ނެޝަނަލް ޑިމޮކްރަޓިކް ކޮގްރެސްގެ ނަމުގައި އިތުރު ސިޔާސީ ޕާޓީއެއް އުފެއްދުމުގެ ހުއްދަ އިލެކްޝަން ކޮމިޝަނުން ދެއްވައިފިއެވެ.
އިލެކްޝަން ކޮމިޝަނުން ހުއްދަ ދިންކަން ހާމަކޮށް މިޕާޓީ އުފެއްދުމުގައި އިސްކޮށް ހަރަކާތްތެރިވާ ނެޝަނަލް އިންޓަރ ގްރިޓީ ކޮމިޝަންގެ ކުރީގެ މެމްބަރު ޔޫސުފް މާނިއު ކުރެއްވި ޓްވީޓްގައި ވިދާޅުވީ ސިޔާސީ ޕާޓީއެއްގެ ގޮތުގައި ރަޖިސްޓްރީ ކުރުމުގެ ހުއްދަ އިލެކްޝަނުން ދީފައިވާއިރު، މާދަމާ ހެނދުނު 11 ޖަހާއިރަށް ސެޓްފިކެޓާއި ހަވާލުވުމަށް ދައުވަތު ދެއްވާފައިވާކަމަށެވެ.
Alhamdulilaahi. Just got confirmation that National Democratic Congress (NDC) has been granted permission to register as a political party and tomorrow at 11am EC will hand over the registration certificate.
— Maaniu ® (@yoosufmaaniu) October 26, 2020
އިލެކްޝަންސް ކޮމިޝަނުގެ ދަފްތަރުގައި ހިމެނޭ ސިޔާސީ ޕާޓީތަކާއި އެ ޕާޓީތަކުގައި މެންބަރުން ތިބި އަދަދު އެ ކޮމިޝަނުން ވަނީ މިދިޔަ މަހުގައި ހާމަކޮށްފައެވެ. އިލެކްޝަންސް ކޮމިޝަނުން ހާމަކޮށްފައިވާ ތަފާސްހިސާބަށް ބަލާއިރު ސިޔާސީ ޕާޓީތަކުގެ ދަފްތަރުގައި 10 ސިޔާސީ ޕާޓީއެއް ރަޖިސްޓަރ ކޮށްފައިވެއެވެ. އޭގެ ތެރެއިން އެންމެ ގިނަ މެންބަރުން ތިބީ ވެރިކަންކުރާ މައި ޕާޓީ އެމްޑީޕީގައެވެ. އެގޮތުން އެ ޕާޓީގައި 52،952 މެންބަރުން ތިބިކަމަށް އިލެކްޝަންސް ކޮމިޝަނުން ވިދާޅުވެއެވެ. އެމްޑީޕީ ފިޔަވައި ދެން އެންމެ ގިނަ މެންބަރުން ތިބީ އިދިކޮޅު ޕީޕީއެމްގައެވެ. އެ ޕާޓީގައި 37،144 މެންބަރުން އެބަތިއްބެވެ.
ސިޔާސީ ޕާޓީތަކުގައި މެންބަރުން ތިބި އަދަދަށް ބަލާއިރު:
– ދިވެހި ރައްޔިތުންގެ ޕާޓީ: 2،902
– ދިވެހި ރައްޔިތުންގެ ޑިމޮކްރަޓިކް ޕާޓީ: 52،952
– އަދާލަތު ޕާޓީ: 6،640
– ޖުމްހޫރީ ޕާޓީ: 13،825
– މޯލްޑިވްސް ރިފޯމް މޫވްމަންޓް: 3،023
– ޕްރޮގްރެސިވް ޕާޓީ އޮފް މޯލްޑިވްސް: 37،144
– މޯލްޑިވްސް ޑިވެލޮޕްމަންޓް އެލަޔަންސް: 8،178
– މޯލްޑިވްސް ލޭބާ އެންޑް ސޯޝަލް ޑިމޮކްރަޓިކް ޕާޓީ: 2،881
– މޯލްޑިވްސް ތާޑްވޭ ޑިމަކްރެޓްސް: 3،171
– ޕީޕަލްސް ނެޝަނަލް ކޮންގްރެސް: 4،004
އިލެކްޝަންސް ކޮމިޝަނުން ސިޔާސީ ޕާޓީތަކުގެ ދަފްތަރު އާންމުކޮށްފައިވަނީ އެ ކޮމިޝަނަށް ލިބިފައިވާ އެންމެ ފަހުގެ މަޢުލޫމާތުތައް އަޕްޑޭޓް ކުރުމަށް ފަހުގައި ކަމަށް އިލެކްޝަންސް ވަނީ ބުނެފައެވެ.
ކޮމެންޓު ފޮނުވާ