މާލޭ ސިޓީގެ މަގުތަކުގައި ހަލާކުވެގެން މަގުމައްޗަށް ދޫކޮށްފައިވާ އެއްގަމު އުޅަނދުތަކާއި ނުދުއްވާ ގިނަދުވަސްވެފައިވާ އުޅަނދުތައް ނެގުމުގެ މަސައްކަތް މިއަދު ފަށައިފިއެވެ.
ހަތަރު ފުރޮޅުލީ އުޅަނދު ނެގުމުގެ މަސައްކަތް ފަށާފައިވަނީ މައްޗަންގޮޅި ފާށަނާކިލެގެފާނުމަގުންނެވެ. ދެ ފުރޮޅުލީ އުޅަނދުފަހަރު ނެގުމުގެ މަސައްކަތް ފަށާފައިވަނީ މައްޗަންގޮޅި ނިކަގަސްމަގުންނެވެ. މާލޭ ސިޓީ ކައުންސިލުން މި މަސައްކަތްކުރަނީ ފުލުހުންނާއި ގުޅިގެން ޢަމަލީ ގޮތުން ފުލުހުންގެ ބައިވެރިވުމާއެކުގައެވެ.
Male thereygai ukaalaafai, beynun nukurevey haalathugaihuri vehicle thah negumuge khaassa operation eh @PoliceMv aa @MaleCitymv gulhigen miadhu vanee feshifai. pic.twitter.com/oc15qTrMbn
— Dr Mohamed Muizzu (@MMuizzu) August 2, 2021
މާލޭ ސިޓީ ކައުންސިލްގެ ފަރާތުން ނަގައި ނައްތާލުމުގައި ފުރަތަމަ ބަލާނީ މިކަމަށް ކުރި ސަރވޭ ރިޕޯޓްތަކުން ދައްކާ އުޅަނދުތައްކަމަށް މާލެ ސިޓީ ކައުންސިލުން ބުންޏެވެ. އެ ސަރވޭކޮށްފައިވަނީ 22 ޖޫން 2021 އިން 27 ޖޫން 2021 އަށެވެ. ރިޕޯޓްގައިވާގޮތުން ގަލޮޅުން 20 އުޅަނދު، މައްޗަންގޮޅިން 43 އުޅަނދު، ހެންވޭރުން 34 އުޅަނދު އަދި މާފަންނުން 62 އުޅަނދު ނައްތާލަންޖެހޭކަމަށް ވަނީ ފާހަގަކޮށްފައެވެ.
މަގުތަކުގައި ގިނަދުވަސްވެފައިހުރި އުޅަނދުތައް ނަގައި ސާފުކުރަނީ
މާލޭސިޓީގެ މަގުމަތީގައި ހިނގާ ބިނގާވެއުޅޭ ފަރާތްތަކާއި، ވެހިކަލް ދުއްވާ ފަރާތްތަކަށް ދަތިވާގޮތަށް ބަހައްޓާފައި ހުންނަ އެއްގަމު އުޅަނދު ފަހަރާއި އަދި ހަލާކުވެ، ނުދުއްވާ ހުންނަތާ ގިނަދުވަސްވެފައިވާ އުޅަނދު ފަހަރު މި މަސައްކަތުގެ ދަށުން ނަގާނެކަމަށް ސިޓީ ކައުންސިލުން ބުންޏެވެ. އެހެންކަމުން މަގުމަތީގައި އެގޮތަށް ބަހައްޓާފައި ހުރި އެފަދަ އެއްގަމު އުޅަނދު ފަހަރު ނެގުމަށް އިއުލާންގައި ބަޔާންކޮށްފައިވެއެވެ. އުޅަނދު ފަހަރުގެ ވެރިފަރާތުން ނުނަގާ ހުންނަ އެއްގަމު އުޅަނދުފަހަރު ” އެއްގަމު އުޅަނދު ޕާކު ކުރުމުގެ ގަވައިދު ” ގެ ދަށުން ނަގައި ނައްތާލާ ގޮތައް ވަނީ ހަމަޖެހިފައިކަމަށް ސިޓީ ކައުންސިލުން ބުންޏެވެ. މި ގޮތައް ނެގުމުގައި އުޅަނދާއި ތަކެއްޗަށް ލިބޭ ގެއްލުމާއި އެ އުޅަނދަކުން މަދުވާ ބާވަތްތަކަށް ސިޓީ ކައުންސިލުން ޒިންމާ ނުވާނެކަމަށްވެސް ބުނެފައިވެއެވެ.
މިއަދު ފެށި މަސައްކަތްކުރިއަށް ގެންދިއުމަށް ބޭނުންވާ އުޅަނދުފަހަރު ފޯރުކޮށްދީފައިވަނީ ޕްލޭނިންގް މިނިސްޓްރީގެ ފަރާތުންކަމަށާއި، ހަފުތާއެއްގެތެރޭގައި އުޅަނދުތައް ނަގާ ނިންމުމަށް އަމާޒުކޮށްފައިވާ މަސައްކަތް ހަލުވިކުރުމަށް ބޭނުންވާ ވަޞީލަތްތައް ހޯދުމަށް ކުންފުނިތަކާ މިހާރުދަނީ ވާހަކަދެކެވެމުންކަމަށް ސިޓީ ކައުންސިލުން ބުންޏެވެ.
