ބަނގުރާ ބުއިމަކީ ﷲ ހަރާމްކުރައްވާފައިވާ ހުތުރުކަންބޮޑު ފާފައަކަށް ވީހިނދު ވަކި މީހަކު ނުވަތަ ބަޔަކު އެކަން ކުރުމުން " ބަނގުރާފޮދު ހިއްޕެވި" ކަމަށް ބުނުމަކީ ހުތުރުކަން ބޮޑު ބުނުމެއްކަމަށް ދީނީ ކަންކަމަށް މީހުން ހޭލުންތެރިކުރުމަށް މަސައްކަތްކުރައްވާ ޢަލީ ރަމީޒް ވިދާޅުވެއްޖެ އެވެ.
ކުރީގެ ރައީސް އަދި ރައްޔިތުންގެ މަޖިލީހުގެ ރައީސް އަމިއްލަފުޅަށް ބަނގުރާބުއިން ހުއްޓަވާލައްވާފައި ވާކަމަށް ބުނެފައި އޮތް ޑޮކްޓަރުގެ ލިއުމެއް އެމަނިކުފާނު އެމްޑީޕީ ގައުމީ މަޖިލީހުގެ ވަޓްސްއެޕް ގްރޫޕްގައި ހިއްސާ ކުރެއްވުމަށްފަހު ޑިލީޓް ކުރައްވާފައި ވާއިރު އެލިއުމުގެ ކޮޕީއެއް މިހާރު ސޯޝަލް މީޑިއާގައި ދައުރުވަމުން އެބަދެއެވެ.
މިކަމާގުޅޭ ބައެއް ޚަބަރުތަށް ގެނެސްދިނުމުގައި ނަޝީދު "ރާފޮދު ހިއްޕެވުން" ހުއްޓަވާލެއްވި ކަމަށް ބައެއް މީޑިއާތަކުން ޚަބަރު ގެނެސްދީފައި ވާތީ އެކަމަށް ފާޑުވިދާޅުވެ ޢަލީ ރަމީޒް ވިދާޅުވީ، ވަކި މީހަކު ނުވަތަ ބަޔަކު ބަނގުރާ ބުއިމުން އެ ރަލާއި، ބަނގުރާ ބުއިންވެސް މާތްވުމަކީ ހުތުރުކަން ބޮޑު ބުނުމެއް ކަމަށެވެ.
Banguraa buimakee Allah haram kuravvaafaivaa huthurukan bodu faafa akah vee hindhu, vaki meehaku nuvatha vaki bayaku ekan kurumun, banguralaai e raa buin ves maaiyve, ‘banguraa fodhu hippevi’ kamah bunumakee haadhahaavaa huthurukan bodu bunumekeve.
— Ali Rameez ???? (@aliramyz) July 27, 2021
ނަޝީދު ހިއްސާކުރެއްވި ޑޮކްޓަރުގެ ލިޔުމަކީ ޕޯސްޓް ޓްރޮމެޓިކް ސްޓްރެސް ޑިސްއޯޑާ ނުވަތަ ޕީޓީއެސްޑީ ހުރިތޯ ބެލުމަށް ހެދި އިވެލުއޭޝަނަށްފަހު ޑޮކްޓަރުން ތައްޔާރުކޮށްފައިވާ ލިޔުމެކެވެ. އެލިޔުމުގައި ބުނެފައި ވަނީ ނަޝީދުގެ ކިބައިން އެފަދަ އެއްވެސް ނަފްސާނީ މައްސަލައެއް ފާހަގަ ނުކުރެވޭ ކަމަށެވެ.
ޑިޕްރެޝަނާއި، އެންޒައިޓީ އަދި ކުރީގެ ހަނދާންތައް ކުއްލިއަކަށް އައުމާއި ބިރުވެރި ހުވަފެން ފެނުން ފަދަ ނަފްސާނީ އެއްވެސް މައްސަލައެއް ވެސް ނަޝީދުގެ ކިބައިގައި ނެތް ކަމަށް ޑޮކްޓަރުގެ ލިޔުމުގައި ބުނެފައި ވެއެވެ.
އަދި އެމަނިކުފާނު އަމިއްލަފުޅަށް ބަނގުރާ ބުއިން ހުއްޓާލާފައި ވާތީ މިހާރު އަވަހާރަފުޅު ލެއްޕެވުމުގައި ވެސް މައްސަލައެއް ނެތްކަން މި ލިއުމުގައި ފާހަގަ ކޮށްފައި ވެއެވެ.
މި ލިއުން އާންމުވެފައި ވާއިރު ނަޝީދަކީ ބަނގުރާބޯ ބޭފުޅެއް ކަމަށް މީގެ ކުރިންވެސް ގިނަބަޔަކު އައީ ތުހުމަތު ކުރަމުންނެވެ. އެގޮތުން ނަޝީދުގެ ވެރިކަމުގައި ރާއްޖެ އިން ބޭރަށް ކުރެއްވި ދަތުރުފުޅެއްގައި ބަނގުރާ ބުއި ކަމަށް އިންޑިއާގެ ނޫހެއްގައި ރިޕޯޓް ކުރުމުން އޭރުގެ އިދިކޮޅު ފަރާތްތަކުގެ ފާޑުކިޔުން ނަޝީދަށް ވަރަށް ބޮޑަށް އަމާޒުވިއެވެ.
