ފްރާންސް މޮޅުވެ، ބްރެޒިލް ލަނޑެއް ނުޖެހި އެއްވަރުވެއްޖެ

މިހާރު ޖަޕާނުގެ ޓޯކިޔޯގައި ކުރިޔަށްދާ އޮލިންޕިކްސް ކުޅިވަރު މުބާރާތުގައި ފިރިހެނުންގެ ފުޓްބޯޅަ އިވެންޓުގައި ފްރާންސް މޮޅުވެއްޖެއެވެ.

މިފަހަރު އޮލިންޕްކްސް ގޭމްސްގައި ހޯދި ފުރަތަމަ މޮޅު ފްރާންސް އިން ހޯދީ ސައުތުއެފްރިކާ ވާދަކޮށް 4-3 ލަނޑުން މެޗު ކާމިޔާބުކޮށްފައެވެ. މިމެޗުގައި ފްރާންސް މޮޅުވީ ތިންފަހަރަށް ފަހަތުން އަރައި ލީޑް ހޯދިފަހުންނެވެ. މެޗުގައި ދެވަނަހާފްގައި ފްރާންސްގެ އަންދްރޭ ޕްއެރީ ގިގްނެކް ވަނީ ތިން ލަނޑު ޖަހާ ހެޓްރިކް ހަދާފައެވެ.

މެޗުގެ 85 ވަނަ މިނިޓުގައި ގިގްނެކްގެ ލަނޑުނން ތިންވަނަފަހަރަށް ފްރާންސްއިން މެޗުގެ ނަތީޖާ ހަމަހަމަ ކުރިއެވެ. ފްރާންސް މޮޅުވީ މެޗުގެ އިތުރުވަގުތުގައި ޓެޖީ ސަވައިނިއާ ކާމިޔާބުކުރި ލަނޑުންނެވެ. ރޭގެ ޖެހި ތިން ލަނޑާއެކު މިފަހަރުގެ ގޭމްސްގައި ދެމެޗުން ހަތަރު ލަނޑުޖަހައިގެން ގިގްނެކް ލަނޑު ލިސްޓުގެ ކުރީގައިއެވެ. ގޭމްސް ބާއްވާ ޖަޕާނުން ވަނީ މިހާތަނަށް ކުޅުނު ދެމެޗު ވެސް ކާމިޔާބުކޮއްފައެވެ.

އިއްޔެ ޖަޕާނު މޮޅެއް ހޯދީ މެކްސިކޯއާ ވާދަކޮށް 2-1 ލަނޑުންނެވެ. އިއްޔެ ގުރޫޕް ޑީގައި ބްރެޒިލް އާއި އައިވަރީ ކޯސްޓް ވާދަކުރި މެޗު ނިމުނީ ލަނޑެއް ނުޖެހި އެއްވަރުވެގެންނެވެ. މެޗުގެ 13 ވަނަ މިނިޓުގައި އިނގިރޭސި ކުލަބު އޯސްޓަން ވިލާ ކުޅެމުން އަންނަ ބްރެޒިލްގެ ޑަގްލަސް ލުއިސް ވަނީ ރަތްކާޑުދައްކައި ދަނޑުން ފޮނުވާލާފައެވެ. މިއީ ލީޑްސް ޔުނައޓެޑުގެ ކުރީގެ ކުޅެންތެރިޔާ މެކްސް ގްރެޑެލްއަށް ކކުރި ފައުލްއަކާ ގުޅިގެން ދެއްކި ރަތްކާޑެކެވެ. އައިވަރީ ކޯސްޓް ވަނީ  މިފަހަރުގެ ގޭމްސްގައި ކުޅުނު ފުރަތަމަ މެޗުގައި ސައުދީ އަރަބިއްޔާ އަތުން މޮޅުވެފައެވެ.

އިއްޔެ ކުޅުނު ބައެއް މެޗުތަކަށް ބަލާއިރު ބާންލީއަށް ކުޅެމުން އަން ކްރިސް ވޫޑްގެ ލަނޑުތަކުން ނިއުޒިލޭންޑް ވަނީ 3-2 ހޮންޑިއުރަސް އަތުން ބަލިވެފައެވެ. ދެކުނު ކޮރެއާ ވަނީ 4-0 ލަނޑުން ރުމޭނިޔާ އަތުން މޮޅުވެފައެވެ.