ދުވަސްތަކަކަށްފަހު މަޝްހޫރު ބަތަލާ ޕްރިޔަންކާ ޗޯޕްރާ ބޮލީވުޑްގެ ފިލްމަކުން ފެންނާނެކަން ކަށަވަރު ކޮށްދީފިއެވެ.
ބޮލީވުޑާއި ހޮލީވުޑްގައިވެސް ބޮޑު މަގުބޫލުކަމެއް ހޯދާފައިވާ ޕްރިޔަންކާ އެންމެ ފަހުން ފެނިގެން ދިޔަ ހިންދީ ފިލްމަކީ 2019 ވަނަ އަހަރު ފަރްހާން އަޚްތަރާއެކު ފެނިގެންދިޔަ ފިލްމް "ދަ ސްކައި އިޒް ޕިންކް" އެވެ. މީގެއިތުރުން އިނގިރޭސި ބަހުން މިއަހަރު ނެރުނު " ދަ ވައިޓް ޓައިގާ" އިން ވެސް ޕްރިޔަންކާ ވަނީ ފެނިފައެވެ
ޕްރިޔަންކާ އެނބުރި ބޮލީވުޑަށް އަންނަ ފިލްމަކީ ވެސް ފަރްހާން އަހުތަރުގެ ފިލްމެކެވެ. އެގޮތުން އޭނާ ލިޔެ، ޑައިރެކްޓްކޮށް ޕްރޮޑިއުސްކުރާ ފިލްމުގެ ނަމަކީ ނަމަކީ "ޖީލޭ ޒަރާ" އެވެ.
މި ފިލްމް އިއުލާން ކުރުމުން އިންސްޓަގްރާމުގައި ފޮޓޯއެއް ޕޯސްޓްކޮށް ޕްރިޔަންކާ ބުނެފައިވަނީ މިއީ ކެޓްރީނާ އާއި އާލިއާއާއެކު ކުރި ފޯންކޯލަކުން ކުޅުމަށް ނިންމި ފިލްމެއްކަމަށެވެ. 2020 ގައި މި ފިލްމާއި ބެހޭގޮތުން މަޝްވާރާ ކުރުމަށް މި ތިން ތަރިން ބައްދަލުކުރި ކަމަށް ވެސް ޕްރިޔަންކާ ބުނެފައިވެއެވެ.
View this post on Instagram
ޕްރިޔަންކާ އޭނާގެ އެކްޓިންގ ކެރިއަރ ފަށާފައިވަނީ މީގެ 19 އަހަރުކުރިން 2002 ވަނަ އަހަރު ތަމަޅަ ފިލްމަކުންނެވެ. އޭގެ ފަހުން ޖެހިގެން އައި އަހަރު ހިންދީ ސިނަމާއަށް ތަޢާރަފްވެ ވޭތުވެދިޔަ މުއްދަތުގައި އޭނާ ވަނީ އެތައް ކުރިއެރުންތަކެއް ހޯދައި ހޮލީވުޑްގައިވެސް ފައިތިލަ ސާބިތުކޮށްފައެވެ.
ހޮލީވުޑްގެ ލަވަކިއުންތެރިޔާ ނިކް ޖޯނަސް އާއި 2018 ގައި ކައިވެނި ކުރިފަހުން ޕްރިޔަންކާ އުޅެމުންދަނީ ލަންޑަނުގައެވެ. ގާތްގަޑަކަށް 3 އަހަރުގެ ބޮޑު މެދުކެނޑުމަށްފަހު އަލުން ޕްރިޔަންކާ ހިންދީ ފިލްމަކުން ފެނިގެން ދާއިރު ޕްރިޔަންކާ އަކީ ސޯޝަލް މީޑީއާގައި ވަރަށް ހަރަކާތްތެރި ތަރިއެކެވެ.
"ޖީލޭ ޒަރާ" އަކީ އަންހެން ރަހުމަތްތެރިންތަކެއްގެ ރޯޑް ޓްރިޕެއް ދައްކުވައިދޭނެ ފިލްމެކެެވެ. މިފަދަ އިތުރު ދެ ފިލްމްއެއް މީގެ ކުރިން ފެސް ފަރްހާން ވަނީ ހަދާފައެވެ. އެއީ "ދިލް ޗާހަތާހޭ" އާއި "ޒިންދަގީ ނާ މިލޭގީ ދުބާރާ" އެވެ.
"ޖީލޭ ޒަރާ" ރިލީޒް ކުރުމަށް ހަމަޖެހިފައިވަނީ 2023 ގައިއެވެ.
