ކުރީގެ ޑިފެންސް މިނިސްޓަރ އަދި ދަނގެތީ ދާއިރާގެ މެމްބަރު މުޙައްމަދު ނާޒިމް، 2018 ވަނަ އަހަރުގެ ރިޔާސީ އިންތިހާބުގައި އެމްޑީޕީގެ ރައީސް މުހައްމަދު ނަޝީދު އެދިވަޑައިގެން ކަމަށް ނަޝީދު މިއަދު ވިދާޅުވެއްޖެއެވެ.
ރައީސްގެ ނަޝީދު މިފަދައިން ވިދާޅުވީ އެމްޑީޕީގެ ގައުމީ މަޖިލީހުގެ ވަޓްސް އެޕް ގްރޫޕަށް މިއަދު ފޮނުއްވި ޓެކްސްޓް މެސެޖެއްގަ އެވެ.
އެމްޑީޕީގެ ފުރަތަމަ ސަރުކާރު އަދި ރައީސް ނަޝީދުގެ ވެރިކަން ނިމުމަކަށް ގެނައުމުގައި އިސްކޮށް ހަރަކާތްތެރިވީ ކަމަށް އެޕާޓިގެ ގިނަބަޔަކު ގަބޫލުކުރާ ކާނަލް ނާޒިމާ ގުޅޭގޮތުން ނަޝީދު ވާހަކަ ދައްކަވާފައި މިވަނީ، މޯލްޑިވްސް ނެޝަނަލް ޕާޓީ (އެމްއެންޕީ)ގެ ނަމުގައި ނާޒިމް އިސްކޮށް ހުންނަވައިގެން ސިޔާސީ ޕާޓީއެއް ހައްދަވަން މަސައްކަތް ފައްޓަވައި އަދި ޕާޓީގެ ޓިކެޓުގައި 2023 ވަނަ އަހަރުގެ ރިޔާސީ އިންތިޚާބުގައި ވާދަކުރައްވަންވެސް ޝައުގުވެރިކަން ފާޅުކޮށްފައި ވަނިކޮށެވެ.
އެމްޑީޕީގެ ގައުމީ މަޖިލީހުގެ ވަޓްސްއަޕް ގްރޫޕްއަށް ފޮނުއްވި މެސެޖެއްގައި ނަޝީދު ވިދާޅުވީ، 2012 ވަނަ އަހަރަށް ފަހު ނާޒިމާ ބައްދަލުވެވަޑައިގެންނެވީ ގާމާދޫ ޖަލުން ކަމަށެވެ. ރައީސް ނަޝީދު ވިދާޅުވީ ގާމާދޫ ޖަލުން މާފުށި ޖަލަށް ގެންދިޔަ މަގުމަތީގައި 10 ދުވަހު އެތަނުގައި ބޭއްވި ކަމަށެވެ. އަދި އޭރުއްސުރެ ނާޒިމާ ވާހަކަ ދައްކަވަމުން ގެންދަވާ ކަމުގައި ވިދާޅުވެފައިވެ އެވެ.
"2018 ގައި ނާޒިމް، ރައީސް ޔާމީނާ އިދިކޮޅަށް، އެމްޑީޕީއާ އެއްކޮޅަށް އެރީ ރައީސް ޔާމީން ބަލިކުރަން. އަދި އަޅުގަނޑު ވެސް ވަރަށް އެދިގެން،"
– ނަޝީދު
މީގެ އިތުރުން ނާޒިމް އުފައްދަވަން މަސައްކަތް ކުރައްވާ ޕާޓީއަށް މެންބަރުން ހަމަވާނެ ކަމަށް ލަފާ ކުރެވޭ ކަމަށްވެސް ނަޝީދު ވަނީ ވިދާޅުވެފަ އެވެ.
ނާޒިމާ ގުޅޭގޮތުން ނަޝީދު މި ވާހަކަފުޅު ދެއްކެވި ސީދާ ސަބަބެއް ނޭނގުނު ނަމަވެސް ނާޒިމާއި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި ގާތް ގުޅުމެއް ބާއްވަމުން ގެންދަވާ ކަމަށާއި ނާޒިމް ޕާޓީއުފައްދަވަނީ ވެސް ރައީސްގެ ތާޢީދާ އެކު ކަމަސް އިދިކޮޅުން މީގެކުރިން ވަނީ ތުހުމަތުކޮށްފަ އެވެ. އަނަމަވެސް އެމްއެންޕީ ތަޢާރަފްކުރުމަށް އިއްޔެ ބޭއްވި ނޫސްވެރިންގެ ބައްދަލުވުމުގައި ނާޒިމް ވަނީ އެކަން ދޮގުކުރައްވާފަ އެވެ.
މީގެއިތުރުން ނާޒިމް ވިދާޅުވީ އެމްއެންޕީއަކީ ސީދާ ރިޔާސީ އިންތިޚާބު ކާމިޔާބު ކުރުމުގެ މަޤްސަދުގައި އުފައްދަވާ ޕާޓީއެއް ކަމަށާއި، މިހާރު ރާއްޖޭގައި ހުރި ގިނަ ސިޔާސީ ޕާޓީތައްހެން އެންމެ މީހެއްގެ ފަހަތުގައި ވަށާއެނބުރޭ ޕާޓީއަކަށް އެޕާޓީ ނުވާނެ ކަމަށެވެ.
2012 ވަނަ އަހަރު ރައިސް ނަޝީދުގެ ވެރިކަން ވައްޓާލުމުގައި އެމްއެންޕީ އުފެއްދުމުގައި އިސްކޮށް ހަރަކާތްތެރިވާ ނާޒިމާއި ތިމަރަފުށި ދާއިރާގެ މެންބަރު އަބްދުﷲ ރިޔާޒު އިސްކޮށް ހަރަކާތްތެރި ވީކަމަށް އެމްޑީޕީގެ ގިނަ މެމްބަރުން ގަބޫލުކުރެއެވެ. އޭރުގެ އިދިކޮޅު ފަރާތްތަކުން ކުރަމުން ދިޔަ މުޒަހާރާގައި ސިފައިންނާއި ފުލުހުންގެ ބަޔަކު ބައިވެރިވެ ހިނގައިދިޔަ ހަމަނުޖެހުންތަކަށް ފަހު ރައީސް ނަޝީދު އަމިއްލަފުޅަށް އިސްތިއުފާދެއްވި އެވެ. ނަމަވެސް ނަޝީދުވެސް ފަހުން ވިދާޅުވީ އެއީ "ބަޣާވާތެއް" ކަމަށެވެ. އެހެންކަމުން ނާޒިމާއި ރިޔާޒަކީ ބާޣީންގެ ގޮތުގައި ނަޝީދުގެ ސަޕޯޓަރުން އަބަދުވެސް ދެމުން ގެންދިޔައެވެ.
