ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ ސަރުކާރަށް، ރައީސް މައުމޫން ޢަބްދުލްޤައްޔޫމް ކުރެއްވި ތާޢީދު ޢަނބުރާ އޭރު ގެންދެވީ، ރައީސް ޔާމީން ގެންނަވަމުން ގެންދެވި ތަރައްޤީއާއި، "ލެގަސީ" ދުއްވާލުމަށްކަމަށް ވިދާޅުވެ، އިދިކޮޅު ކޯލިޝަން ހިންގެވުމާއި ހަވާލުވެ ހުންނެވި ޕީއެންސީގެ ރައީސް ޢަބްދުއްރަހީމް ޢަބްދުﷲ (އަދުރޭ) ބޮޑެތި ތުހުމަތުތަކެއް ކުރައްވައިފިއެވެ.
ރޭ ޕީޕީއެމްއާއި އަލަށް ގުޅުނު މެންބަރުންގެ ފޯމް ހަވާލުކުުރުމަށް ރޭ ޕީޕީއެމް އޮފީހުގައި ބޭއްވި ހަފްލާގައި ވާހަކަފުޅު ދައްވަމުން، އަދުރޭ ވަނީ ބޮޑެތި ތުހުމަތުތަކެއް ރައީސް މައުމޫނަށް އަމާޒުކުރައްވާފައެވެ. އަދުރޭ މިފަދަ ތުހުމަތުތަކެއް ކުރައްވާފައިމިވަނީ، ރައީސް ޔާމީނަކީ ޖަލުގައި އޮތް ބޭފުޅެއްކަމަށާއި، 2023ގެ ރިޔާސީ އިންތިޚާބުގައި އެމަނިކުފާނަށް ވާދަނުކުރެއްވޭނެކަމަށް ވިދާޅުވުމާއި ގުޅިގެންނެވެ.
އަދުރޭ ވިދާޅުވީ، ރައީސް ޔާމީންނާއި ރައީސް މައުމޫންގެ ގުޅުން ގޯސްވެފައިވަނިކޮށް 2016 އޮކްޓޫބަރ 7ގައި ރައީސް ޔާމީންގެ އެދިވަޑައިގަތުމަށް ރައީސް މައުމޫނާއި ބައްދަލުކުރެއްވިކަމަށެވެ. ރައީސް މައުމޫންގެ އޮފީހުގައި ބޭއްވެވި ބައްދަލުކުރެއްވުމުގައި، ރައީސް ޔާމީނާމެދު ރައީސް މައުމޫން އޮތް ކަންބޮޑުވުންތައް ހިއްސާކުރެއްވިކަމަށެވެ. އެގޮތުން މާލެ ހުޅުލެ ބްރިޖް އެޅުމާމެދުވެސް ސުވާލުކުރެއްވިކަމަށާއި، އެއަށްވުރެ މާ މުހިންމު ކަންކަނ ްހުރިކަމަށް ރައީސް މައުމޫން ވިދާޅުވިކަމަށް އަދުރޭ ހާމަކުރެއްވިއެވެ.
އަދި އެމަނިކުފާނުގެ ވެރިކަމުގައި މާލޭގައ ބޮޑު އިސްލާމީ މަރުކަޒެއް ބިނާކޮށްފައިވަނިކޮށް، "ކިންގް ސަލްމާން" މިސްކިތް ނަމުގައި އެހެން އިސްލާމީ މަރުކަޒެއް ބިނާކުރުމުގެ ބޭނުމެއް ނެތްކަމަށްވެސް ރައީސް މައުމޫން ވިދާޅުވިކަމަށް އަދުރޭ ވިދާޅުވިއެވެ. މީގެ އިތުރުން އެމަނިކުފާޏުގެ ވެރިކަމުގައި ހުޅުމާޅެ ހިއްކާފައިވަނިކޮށް، "ޒުވާނުންގެ ޝަހަރު"ގެ ނަމުގައި ހުޅުމާލެ ދެވަނަ ފޭސް ހިއްކުމުގެ ބޭނުމާމެދުވެސް ރައީސް މައުމޫން ސުވާލު އުފެއްދެވިކަމަށް އަދުރޭ ވިދާޅުވިއެވެ.
އެ ހުރިހާ ކަމަކީ ރައީސް މައުމޫންގެ ލެގަސީ ދުއްވާލުމަށް ރައީސް ޔާމީން ކުރައްވާ ކަންކަންކަމަށް ވިދާލުވެ ރައީސް މައުމޫން ކަންބޮޑުވުން ފާޅުކުރެއްވިކަމަށްވެސް އަދުރޭ ވިދާޅުވިއެވެ. އަދުރޭ ވިދާޅުވީ، އެ ވާހަކަތައް ދޮގުކުރައްވަން ރައީސް މައުމޫނަށް ކެރިވަޑައި ނުގަންނަވާނެކަމަށެވެ.
އަޅުގަނޑު ގާތުގައި ރައީސް މައުމޫން ވިދާޅުވީ ތިމަންނަގެ މައްސަލައަކީ މިއީއޭ. ތިމަންނަގެ 'ލެގަސީ' ދުއްވާލާށޭ ރައީސް ޔާމީން އެ މަސައްކަތް ކުރައްވަނީ. މަވެތި ކަމުގެ ކިހާ ރަނގަޅު މިސާލެއްތޯ މިއީ!
– ޢަބްދުއްރަޙީމް ޢަބްދުﷲ
އަދުރޭ ވިދާޅުވީ ޤައުމުގެހައްގުގައި މަސައްކަތްކުރައްވާކަމަށް ވިދާޅުވާ ލީޑަރުންހެ ހަގީގަތް ރައްޔިތުންނަށް ހާމަވާންޖެހޭކަމަށެވެ. އެގޮތުން ރައީސް މައުމޫންގެ އެވާހަކަތައް ރައްޔިތުންނާއި ހަމައަށް ގެންނަވަންޖެހުނީ އެހެންވެކަމަށްވެސް އަދުރޭ ވިދާޅުވިއެވެ.
ރައީސް ޔާމީންގެ ވެރިކަމުގައި ޕީޕީއެމްގެ އެތެރޭގައި އުފެދުނު ޚިޔާލުތަފާތުވުމުގެތެރެއިން، ރައީސް މައުމޫން ރައީސް ޔާމީނަށް އޮތް ތާޢީދު އަނބުރާ ގެންދެވިކަން ހާމަކުރެއްވީ، ޕީޕީއެމްގެ ހިންގުން އެޕާޓީގެ މުސްތަޝާރު ރައީސް ޔާމީނާއި ހަވާލުކުރެއްވުމަށް ސުޕްރީމް ކޯޓުން ޢަމުރުކުރެއްވުމުންނެވެ.
