ރާއްޖޭގައި ހަރުކަށި ހައްދު ފަހަނައަޅާފައިވާ މީހުން ނެތްކަމަށްބުނެ އެކި ބަހަނާ ދައްކައިގެން ސަރުކާރަށް ނޯވެވޭނެ ކަމުގައި އެމްޑީޕީގެ ޗެއާޕާސަން އަދި  ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ވިދާޅުވެއްޖެއެވެ.

ހައްދުފަހަނާއެޅި ފިކުރުން ރާއްޖޭގެ ސަލާމަތަށް ނުރައްކާ ބޮޑުވެފައި ވިޔަސް ސަރުކާރުގެ ތެރޭގައި 'އަޑީ ދައުލަތެއް' އޮތް ކަމަށް ރަސްމީ އިދާރާތައް ހިމެނޭ ގޮތުން ކޮށްފައިވާ ތުހުމަތުތައް ހޯމް މިނިސްޓަރު އިމްރާން އަބްދުالله ވަނީ ދޮގުކުރައްވާފައެވެ. އިމްރާން ވިދާޅުވީ ފުލުހުންގެ ފަރާތުން މިހާތަނަށް އޭނާއަށް ލިބިވަޑައިގެންފައިވާ އަދި ރާއްޖޭގެ ސަލާމަތީ ކަންކަން އެސެސްކުރަން ހެދި އެއްވެސް ރިޕޯޓެއްގައި ރާއްޖޭގައި އަޑީދައުލަތެއް އޮތް ކަމަކަށް ބުނެފައި ނުވާ ކަމަށެވެ.

އިމްރާންގެ ވާހަތަކަށް ރައްދު ދެއްވައި ހަސަން ވަނީ ނެޝަނަލް ކައުންޓަ ޓެރަރިޒަމް ސެންޓަރުގެ އިސްވެރިޔާ ޒަކަރިއްޔާ މަންސޫރު ރާއްޖޭގައި ހަރުކަށި ފިކުރު އޮތް މިންވަރާއި ގުޅޭގޮތުން މަޖިލީހުން އެކުލަވާލި އިންކުއަރީގައި ހުރި ބައެއް މައުލޫމާތު ހިއްސާކޮށް، އެކަންކަން ރަނގަޅު ކުރުމަށް އިމްރާނަށް ގޮވާލާފައެވެ. އަދި މިކަމުގައި އިތުރު ބަހަނާ ދައްކައި، އަޑިދައުލަތެއް ނެތްކަމެއް ބުނެ ވާހަކަ ދެއްކުމަކީ ވަރަށް ޒިންމާދާރުކަން ކުޑަކަމެއްކަމަށް ހަސަން ވިދާޅުވިއެވެ.

އަޑީ ދައުލަތެއް ނެތްކަމަށްބުނެ ބަހަނާ ދައްކައި، ކުރަންޖެހޭ މަސައްކަތް ނުކޮށް، ނުވާކަމަކަށް ހަދައިގެން ސަރުކާރު އޮވެގެން ނުވާނެ. އެންސީޓީސީގެ ޑީޖީ ބްރިގޭޑިއާ ޖެނެރަލް ޒަކަރިއްޔާ މަންސޫރު ސާފުކޮށް އެެއޮތީ ވިދާޅުވެފައި ރާއްޖޭގެ ހާލަތު.

– ހަސަން ވިދާޅުވިއެވެ.

Adee Dhaulatheh neiy kamah bune bahanaa dhakkai, kuranjehey masakkaiy nukoh nuvaakamakah hadhaalaigen Sarukaru ovegen nuvaane. @NCTCMaldives ge DG Brgd Gen.Zakariyya Mansoor saafukoh eothee vidhaalhuvefa Raajjeyge haalathu. @ShimranAb
Source: @mvpeoplesmajlis #InquiryReport pic.twitter.com/a32axGDUVB

— Hassan Latheef? (@HassanLatheef) July 24, 2021

މީހުންގެ ފުރާނަ ދުއްވާލަން ތައްޔާރަށް ތިބޭ ހިސާބަށް ދީނީ ގޮތުން ހަރުކަށި ވެފައި ތިބި 1400 އަށްވުރެ ގިނަ ދިވެހިން އުޅޭ ކަމަށް ކޮމިޝަނާ އޮފް ޕޮލިސް މުހައްމަދު ހަމީދުވެސް ވަނީ 2019 ވަނަ އަހަރު ވިދާޅުވެފައެވެ. ސީޕީ ހަމީދު ވިދާޅުވީ ހަރުކަށި ފިކުރުގެ ޖަމާއަތްތަކުގެ އޮޕަރޭޝަނާއި އެ މީހުންގެ އަދަދު ވެސް ކަމާ ބެހޭ މުއައްސަސާތަކަށް ސާފު ކަމަށެވެ. އެ ގޮތުން މީހުންގެ ފުރާނަ ނަގާލަން މަސައްކަތް ކުރާ ހިސާބަށް ހަރުކަށިވެފައި ތިބި ގާތްގަނޑަކަށް 1400 އެއްހާ ދިވެހިން އެބަ ތިބި ކަމަށާއި އެ ކަން ހުއްޓުވަން ކަމާ ބެހޭ މުއައްސަސާތައް ތިބީ ތައްޔާރަށް ކަމަށެވެ.

ހަރުކަށި ފިކުރާ ދެކޮޅަށް ސަރުކާރުން އެކަށިގެންވާ މަސައްކަތް ނުކުރާ ކަމުގެ ތުހުމަތު ރައީސް ނަޝީދުވެސް ވަނީ ކުރައްވާފައެވެ. ހުރިހާކަމެއް އެގިތިބި މިކަންކަމށް އެކަށިގެންވާ  ފިޔަވަޅު ނާޅާތީ ރައީސް ނަޝީދުވަނީ ސަރުކާރަށާއި، ރައީސް ޞާލިހަށް ސިޔާސީ ގޮތުން ކުރަމުން އައި ތާއީދު ގެންދަވާފައެވެ. ރައީސް ނަޝީދުގެ މިވާހަތަކާއި ގުޅިގެން އެމްޑީޕީތެރެ ވަނީ ވަރަށް ބޮޑަށް ބައިބައިވެ، ބޮޑު ޚިޔާލު ތަފާތުވމެއްގެ ތެރެއަށް ވެއްޓިފައެވެ.