ނަފުރަތާއި ދެކޮޅަށް ފިޔަވަޅު އެޅުމަށް އދ. އިން ގޮވާލާ ހާއްސަ އެއްވުމެއް ބޭއްވުމަށް ދާދިހަފުން އދ.ގެ އާންމު މަޖިލީހުގެ ރިޔާސަތަށް އިންތިޚާބުކުރެވުނު ރާއްޖޭގެ ފޮރިން މިނިސްޓަރ ޢަބްދުﷲ ޝާހިދަށް ހަވާލުކޮށްފި އެވެ.
ނަފުރަތާއި ދެކޮޅަށް ދުނިޔޭގެ ފެންވަރުގައި ފިޔަވަޅު އެޅުމަށް ގޮވާލައި އދ. އިން އިންތިޒާމު ކުރާ މިއެއްވުން އަންނަ ހަރު ބޭއްވުމަށް މިނިސްޓަރ ޝާހިދާ ވަނީ ހަވާލުކޮށްފައެވެ. މިކަން ހާމަކުރެއްވީ ރާއްޖޭގެ ކުރީގެ ފޮރިން މިނިސްޓަރ އަދި މިހާރުގެ އދ.ގެ ސްޕެޝަލް ރެޕަޓުއަރ ޑރ. އަޙްމަދު ޝަހީދެވެ.
ޝަހީދު ވިދާޅުވީ، ނަފުރަތުގެ ބިލް ފާސްވިޔަ ނުދިނުމަށް ރާއްޖޭަގައި އުޅެނިކޮށް، ނަފުރަތާއި ދެކޮޅަށް ދުނިޔޭގެ ފެންވަރުގައި ފިޔަވަޅު އެޅުމަށް ގޮވާލައި އެކަމާ ބެހޭ ހާއްސަ އެއްވުމެއް އަންނަ އަހަރު ބޭއްވުމުގެ ކަންކަން އދ. އިން ޢަބްދުﷲ ޝާހިދަށް ހަވާލުކޮށްފައި ވާކަމަށެވެ.
ޑރ ޝަހީދު ކުރެއްވި ޓްވީޓެއްގައި މިހެން ވިދާޅުވެފައި ވީނަމަވެސް ރަސްމީކޮށް އެއްވެސް ފަރާތަކުން އަދި މިކަން ހާމަކޮށްފައެއް ނުވެއެވެ.
Nafrathuge bill faas viya nudhinumah Raajjeyga ulheni koh, nafrathaa dhekolhah dhuniyeyge fenvaruga fiyavalhu elhumah UN in govaalaa ekamaa behey khaassaa evvumeh anna aharu beyvve vumah @abdulla_shahid aai UN in havaalu koffi! @MohamedNasheed @evattey @Imthiyazfahmy
— Ahmed Shaheed (@ahmedshaheed) July 28, 2021
ނަފްރަތުގެ ޢަމަލުތައް ހުއްޓުވުމުގެ ނަމުގައި ޤާނޫނުލް އުޤޫބާތުގެ 123 ވަނަ މާއްދާގެ ފަހަތަށް މާއްދާއެއް އިތުރުކުރަން ސަރުކާރުގެ ފަރާތުން މަޖިލީހަށް ހުށަހަޅާފައިވާ ބިލުގެ މައްސަލަ ހޫނުވެ އެމްޑީޕީނޫން، ސަރުކާރު ކޯލިޝަންގައި ހިމެނޭ ހުރިހާ ޕާޓީތަކުން ވަނީ ބިލާއި ދެކޮޅަށް ތެދުވެފަ އެވެ.
މި ބިލް މަޖިލީހަށް ހުށަހަޅާފައި ވަނީ ދީން ހަތިޔާރަކަށް ބޭނުންކޮށްގެން، މުސްލިމުންގެ ބޮލުގައި ދީނާއި ގުޅުވައި ތަފާތު ލޭބަލްތައް އަޅުވައި، މުޖުތަމައުގައި ވަކިވަކި ފަރުދުންނާއިމެދު ނަފްރަތު އުފައްދައި، އާޚިރު ނަތީޖާއެއްގެ ގޮތުން، އެމީހުންގެ ލޭ ހުއްދަކަމަށް ބަޔަކަށް ޤަބޫލުކުރެވި، އެމީހުން މަރައި އަދި، ގެއްލުވާލުމުގެ ހާދިސާތަކެއް ދިވެހިރާއްޖޭގައި ހިނގާފައިވާތީ، ނަފްރަތުގެ އަމަލުތަކަކީ ޖިނާއީ ކުށެއްގެ ގޮތުގައި ކަނޑައެޅުމުގެ ބޭނުމުގައި ކަމަށް އެމްޑީޕީން ވަނީ ބުނެފައެވެ.
އެ ޕާޓީން އެދެނީ ވީހާވެސް އަވަހަކަށް މި ބިލު ރައްޔިތުންގެ މަޖިލީހުން ފާސްކޮށް، ދީނާއި ގުޅުވައިގެން، މުޖުތަމައުގައި ވަކިވަކި ފަރުދުންނާމެދު ނަފްރަތު އުފެއްދުމުގެ އަމަލުތަކަށް ނިމުމެއް އައުން ކަމަށްވެސް އެމްޑީޕީން ވަނީ ބުނެފައެވެ. އަދި މަޖިލީހުން މިބިލް އޮތް ގޮތަށް ފާސްކުރުމަށް މަޖިލިސް ރައީސް މުހައްމަދު ނަޝީދު ގެންދަވަނީ ވަރަށް ބޮޑަށް ވަކާލާތު ކުރައްވަމުންނެވެ. ހަމައެހެންމެ މި ބިލިގެ މައްސަލާގައި އެމްޑީޕީގެ ތެރޭގައި ވެސް ބައިބައި ވުން ވަނީ އުފެދިފަ އެވެ. އެގޮތުން ރައީސް ނަޝީދާއި، ނަޝީދަށް ތާޢީދުކުރާ ފަރާތްތަކުން ގެންދަނީ ރައީސް އިބްރާހިމް މުޙައްމަދު ޞާލިޙް މިބިލު ފާސްކުރިއަ ނުދޭން މަސައްކަތް ކުރައްވާކަމަށް ތުހުމަތު ކޮށްފަ އެވެ.
2021 ސެޕްޓެމްބަރު 14 ގައި ފެށޭ ޢާއްމު މަޖިލީހުގެ 76 ވަނަ ދައުރުގައި އޭޝިއާ ޕެސިފިކް ސަރަހައްދުގެ ފަރާތުން ރިޔާސަތު ބަލަހައްޓަން މިނިސްޓަރ ޢަބްދުﷲ ޝާހިދު ހޮވިވަޑައިގެންނެވީ އަފްގާނިސްތާން ކުރީގެ ފޮރިންގ މިނިސްޓަރ ޑރ. ޒަލްމާއި ރަސޫލުއާ ވާދަކޮށްގެންނެވެ. މި މަގާމަށް ޝާހިދުގެ ނަން ނޮމިނޭޓްކުރެއްވީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙެވެ.
