ދިވެހި ގައުމުގެ މިނިވަންކަމާއި އިސްތިގުލާލު ގެއްލިދިއުމުގެ އެންމެ ބޮޑު ޒިންމާއެއް ނަގަން ޖެހޭނީ ރައްޔިތުންގެ މަޖިލީހުގެ އެމްޑީޕީއަށް ނިސްބަތްވާ 65 މެމްބަރުން ކަމަށް މާލޭ ސިޓީ ކައުންސިލްގެ ހުޅުމާލެ ދާއިރާގެ ކައުންސިލަރު އަދި އިދިކޮޅު ޕީއެންސީގެ ނައިބް ރައީސް އިބްރާހިމް ޝުޖާއު ވިދާޅުވެއްޖެއެވެ.
"މިނިވަންކަމުގެ ދިފާއުގައި ދިވެހީން"ގެ ނަމުގައި އިދިކޮޅު ޕްރޮގްރެސިވް ކޮންގްރެސް ކޯލިޝަނުން ފެށި ގައުމީ ކެމްޕެއިން އިފްތިތާހު ކުރުމަށް ރޭ ބޭއްވި ޖަލްސާގައި ވާހަކަފުޅު ދައްކަވަމުން ޝުޖާއު ވިދާޅުވީ، ރައްޔިތުންގެ މަޖިލީހުގެ އެމްޑީޕީއަށް ނިސްބަތްވާ 65 މެމްބަރުންނަކީ، ދިވެހިރާއްޖޭގައި އެކިއެކިި ނަންނަމުގައި ބޭރު ގައުމެއްގެ ސިފައިން ބޭތިއްބުމަށް އާނއެކޭ ބުނި މީހުންކަމަށެވެ. އަދި އެއީ ދިވެހި ރައްޔިތުންނަށް އޮޅުވާލި ބައެއް ކަމަށްވެސް ޝުޖާއު ވިދާޅުވިއެވެ.
" އެމީހުންނަކީ ދިވެހި ރާއްޖޭގައި ބޭރުގެ ސިފައިން ދަގަނޑު ތަޅާ މީހުންގެ ގޮތުގައި ބައިތިއްބަން އާނއެކޭ ބުނި މީހުން، އެމީހުންނަކީ ބޮޑުކައްކާއިންގެ ގޮތުގައި ނަން ބަދަލުކޮށްގެން ބޭރުގެ ސިފައިން މިގައުމުގައި ބައިތިއްބަން އާނއެކޭ ބުނި މީހުން"
– ޝުޖާއު
ބޭރުގެ ސިފައިން ރާއްޖޭގައި ތިބުމީ ގައުމުގެ މިނިވަންކަމާއި އިސްތިގުލާލު ގެއްލިގޮސްފައިވާކަމުގެ ހެއްކެއް ކަމަށް ވިދާޅުވެ ޝުޖާއު ވިދާޅުވީ، ތިލަދުން މައްޗަށް ރައީސް ޔާމިންގެ ވެރިކަމުގައި ގެންނަން މަސައްކަތްކުރެއްވި ޓްރާންޝިޕްމެންޓް ބަނދަރާއި އައިހެވަން މަޝްރޫޢު ހުއްޓުވީ ކޮންބައެއްގެ ނުފޫޒުންކަން ދިވެހި ރައްޔިތުންނާއި ތިލަދުންމަތީގެ ރައްޔިތުންނަށް އެނގޭ ކަމަށެވެ.
މީގެ އިތުރުން ކާގޯ ފެރީގެ ނަމުގައި ކުޅުދުއްފުއްޓާއި އިންޑިއާގެ ކޮޗިންއާ ދެމެދު ފަށާފައިވާ ފެރީ ދަތުރުތައް ފެށުމުގެ ކުރިން ތިލަދުންމައްޗަށް ނިސްބަތްވާ އެމްޑީޕީގެ މަޖިލީސް މެމްބަރުން ރައްޔިތުގެ ކައިރިއަށް ގޮސް ދެއްކީ ތަކެތީގެ އަގު ހެޔޮވާނޭ ކަމުގެ ހުވަފެނާއި، އެރައްޔިތުން އުފައްދާ ތަކެތި އެފެރީމެދުވެރިކޮށް ބޭރުކުރެވޭނޭކަމުގެ ހުވަފެން ކަމަށް ޝުޖާއު ވިދާޅުވިއެވެ. އެހެންނަމަވެސް އެމްޑީޕީގެ އެ މެމްބަރުން ހެއްދެވީ ކަނޑައެޅިގެން އިތުރުފުޅުކަން ތިލަދުންމަތީގެ ރައްޔިތުންނަށް މިހާރު ގަބޫލުކުރެވޭނެ ކަމަށް ޝުޖާއު ވިދާޅުވިއެވެ.
ހަނިމާދޫ އެއަރޕޯޓް ތަރައްޤީކުރުމުގެ ނަމުގައި ބޭރުގެ ބަޔަކު އެރަށަށް އަރުވައިގެން ފީތާ ދަމާލަ ދަމާލައި ތިބޭތާ 2 އަހަރު ދުވަސް ވެފައި ވާކަމަށާއި މިއީ މިނިވަން ގައުމަކުން ފެންނާނެ ކަންކަންތޯ ޝުޖާއު ވަނީ ސުވާލު އުފައްދާފަ އެވެ.
