މިހާރު ޖަޕާނުގައި ކުރިޔަށްދާ ދުނިޔޭގެ އެންމެ ބޮޑު ކުޅިވަރު މުބާރާތް އޮލިމްޕިކްސް ކުޅިވަރު މުބާރާތުގައި ފިރިހެނުންގެ ފުޓްބޯޅަ އިވެންޓުގައި އެންމެ ފަހުގެ ޗެމްޕިއަން ބްރެޒިލް ކުއާޓާ ފައިނަލަށް ދިޔައިރު 2016 ވަނަ އަހަރު ފިރިހެނުންގެ ފުޓްބޯޅައިން ރިހި މެޑަލް ހޯދި ޖަރުމަނު ކަޓައިފިއެވެ.
ގޭމްސްގައި އިއްޔެ ބްރެޒިލް ކުއާޓާ ފައިނަލަށް ދިޔައީ ގުރޫޕްގެ ފަހު މެޗުގައި ސައުދީ އަރަބިއްޔާއާ ވާދަކޮށް 3-1 ލަނޑުން މެޗު ކާމިޔާބުކޮށްގެންނެވެ. ބްރެޒިލް މި މެޗުން މޮޅުވީ މެޗުގެ ފަހު ވަގުތުގައި އެވަޓަންއަށް ކުޅެމުން ރިކާލްސަން ކާމިޔާބުކުރި ދެ ލަނޑުންނެވެ. ގުރޫޕްގެ ދެވަނައަށް އައިވަރީ ކޯސްޓް ދިޔައީ ގުރޫޕްގެ ފަހު މެޗުގައި ޖަރުމަނާ ވާދަކޮށް 1-1 ލަނޑުން އެއްވަރުވުމުންނެވެ. މި ނަތީޖާއެކު ޖަރުމަނަށް ވަނީ ގޭމްސް އަލްވަދާއު ކިޔަން ޖެހިފައެވެ.
އިއްޔެ ގޭމްސްގައި ހޮންޑިއުރަސް 6-0 ލަނޑުން ބަލިކޮށް ދެކުނު ކޮރެޔާއިން ވަނީ ގުރޫޕްގެ އެއްވަނަ ގޮތުގައި ކުއާޓާ ފައިނަލުން ޖާގަ ހޯދާފައެވެ. ނިއުޒިލޭންޑާ ރުމޭނިޔާ ވާދަކުރި މެޗު ލަނޑެއް ނުޖެހި އެއްވަރުވުމުން ރުމޭނިޔާ ވަނީ ދެވަނަ ޓީމުގެ ގޮތުގައި ކުއާޓާ ފައިނަލުން ޖާގަ ހޯދާފައެވެ. ޖަޕާން ވަނީ އިއްޔެ ކުޅުނު މެޗުގައި މިފަހަރު ގޭމްސްގައި ކުޅުނު ތިން މެޗު ވެސް ކާމިޔާބުކޮށްފައެވެ. މިއީ މިފަހަރު ފިރިހެނުންގެ ފުޓްބޯޅަ އިވެންޓުގައި ތިން މެޗު ކާމިޔާބުކުރި ހަމައެކަނި ގައުމެވެ. ޔޮކަހާމާގައި ކުޅުނު މެޗު ޖަޕާނުން ކާމިޔާބުކުރީ 3-0 ލަނޑުންނެވެ. ޖަޕާނުން ގޭމްސްގެ ގަދައަށެއްގައި ވާދަކުރާނީ ނިއުޒިލޭންޑާ ދެކޮޅަށެވެ.
ގޭމްސްގައި މިސްރުން ވަނީ އޮސްޓްރޭލިޔާ އަތުން 2-0 ލަނޑުން މޮޅުވެފައެވެ. ކުއާޓާ ފައިނަލުގައި މިސްރު ވާދަކުރާނީ އެންމެ
ފަހުގެ ރަންމެޑަލް ހޯދި ބްރެޒިލްއާއެވެ. އިއްޔެ ސްޕެއިން އާއި އާޖެންޓީނާ ކުޅުނު މެޗު އެއްވަރުވެ އާޖެންޓީނާ ވަނީ ގޭމްސް އިން ވަކިވާން ޖެހިފައެވެ. ސްޕެއިން އާއި އާޖެންޓީނާ ކުޅުނު މެޗު ނިމުނީ 1-1 ލަނޑުން އެއްވަރުވެގެންނެވެ. ސްޕެއިންއިން ގުރޫޕްގެ އެއްވަނައިގައި ނިންމާލީ ކުޅުނު ތިންމެޗުން ފަސްޕޮއިންޓް ހޯދައިގެން. ސްޕެއިން ކުއާޓަފައިނަލުގައި ވާދަކުރާނީ އައިވަރީކޯސްޓާ ދެކޮޅަށެވެ.
ކޮމެންޓު ފޮނުވާ