އަންނަ ސީޒަނުގައިވެސް ރޮނާލްޑޯ ޔުވެންޓަސްގައި މަޑުކުރާނެ

އަންނަ ސީޒަނުގައިވެސް ޕޯޗުގަލުގެ ތަރި ކްރިސްޓިއާނޯ ރޮނާލްޑޯ ޔުވެންޓަސްގައި މަޑުކުރާނެ ކަމަށް އެ ޓީމުގެ ކޯޗު މަސިމިލިއާނޯ އެލެގްރީ ބުނެފިއެވެ.

މީގެ ކުރިން ބައެއް މީޑިއާތަކުން ވަނީ ރޮނާލްޑޯ އަލުން ރެއާލްލަށް ބަދަލުވުމުގެ ފުރުސަތު އޮތް ކަމަށް ރިޕޯޓުކޮށްފައެވެ. އަދި މި ފަހަރުގެ ޓްރާންސްފާ ބާޒާރުގައި ރޮނާލްޑޯ ހޯދަން އޭނާގެ ކުރީގެ ކުލަބު މެންޗެސްޓާ ޔުނައިޓެޑާއި ފްރާންސްގެ ޕީއެސްޖީންވެސް މަސައްކަތް ކުރަމުން އަންނަ ކަމަށް ވަނީ ރިޕޯޓުކޮށްފައެވެ.

ރެއާލް މެޑްރިޑަށް ނުވަ އަހަރު ކުޅެދިނުމަށްފަހު އުމުރުން 36 އަހަރުގެ ރޮނާލްޑޯ ޔުވެންޓަސްއަށް ބަދަލުވީ 2018 ވަނަ އަހަރުގެ ޖުލައި މަހުގެ ތެރޭގައި 100 މިލިޔަން ޔޫރޯއަށެވެ. އެފަހަރު ރޮނާލްޑޯ ވަނީ ޔުވެންޓަސްއާއެކު ހަތަރު އަހަރުގެ އެއްބަސްވުމެއް ހަދާފައެވެ. އެހެންކަމުން ރޮނާލްޑޯގެ އެއްބަސްވުން ހަމަވާނީ އަންނަ އަހަރެވެ.

ޔުވެންޓަސްގެ ބޯޑް އޮފް ޑިރެކްޓަރުންގެ ވައިސް ޗެއާމަން އަދި ކުރީގެ ކުޅުންތެރިޔާ ޕަވެލް ނެޑްވެޑް ވަނީ އަންނަ ސީޒަނުގައިވެސް ރޮނާލްޑޯ ޔުވެންޓަސްގައި މަޑުކުރާނެ ކަމަށް މީގެ ކުރިން ބުނެފައެވެ.  ދާދި ފަހުން ރޮނާލްޑޯ ޔުވެންޓަސްގެ ފަރިތަކުރުންތަކުގައި ބައިވެރިވާން ފަށާފައިވާއިރު، މީޑިއާއަށް ދިން އިންޓަވިއުއެއްގައި އެލެގްރީވެސް ވަނީ ރޮނާލްޑޯ އަންނަ ސީޒަނުގައިވެސް ފެންނާނީ ޔުވެންޓަސްއިން ކަމަށް ބުނެފައެވެ.

ޔުވެންޓަސްއަށް 2018 ވަނަ އަހަރު ރޮނާލްޑޯ ގެނައީ އަލެގްރީ ކޯޗުގެ މަގާމުގައި ހުއްޓައެވެ.