިއަންކަން ހޯދައިފައެވެ.
