އިންޑިއާގެ މަޝްހޫރު ރެޕް ލަވަކިއުންތެރިއާ ޔޯޔޯ ހަނީ ސިންގް އާއި ދެކޮޅަށް އޭނާގެ އަނބިމީހާ ޝާލިނީ ތަލްވާރު ކޯޓަށް މައްސަލަ ހުށައަޅައިފިއެވެ.
ޔޯޔޯ ހަނީ ސިންގް އާއި ދެކޮޅަށް ގެވެށި އަނިޔާގެ މައްސަލަ ޝާލިނީ ހުށައަޅާފައިވަނީ މުމްބާއީ ޓިސް ހަޒާރީ ކޯޓަށެވެ. އަންގާރަ ދުވަހު ކޯޓަށް ޝާލިނީ ހުށަހެޅި މައްސަލައިގައި އޭނާ ވަނީ ގިނަ ތުހުމަތު ތަކެއް ކޮށްފައިއެވެ. އޭގެ ތެރޭގައި ހަރަދު ނުދިނުމާއި، ގެވެށި އަނިޔާ ކުރުމާއި އަދި ހިލޭ އަންހެނުންނާއި ހަނީ ސިންގް ގުޅުން އޮންނަކަމުގެ ތުހުމަތު ކޮށްފައިވެއެވެެެ.
މި މައްސަލަތަކުގައި ބަދަލެއްގެ ގޮތުން 10 ކްރޯޑް އިންޑިއާ ރުޕީސް ނަގައިދޭންވެސް އެދިފައިވެއެވެ. މި މައްސަލަ ކޯޓުން ބަލައި ގަނެ، މިކަމާ ގުޅިގެން ޔޯޔޯ ހަނީ ސިންގަށް ނޯޓިސް ފޮނުވައި، ނޯޓިހަށް މި މަހުގެ 28 ގެ ކުރިން ޖަވާބު ދޭން އަމުރުކޮށްފައިވެ އެވެ.
View this post on Instagram
ޔޯޔޯ ހަނީ ސިންގްއާ ޝާލިނީ ކައިވެނި ކޮށްފައިވަނީ 2011 ވަނަ އަހަރުއެވެ. ނަމަވެސް މި ގުޅުމުގެ ވާހަކަ މީޑިއާ އަށް ތިލަވެފައިވަނީ 2014 ވަނަ އަހަރުއެވެ. އޭނާ ވަނީ އެ އަހަރު ގެނެސްދިން ރިއަލިޓީ ޝޯވްއެއް ކަމުގައިވާ "އިންޑިއާ ރޯސްޓާ"ގައި ފޭނުންނަށް ޝާލިނީ ތާއާރަފް ކޮށްދީފައެވެ.
ޔޯޔޯ ހަނީ ސިންގް ވަނީ ހިޓު ގިނަ ލަވަތަކެއް ކިޔައި އާންމުންގެ މަގުބޫލު ކަން ހޯދާފައެވެ. އޭނާ އެންމެ ފަހުން ކިޔާފައިވަނީ "ސައިޔާން ޖީ" އެވެ.
