ރާއްޖޭގައި ކޯވިޑްގެ ހާލަތު ނިއު ނޯމަލް ހާލަތަކަށް ގެނެވިފައިވާކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވި ނަމަވެސް ރާއްޖޭގެ ހާލަތު ނިއުނޯމަލް ނުވާކަމަށް ރައްޔިތުންގެ މަޖިލީހުގެ މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑޭ) ވިދާޅުވެއްޖެއެވެ.
ރާއްޖޭގައި ކޯވިޑްގެ ހާލަތު ނިއު ނޯމަލް ހާލަތަކަށް ގެނެވިފައިވާކަމަށާއި މިހާރު އެންމެ މުހިއްމީ ވެކްސިންޖެހޭ އާބާދީއަށް ވެކްސިންޖެހުން ކަމުގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު ވަނީ އިއްޔެ ވިދާޅުވެފައެވެ.
ރައީސް މިހެން ވިދާޅުވެފައިވާއިރު، ރާއްޖޭގައި ދެމުންދާ ބައެއް ޚިދުމަތްތައް ކޯވިޑް-19އާއި ގުޅިގެން ދަނީ މެދުކަނޑާލަމުންނެވެ. ބޮންޑޭ ވިދާޅުވީ ފްލެޓްތަކުގެ އެގްރިމަންޓުގައި ސޮއިކުރުން ކޯވިޑް-19 އާއި ގުޅިގެން މެދު ކަނޑާލަން ޖެހުމާއި، އެނޫންވެސް އަސާސީ ޚިދުމަތްދޭ ތަންތަނުން ދޭ ޚިދުމަތްތައް ދެވޭނެ ގޮތެއްނެތި މެދު ކަނޑާލަން ޖެހުމަކީ ކޯވިޑްގެ ހާލަތު ނިއުނޯމަލް އަކަށް ދިއުން ނޫންކަމަށެވެ.
ކޮވިޑަށް ޕޮޒިޓިވް ވެގެން ފްލެޓް ހަވާލު ކުރުން މެދުކަނޑާލުން، ކާޑު ގުދަނުގެ މުއްޒަފަކު ޕޮސިޓިވް ވެގެން ކާޑު ދޫކުރުން ހުއްޓާލުން ފެންކުންފުނި މުއައްޒަފުކު ޕޮސިޓިވް ވެގެން ފެނުގެ ހިދުމަތް މެދުކަނޑާލުމަކީ ރާއްޖެ ނިއުނޯމަލް އަށް ގެނައުމެއް ނޫން.
– ބޮންޑޭ ވިދާޅުވިއެވެ.
ހިޔާ ފްލެޓް އެއްބަސްވުންތަކުގައި ސޮއިކުރުމުގެ މަސައްކަތުގައި ހަރަކާތްތެރި ވަމުންދިޔަ، އެޗްޑީސީގެ މުވައްޒަފަކު ކޯވިޑް-19 އަށް ޕޮޒިޓިވްވުމާއި ގުޅިގެން، ސޮއިކުރުން ވަގުތީ ގޮތުން މެދު ކަނޑާލައިފައެވެ. އީދު ބަންދާއި، ޖުލައި ސައްބީސް ބަންދަށްފަހު ހިޔާ ފްލެޓް އެއްބަސްވުންތަކުގައި ސޮއިކުރަން ފަށާފައިވަނީ މިދިޔަ މަހުގެ 27 ވަނަ ދުވަހުއެވެ. އެޗްޑީސީން މިއަދު ވިދާޅުވީ އެއްބަސްވުންތަކުގައި ސޮއިކުރުމުގެ މަސައްކަތް ކުރިއަށް ދަނިކޮށް، ސޮއިކުރުމުގެ މަސައްކަތުގައި ހަރަކާތްތެރި ވަމުންދިޔަ، އެޗްޑީސީގެ މުވައްޒަފަކު ކޯވިޑަށް ޕޮޒިޓިވްވުމާއި ގުޅިގެން، ފްލެޓް އެއްބަސްވުމުގައި ސޮއިކުރުމުގެ މަސައްކަތް މެދުކަނޑާލާފައިވާ ކަމަށެވެ.
މުވައްޒަފަކުކު ޕޮޒިޓިވްވުމުން މިއަދު ސޮއިކުރަން ތާވަލް ކުރެވިފައިވާ މީހުން ސޮއިކުރުން ވަގުތީގޮތުން ވަނީ މެދު ކަނޑާލާފައެވެ. އެއްބަސްވުންތަކުގައި ސޮއިކުރުމުގެ ކަންތައްތައް އަލުން ފަށާނެ ތާރީޚެއް ހެލްތު ޕްރޮޓެކްޝަން އެޖެންސީއާއި މަޝްވަރާ ކުރުމަށްފަހު އިއުލާންކުރާނެކަމަށް އެޗްޑީސީން ވިދާޅުވެއެވެ.
ރައީސުލްޖުމްހޫރިއްޔާ ވިދާޅުވީ ކޯވިޑް-19 ކޮންޓްރޯލްކުރުމަށް ސަރުކާރާއި ކަމާބެހޭ ހުރިހާ ފަރާތްތައް ގުޅިގެން ކުރަމުންގެންދާ މަސައްކަތްތަކާއެކު މިހާރު "ނިއު ނޯމަލް"އަކަށް ރާއްޖޭގެ ހާލަތު ގެނެވިފައިވާކަމަށެވެ. އަދި ކޮވިޑްގެ ޙާލަތު ނިއު ނޯމަލް ހާލަތަށް ބަދަލުވެފައިވާކަން ފާހަަގަކުރައްވައި މިހާރު އެންމެ މުހިންމީ ވެކްސިންޖެހޭ އާބާދީގެ ހުރިހާ ފަރާތްތަކުން ވެކްސިންގެ ދެ ޑޯޒް ފުރިހަމަކުރުންކަމަށް ރައީސް ވިދާޅުވިއެވެ. ރައީސުލްޖުމްހުރިއްޔާ ވަނީ ވެކްސިން ޖެހޭ އާބާދީގެ ހުރިހާ ފަރާތްތަކުން ވެކްސިންޖަހައި ނިންމުމަށް ބާރުއަޅައި ސަރުކާރުގެ ވުޒާރާތަކާއި އެކި އިދާރާތަކާއި ސަރުކާރު ހިއްސާވާ ކުންފުނިތަކާއި އަދި އަމިއްލަ ކުންފުނިތަކުންވެސް މަސައްކަތްކޮށްދެއްވުމަށް އެދިވަޑައިގަންނަވާފައެވެ.
މިއަހަރުގެ މިނިވަން ދުވަހުގެ މުނާޞަބަތުގައި ޤައުމާ މުޚާޠަބުކުރައްވާ ރައީސުލްޖުމްހޫރިއްޔާ ދެއްވި ޚިޠާބުގައިވަނީ މިމަހުގެ ނިޔަލަށް ރާއްޖޭގެ އެންމެންނަށް ކޯވިޑް-19 އިން ދިފާޢުވުމަށް ވެކްސިން ޖަހާ ނިންމުމަކީ އަމާޒެއްކަމަށް ވިދާޅުވެފައެވެ. އެގޮތުން ސަރުކާރުގެ އަމާޒަކީ ވެކްސިން ޖަހާ އުމުރުގެ %90 މީހުންނަށް އޮގަސްޓު މަހުގެ ނިޔަލަށް ވެކްސިން ޖެހުން ކަމަށެވެ. މި މަސައްކަތުގެ ދަށުން މިދިޔަ ހޮނިހިރު ދުވަހު ވަނީ ވެކްސިންގެ ބޮޑު ޕްރޮގްރާމެއް ފަށާފައެވެ.
މި އޮގަސްޓް މަހުގެ 1 ވަނަ ދުވަހުގެ ނިޔަލަށް ކޮވިޑް-19ގެ ވެކްސިންގެ ދެވަނަ ޑޯޒް 271552 ފަރާތަކުން ފުރިހަމަކޮށްފައިވެއެވެ. އަދި ވެކްސިންގެ ފުރަތަމަ ޑޯޒް ފުރިހަމަކޮށްފައި ވަނީ 323568 ފަރާތެކެވެ.
