އެމްއެމްއޭ ކުރިމަތިން އަތޮޅުތަކަށް ދަތުރުކުރާ ފެރީތަކަށް ލަފާ ފުރާ ސަރަހައްދުގައި ޓެކްސީ މަޑުކުރާނެ ޖާގައެއް ހެދުމުގެ މަސައްކަތް މާލޭ ސިޓީ ކައުންސިލުން ފަށައިފިއެވެ.
ސިޓީ ކައުންސިލުން ބުނީ މި ސަރަހައްދަކީ ގިނަ ބަޔަކު ލަފާ ފުރާ ސަރަހައްދަކަށް ވެފައި މިތަނުގެ ތަރުތީބެއް ނެތުމުގެ ސަބަބުން ލަފާ ފުރާ ފަރާތްތަކާ އަދި ވެހިކަލް ދުއްވާ ފަރާތްތަކަށްވެސް ދަތިތަކާ ކުރިމަތިވުމުގެ އިތުރުން ނުރައްކާތެރި ހާދިސާއެއް ހިނގުމަށްވެސް މަގުފަހިވާނެކަމަށް ފެންނާތީ އެކަންކަން ހައްލުކޮށް ފަސޭހަ އިންތިޒާމްތަކެއް ހަމަޖެއްސުމުގެ ބޭނުމުގައި ފެށި މަސައްކަތެއް ކަމަށެވެ.
ޓެކްސީ މަޑުކުރާނެ ޖާގަ ހަދަނީ މާލޭގެ އުތުރުފަރާތުން އިއްޒުއްދީން ފާލަމުގެ ހުޅަނގުން އެމްއެމްއޭ ކުރިމައްޗަށް ވާގޮތަށް އޮންނަ ސަރަޙައްދުގައެވެ. މިއީ އަތޮޅު ތަކުން މާލެއަންނަ އަދި ރަށްރަށަށް ފުރާ ގިނަ ފަރާތްތައް ބޭނުންކުރާ ސަރަހައްދެކެވެ.
އެގޮތުން އެކިއެކި ބަންދުތަކާ ގުޅިގެން މި ސަރަޙައްދު ބާރުބޮޑުވެ ތޮއްޖެހުން އިތުރުވެގެންދާ ކަމަށާއި، މިކަމުގެ ސަބަބުން މަގު ތޮއްޖެހި ދަތުރުވެރިން ޓެކްސީތަކަށް އެރުމުގައި ދަތިތައްކުރިމަތިވެ، ޓެކްސީ މަޑުކުރުމާއި މަގުބޭނުންކުރާ އެހެން ވެހިކަލްތަކަށްވެސް ދަތިތައް ކުރިމަތިވާކަމަށް ސިޓީކައުންސިލުން ބުނެއެވެ.
މާލެ ސިޓީގެ އާންމު ތަންތަން ބޭނުންކުރާ ފަރާތްތަކަށް ފަސޭހަ ގޮތްތައް ހަމަޖެއްސުމަށް ސިޓީ ކައުންސިލުން އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން ޕާކިންގް ޒޯންތައް ހަދައި މަގުތައް ތަރުތީބުކުރުމުގެ މަސައްކަތް މުހިއްމުކަމެއްގެގޮތުގައި ސިޓީ ކައުންސިލުން އަންނަނީ ކުރަމުންނެވެ.
