ގައުމީ ފުޓްބޯޅަ ޓީމުގެ ކޯޗަކަށް ހުރި ނެދަލެންޑްސްގެ މާޓިން ކޫޕްމަންގެ ކޮންޓްރެކްޓް އުވާލައިފިއެވެ.
ގައުމީ ޓީމުގެ ކޯޗުކަމުން މާޓިން ކޫޕްމަންގެ ވަކިކުރިކަން މީޑިއާގައި ހާމަކޮށްފައިވަނީ އެފްއޭއެމް ރައީސް ބައްސާމް އަދީލް ޖަލީލްއެވެ.
ޕީއެސްއެމް ނިއުސްގެ "އެކްސްކްލޫސިވް" ޕްރޮގްރާމްގައި ވާހަކަ ދައްކަމުން އެފްއޭގެ ރައީސް ބައްސާމް އަދީލް ޖަލީލް ވިދާޅުވީ، ގައުމީ ފުޓްބޯޅަ ޓީމުގެ ކޯޗާއެކު ހަދާފައިވާ ކޮންޓްރެކްޓް އުވާލިކަން މިހާތަނަށް މީޑިއާގައި ނުދައްކާ އޮތް ސަބަބަކީ ވޭތިވިދިޔަ ދުވަސްތަކަކީ ރާއްޖޭގައި ސާފް ޗެމްޕިއަންޝިޕް ފުޓްބޯޅަ މުބާރާތް ބާއްވަ ބިޑްކޮށް އެ މަސައްކަތް ވަރަށް ފޯރިގައި ދިޔަ ދުވަސްތަކަކަށް ވާތީ ކަމަށެވެ.
ބައްސާމް ވިދާޅުވީ ކުރިޔަށް އޮތް ސާފް ޗެމްޕިއަންޝިޕް ފުޓްބޯޅަ މުބާރާތުގައި ގައުމީ ޓީމުގެ ކޯޗިން ޓީމާއި އޮފިޝަލުންގެ ގޮތުގައި ހުސް ދިވެހިން ފެނުމަކީވެސް ގާތް ކަމެއް ކަމަށެވެ. ނެދަލެންޑްސްގެ މާޓިން ކޫޕްމަން ގައުމީ ޓީމުގެ ކޯޗުކަމާއި ރަސްމީކޮށް ހަވާލުވީ، މިދިޔަ އަހަރުގެ ޖެނުއަރީ މަހުގެ 26 ވަނަ ދުވަހުއެވެ. އަދި އޭގެ ފަހުން މި އަހަރުގެ ކުރީކޮޅުގައި ވަނީ އިތުރު ތިން އަހަރުގެ ކޮންޓްރެކްޓެއް ދީފައެވެ.
ގައުމީ ފުޓްބޯޅަ ޓީމުގެ ކޯޗުކަމުން ކޫޕްމަން ވަކިކޮށްފައިވާއިރު، ކޫޕްމަންގެ އިރުޝާދުގެ ދަށުން ގައުމީ ފުޓްބޯޅަ ޓީމު އަދި ރަސްމީ މެޗެއް ކުޅެފައެއް ނުވެއެވެ. މިހާތަނަށް ކޫޕްމަންގެ އިރުޝާދުގެ ދަށުން ގައުމީ ޓީމު ކުޅެފައިވަނީ ވަރލްޑް ކަޕް އަދި އޭއެފްސީ އޭޝިއަން ކަޕްގެ ޖޮއިންޓް ކޮލިފައިންގައި 3 މެޗެއެވެ. އެ 3 މެޗުންވެސް ރާއްޖެ ވަނީ ބަލިވެފައެވެ.
