އެމީހެއްގެ ރިޒްޤު ހޯދުމަށްޓަކައި މަސައްކަތް ކުރާ މީހަކީ، މާތް ﷲގެ މަގުގައި ޖިހާދު ކުރާ މީހެއް ފަދަ މީހެއްކަމަށް ބަޔާންކުރައްވާ، ރިޒްގު ހޯދުމަށް ގަދައަޅައި މަސައްކަތްކުރުމަށް މިއަދުގެ ހުކުރު ޚުޠުބާގައި ގޮވާލައްވައިފިއެވެ.
"ރިޒްޤް ހޯދުމަށް މަސައްކަތްކުރުން" މި މަޢުޟޫއަށް ރާއްޖޭގެ މީހުން ދިރިއުޅޭ ރަށްތަކުގައި ދެއްވި ހުކުރު ޚުޠުބާގައި ވަނީ،، ރިޒްޤު ހޯދުމަށްޓަކައި، މަސައްކަތް ކުރުމަކީ، ﷲ ތަޢާލާ އެކަލާނގެ ހެއްދެވި މަޚްލޫޤުންގެ ކިބާގައި ލައްވާފައިވާ ފިޠުރީ ކަމެއްކަމަށް ބަޔާންކުރައްވާފައެވެ. ކޮންމެ ދުވަހަކު ހެނދުނު، ކޮންމެ މީހަކު ވެސް އެކަމަށްޓަކައި އަވަސްވެގަންނަތަން ފެންނަކަމަށާއި، ކޮންމެ މީހަކު ވެސް އެމީހަކަށް މިންވަރު ކުރައްވާފައިވާ ރިޒްޤު ލިބޭތޯ މަސައްކަތް ކުރާކަން ފާހަގަކުރެއްވިއެވެ. އެއީ އެމީހަކަށް އެނގިފައިވާ މަސައްކަތެއް ކޮށްގެން ނުވަތަ އެމީހަކަށް ލިބިފައިވާ މުދަލެއް ހޭދަކޮށްގެންކަމަށާއި، މިއީ ހުރިހާ މަޚުލޫޤުންގެ ވެސް ޙާލުކަމަށް ބަޔާންކުރެއްވިއެވެ. ދޫނިސޫފާސޫފި ވެސް ހެނދުނުވުމުން އެ ސޮރުމެންގެ ހާލިތަކުން އުދުހިގެން ދަނީ، އެ ސޮރުމެންގެ މައްޗަށް މާތް ﷲ އެ ދުވަހަށް ކަނޑައަޅުއްވާފައިވާ ރިޒްޤު ހޯދުމަށް ބަޔާންކުރައްވާ ޚުޠުބާގައި ވަނީ. ކާމިޔާބު މީހަކީ، އޭނާގެ މަސައްކަތުން އޭނާގެ ޙަޔާތް އާރާސްތު ކުރާ މީހާކަމަށް ވިދާޅުވެފައެވެ. އޭނާގެ ނިތްކުރިން އޮހޮރޭ ދަލުން އޭނާގެ އުއްމީދުތަކުގެ އޮށްތަކަށް ފެންދީ ހައްދާ މީހާކަމަށާއި، އޭނާގެ ރިޒުޤު ހޯދުމުގައި މާތްﷲއަށް ވަކީލުކޮށް މާތް ﷲގެ ތައުފީޤާއި، ބަރަކާތް ލިބުން އެދި، މާތް ﷲ އަށް ދަންނަވައި، އެކަމަށް ކުރިމަތިލައިގެންކަމަށް ވިދާޅުވިއެވެ.
ރިޒްޤު ތަނަވަސްކޮށްދެއްވައި، ރިޒްޤުގައި ބަރަކާތް ލައްވާ ކަންތައްތަކުގެ ތެރޭގައި، ރަޙިމުގެ ގުޅުން ދެމެހެއްޓުމާއި، ގާތްތިމާގެ މީހުންނަށް ހެޔޮ ފޯރުވުން ހިމެނެއެވެ. އެއީ އިސްލާމީ މަތިވެރި އަޚްލާޤުގެ ތެރޭގައި ހިމެނޭ ކަމެކެވެ. ރަސޫލުﷲ ޞޢވ ޙަދީޘް ކުރައްވާފައި ވެއެވެ. "ތިޔަބައިމީހުންގެ ތެރޭގައިވާ އެންމެ ރަނގަޅު މީހަކީ، އެމީހެއްގެ އަހުލުންނަށް އެންމެ ރަނގަޅު މީހާއެވެ. އަދި ތިމަންކަލޭގެފާނަކީ، ތިމަންކަލޭގެފާނުގެ އަހުލުންނަށް އެންމެ ރަނގަޅު މީހާއެވެ." ގާތްތިމާގެ މީހުންނަށް ހެޔޮ ފޯރުވުމަކީ އެކަމުގައި އެތައް ލާބަތަކެއް ހުރި ކަމެކެވެ. އޭގެ ތެރޭގައި އޭނާގެ މުދަލުގައްޔާއި، އޭނާގެ ޢުމުރުގައި ބަރަކާތް ލެއްވުންވެއެވެ.
– ހުކުރު ޚުޠުބާ
ޒްޤުގައި ބަރަކާތްލައްވާ ކަންތައްތަކުގެ ތެރޭގައި ފަޤީރުންނަށާއި، މުހުތާދުވެރިންނަށް ހޭދަކުރުން ހިމެނޭކަމަށައި، ދަތިޙާލު ޖެހިފައިވާ މީހަކަށް ލުއިފަސޭހަކޮށްދިން މީހާއަށް، މާތް ﷲ ލުއިފަސޭހަ ކޮށްދެއްވާނެކަމަށްވެސް ޚުޠުބާގައި ހަނދަންކޮށްދެއްވިއެވެ. އަދި ކަންބޮޑުވެފައިވާ މީހެއްގެ ކަންބޮޑުވުން ފިލުވައިދިން މީހާގެ ކަންބޮޑުވުންތައް ﷲ ފިއްލަވައި ދެއްވާނެކަމަށްވެސް ބަޔާންކުރެއްވިއެވެ.
މާތް ﷲގެ އަޅުތަކުންނޭވެ! ﷲގެ އަޅުތަކުން ކުރިމަތިވެފައިވާ ބުރަތަކުން އެމީހުން ސަލާމަތްކޮށްދިނުމަށް މަސައްކަތް ކުރާށެވެ! ތިޔަބައިމީހުންގެ ޞަދަޤާތްތަކުން، ޔަތީމުންނާއި ކިނުންގެ ކަރުނަތައް ފުހެދޭށެވެ! ހަމަކަށަވަރުން ޞަދަޤާތަކީ މުދާ އިތުރުކޮށްދެއްވައި، މުދާ ރައްކައުތެރިކޮށްދެއްވާނެ ކަމެކެވެ. ރަސޫލާ ޙަދީޘް ކުރައްވާފައި ވެއެވެ. "ޞަދަޤާތުގެ ސަބަބުން މުދާ އުނިވެގެންނެއް ނުދާނެތެވެ." އެހެނީ ޞަދަޤާތުގައި ހިފާ މީހާގެ ހެޔޮ ދުޢާގެ ސަބަބުން، އެ މުދާ ރައްކައުތެރިވާނެތީއެވެ. އަދި ޞަދަޤާތުގެ ސަބަބުން ޙަސަދަވެރިކަން ފިލާނެތީއެވެ. ޞަދަޤާތުގެ ސަބަބުން މުޖްތަމަޢުގެ އެއްބައިވަންތަކަން ހަރުދަނާވާނެތީއެވެ.
– ހުކުރު ޚުޠުބާ
ތެދުވެރިކަމާއެކު ރިޒްޤު ހޯދަން އެދޭ މީހާ، އެކަމަށްޓަކައި ހިއްމަތްތެރިކަމާއެކު މަސައްކަތް މަސައްކަތް ކުރުމަށް ގޮވާލައްވަމުން ޚުޠުބާގައި ވަނީ އެމީހެއްގެ ކިބައިން ކަންނެތްކަން ފުހެލުމަށްވެސް ނަސޭހަތްތެރިވެވަޑައިގެންފައެވެ. ދުވަހަކު ވެސް، އުޑަކުން ރަނާއި ރިއްސެއް ނުވެއްސަވާނެކަމަށާއި، އެމީހެއްގެ ރިޒްޤު ހޯދުމަށްޓަކައި މަސައްކަތް ކުރާ މީހަކީ، މާތް ﷲގެ މަގުގައި ޖިހާދު ކުރާ މީހެއް ފަދަ މީހެއްކަމަށްވެސް ޚުޠުބާގައި ބަޔާންކުރެއްވިއެވެ. ރިޒްޤު ހޯދުމަށްޓަކައި، ޙައްޤު ގޮތުގައި މަސައްކަތް ކުރާ މީހާއަށް މާތް ﷲ ބަރަކާތް ލައްވާނެކަމަށާއި، އޭނާ އުއްމީދުތަކާ ހަމައަށް ވާޞިލުކޮށް ދެއްވާނެކަމަށްވެސް ވިދާޅުވިއެވެ. މަސައްކަތެއް ނުކޮށް ދިރިއުޅުމުގައި އެހެން މީހުންނަށް ބަރޯސާވާ މީހަކަށް ނުވެ މަސައްކަތްކުރާ މީހަކަށްވުމަށްވެސް ނަސޭހަތްތެރިވެވަޑައިގަތެެވެ. އަމިއްލަ އަތުން ކުރާ މަސައްކަތުން ކައިބޮއި އުޅޭ މީހަކަށްވުމަށްވެސް ގޮވާލެއްވިއެވެ.
ރޭގަނޑު ހޭލައި ތިބެފައި، ފަތިހުގެ ވަގުތުގައި ނިދާމީހުންނަށް، ދެ ޣަނީމާއެއް ގެއްލިގެން ދާނެއެވެ. ފުރަތަމަ ޣަނީމާއަކީ، ފަތިސް ނަމާދެވެ. ދެވަނަ ޣަނީމާއަކީ، ދުވާލު ފެށޭ ވަގުތުގެ ބަރަކާތެވެ. އެކަމުގެ ސަބަބުން އޭނާގެ ރިޒްޤުން ބަރަކާތް ކެނޑިގެން ދާނެއެވެ. މާތް ﷲ އޭނާގެ މައްޗަށް ވާޖިބު ކުރައްވާފައިވާ ޙައްޤު އަދާ ނުކުރާ މީހާއަށް، އެ ދުވަސް އަބާއްޖަވެރި ދުވަހަކަށް ވާނެއެވެ. ކީރިތި ރަސޫލާ ވަނީ މި ވަގުތުގައި އެކަލޭގެފާނުގެ އުއްމަތަށް ބަރަކާތް ލެއްވުން އެދި ވަޑައިގެން ދުޢާ ކުރައްވާފައިވެއެވެ. ވަގުތުގެ ބަރަކާތުން އިންސާނާ މަޙުރޫމު ކުރެވޭތޯ، ޝައިޠާނާ ގަދައަޅައި މަސައްކަތް ކުރާނެތެވެ. އޭނާއަށް ރޭގަނޑު ހޭލައި ހުރެ، މަޖާކުރުން ޒީނަތްތެރިކޮށްދީ، ފަތިހު ތެދުވިޔަ ނުދިނުމަށް، އެ ޝައިޠާނާ މަސައްކަތް ކުރާނެތެވެ. މި ފަދަ މީހާގެ ގާތަށް ނިދި އަންނާނީ ފަތިސް ނަމާދުގެ ވަގުތު ކައިރިވުމުންނެވެ. މި މީހާއަށް ފަތިސް ނަމާދު ވެސް އަދި ދުވާލުގެ ފެށުން ވެސް ގެއްލުނީއެވެ. ހިތާމައިގެ ކޮޅެއް ވެސް ނެތެވެ. ވީމާ ދުވާލުގެ ފެށުމުގައި ލިބޭ ދެ ޣަނީމާ ހޯދުމަށް މަސައްކަތްކުރާ ހީވާގި މުރާލި ބަޔަކަށް ބަޔަކަށްވާށެވެ.
– ހުކުރު ޚުޠުބާގައި ވިދާޅުވިއެވެ.
