އިރާނުގެ އާ ރައީސް އިބުރާހިމް ރައީސީ އޭނާގެ އާ ކެބިނެޓް އެކުލަވާލާ، ކެބިނެޓަށް ގާނޫނުހަދާ މަޖިލިހުގެ ރުހުން ހޯދުމަށް ހުށަހަޅުއްވައިފި ކަމަށް، އިރާނުގެ ރަސްމީ ނޫސް އޭޖެންސީ، އިރްނާއިން ރިޕޯޓު ކޮށްފިއެވެ.
ރައީސީ އިރާނުގައި ފާއިތުވެދިޔަ ޖޫންމަހު ބޭއްވުނު ރިޔާސީ އިންތިޚާބު ކާމިޔާބު ކުރައްވާ، ރައީސްކަމުގެ ހުވާ ކުރައްވާފައިވަނީ ފާއިތުވެދިޔަ ހަފްތަގާއެވެ.
އިރާނުގެ ވެރިކަމުގެ އޮނިގަޑު ހަމަޖެހިފައި އޮންނަ ގޮތުން، ގާނޫނުހަދާ މަޖިލިހުގެ ރުހުން ރައީސީ އައްޔަންކުރާ ކެބިނެޓަށް އޮންނަން ޖެހެއެވެ.
އިރާނުގެ ގާނޫނުހަދާ މަޖިލިހަކީ، އާންމު ގޮތެއްގައި އެގައުމުގެ ރައީސްއާއި ފިކުރުގެ ގޮތުން އެއްގޮތް ތަނަކަށް ވާތީ، ރައީސީ ހުށަހަޅުއްވާ ކެބިނެޓަށް މަޖިލީހުން ގޮންޖެހުމެއް ކުރިމަތިވެދާނެ ކަމަކަށް ނުބެލެވެއެވެ.
ކެބިނެޓަށް ރައީސީ އައްޔަން ކުރެވި ބޭފުޅުންގެ ތެރޭގައި އެންމެ މުހިންމު ބޭފުޅެއްގެ ގޮތުގައި ފާހަގަވެގެން ދަނީ، އިރާނުގެ ބާރުގަދަ ރިވޮލިއުޝަނަރީ ގާޑް ކޯޕްސް (IRGC)އާއި ގާތް ގުޅުމެއް އޮންނަ ޑިޕްލޮމޭޓެއް ކަމުގައިވާ ހުސެއިން އާމިރު-އަބުﷲއަން އެވެ. އެނާ ހަމަޖައްސަވާފައި ވަނީ، އިރާނުގެ ޚާރިޖީ ވަޒީރުގެ މަގާމަށެވެ. މިހާތަނަށް އިރާނުގެ ޚާރިޖީ ވަޒީރަކަށް ހުންނެވީ މުހައްމަދު ޖަވާދު ޒާރިފްއެވެ.
އިރާނުގެ ރަސްމީ ނޫސް އޭޖެންސީ އިރްނާއިން ހާމަ ކޮށްފައިވާ ގޮތުގައި، އިބުރާހިމް ރައީސީ އެގައުމުގެ ތެލާބެހޭ ވަޒީރަކަށް ޖަވާދު އޮވްޖީ އައްޔަން ކުރައްވާފައިވައިރު، އިންޓިރިއަރ މިނިސްޓަރަކަށް ހަމަޖައްސަވާފައިވަނީ އަހުމަދު ވަހީދީ އެވެ. ތެލާބެހޭ ވަޒީރަކަށް ހަމަޖެއްސެވި އޮވްޖީއަކީ މިހާތަނަށް ތެލާބެހޭ ވަޒީރުގެ ނާއިބުގެ މަގާމުގެ އިތުރުން ދައުލަތުގެ ގޭސް ކުންފުނީގެ މެނޭޖިންގ ޑިރެކްޓަރުގެ މަގާމްވެސް އަދާ ކުރައްވަމުން ގެންދެވި ބޭފުޅާއެވެ. އަދި ވަހީދީއަކީ އިރާނުގެ ކުރީގެ ޑިފެންސް މިނިސްޓަރުކަން ކުރައްވާފައިވާ ބޭފުޅެކެވެ. އޭގެ އިތުރުން އޭނާވަނީ، އިރާނުގެ ބާރުގަދަ ރިވޮލިއުޝަނަރީ ގާޑް ކޯޕްސް (IRGC)ގެ ގައުމުން ބޭރުގެ ކަންކަމާބެހޭ ގޮފި، ޤުދުސް ފޯސްގެ އެންމެ އިސްވެރިޔާގެ މަގާމްވެސް އަދާ ކުރައްވާފައިވާ ބޭފުޅެކެވެ.
ރައީސީގެ ކެބިނެޓްގެ އިންޓެލިޖެންސް މިނިސްޓަރަކަށް ހަމަޖައްސަވާފައިވަނީ، އެގައުމުގެ ޖުޑިޝަރީގެ އިންޓެލިޖެންސް ޔުނިޓްގެ އެންމެ އިސްވެރިޔާގެ މަގާމް ކުރިން އަދާކުރެއްވި، ދީނީ އިލްމުވެރިއެއް ކަމުގައިވާ އިސްމާއިލް ޚަތީބެވެ. އިރާނުގެ މީޑިއާއިން ހާމަ ކޮށްފައިވާ ގޮތުގައި، ޚަތީބީ ކުރިންވަނީ ސުޕްރީމް ލީޑަރުގެ އޮފީހުގައިވެސް މަސައްކަތް ކުރައްވަފައެވެ.
