އޭއެފްސީ ވިމެންސް އޭޝިއަން ކަޕަށް ތައްޔާރުވަމުން އަންނަ ރާއްޖޭގެ ގައުމީ އަންހެން ޓީމު ތަމްރީނުތައް ހެދުމަށް އަންނަ މަހު ޔުނައިޓެޑް އަރަބް އެމިރޭޓްސް (ޔޫއޭއީ) ގައި ކޭމްޕް ކުރާ ގޮތަށް ހަމަޖެހިއްޖެއެެވެ.
އެފްއޭއެމްގެ ރައީސް ބައްސާމް އަދީލް ޖަލީލް ކުރެއްވި ޓްވީޓެއްގައި ވިދާޅުވީ، ގައުމީ ޓީމުން ޔޫއޭއީއަށް ކޭމްޕަކަށް ދާން ތައްޔާރު ވެފައިވާ ކަމަށާއި، އެގައުމުގައި ޔޫއޭއީ އަންހެން ގައުމީ ޓީމާ ދެކޮޅަށް އެކުވެރިކަމުގެ ދެ މެޗު ކުޅެން ހަމަޖެހިފައިވާ ކަމަށެވެ.
އަންނަ އަހަރު އޮންނަ އޭއެފްސީ ވުމެންސް އޭޝިއަން ކަޕުގެ ކޮލިފައިން މެޗުތަކަށް ތައްޔާރުވަމުން އަންނަ ޤައުމީ އަންހެން ފުޓްބޯޅަ ޓީމު ވަނީ މިދިޔަ ހޯމަ ދުވަހު ބ.އޭދަފުށި އަންހެން ފުޓްބޯޅަ ޓީމާއެކު އެކުވެރިކަމުގެ ފުޓްބޯޅަ މެޗެއް ކުޅެފައެވެ. އޭދަފުށި ޓާފް ފުޓްބޯޅަ ދަނޑުގައި ކުޅުނު މި މެޗު ޤައުމީ ޓީމުން ކާމިޔާބުކުރީ 0-3 ގެ ނަތީޖާއަކުންނެވެ.
ގައުމީ އަންހެން ޓީމުން އޭއެފްސީ ވިމެންސް އޭޝިއަން ކަޕުގެ ކޮލިފައިންގައި ވާދަކުރާ މިއީ ތިންވަނަ ފަހަރެވެ. ރާއްޖެއިން އެންމެ ފަހުން ކޮލިފައިންގައި ވާދަކޮށްފަައިވަނީ 2010 ވަނަ އަހަރުގައެވެ. އަދި 2006 ގައި ވެސް ވަނީ ވާދަކޮށްފައެވެ. އެހެންކަމުން ރާއްޖެއިން އަނެއްކާވެސް ކޮލިފައިންގަައި މި ވާދަކުރަނީ 11 އަހަރަށްފަހުއެވެ.
މި އަހަރުގެ ސެޕްޓެމްބަރު މަހު ތަޖިކިސްތާނުގައި ބާއްވާ ކޮލިފައިން މެޗުތަކުގެ ތެރެއިން ރާއްޖެ ވާދަކުރަންޖެހެނީ ގްރޫޕް ބީގައެވެ. މި ގްރޫޕުގައި ދެން ހިމެނެނީ އަފްގާނިސްތާނާއި ތަޖިކިސްތާން އަދި ވިއެޓްނާމްއެވެ.
ޤައުމީ އަންހެން ފުޓްބޯޅަ ޓީމަށް ބޭރުގެ ކޯޗެެއް ހަމަޖެއްސުމުގެ މަސައްކަތް މިހާރު ކުރަމުން އަންނައިރު، މިވަގުތު ޓީމުގެ ފަރިތަކުރުންތައް ކުރަމުންދަނީ، އެފްއޭއެމްގެ ޓެކްނިކަލް ޑިރެކްޓަރު އަހުމަދު ޝަރީފް (ޑުންގާ) ގެ ބެލުމުގެ ދަށުންނެވެ.
ކޮމެންޓު ފޮނުވާ