ޒުވާން އެކްޓަރު ކާތިކް އާރިއަންގެ އާ ފިލްމްގެ ޕޯސްޓަރު ދައްކާލައިފި އެވެ.
މި ފިލްމަކީ ޑައިރެކްޓަރ ހަންސަލް މެހެތާގެ ފިލްމެކެވެ. ކާތިކް މި ފިލްމަށް ސޮއިކޮށްފައި ވާކަމަށް މީޑިއާތަކުން މީގެ ދުވަސްކޮޅެއް ކުރިން ވަނީ ރިޕޯޓްކޮށްފަ އެވެ. އެއާއި އެކު އެކަން ކަށަވަރުކޮށްދިނުމަށް މިވަނީ ޕޯސްޓަރު ދައްކާލައިފަ އެވެ.
"ކެޕްޓަން އިންޑިއާ"ގެ ނަން ދީފައިވާ މި ފިލްމުގައި ކާތިކް ފެނިގެންދާނީ ޕައިލެޓެއްގެ ރޯލުންނެވެ. ފިލްމް ޕްރޮޑިއުސް ކުރަނީ ކުރީގެ ފިލްމީ ތަރި ހަރްމަން ބަވޭޖާ އާއި ރޯނީ ސުކުރުވާލް އެވެ.
މި ފިލްމުގެ ވާހަކަ ބިނާކޮށްފައި ވަނީ ހަނގުރާމަ ހިނގަމުންދާ ގައުމަކުން އިންޑިއާ ބަޔަކު ސަލާމަތުން ގައުމަށް ގެނައުމަށް ހިންގާ ރެސްކިއު އޮޕަރޭޝަނަކަށެވެ. އަދި އެ މިޝަން ލީޑްކުރަން ޕައިލެޓެއްގެ ހައިސިއްޔަތުން ކާތިކް ކުރާ މަސައްކަތާއި ދައްކާ ހިތްވަރު ފިލްމުން ފެނިގެން ދާނެކަމަށް ރިޕޯޓްތައް ބުނެއެވެ.
ފިލްމުގެ ފަސްޓް ލުކް ދައްކާލި ނަމަވެސް ފިލްމުގައި ދެން ހިމެނޭ ތަރިންނާއި މަސައްކަތް ފަށާނެ ތާރީހު ފަދަ މައުލޫމާތު އަދި ހާމައެއް ނުކުރެއެވެ.
View this post on Instagram
މިހާރުވެސް ކާތިކްގެ އަތުގައި ގިނަ ޕޮރޮޖެކްޓްތަކެއް އެބަހުއްޓެވެ. އޭނާ އެންމެ އަވަހަށް ފެންނަން އޮތް ފިލްމަކީ މިދިޔަ އަހަރުގެ ޑިސެމްބަރުގައި ޝޫޓިން ނިންމާފައި އޮތް، ޑަައިރެކްޓަރު ރާމް މަދުވާނީ ނެޓްފްލިކްސް އިން ގެނެސްދޭ "ދަމާކާ" އެވެ. އޭނާގެ ކުރިއަށް ހުރި ފިލްމުތަކުގެ ތެރޭގައި "ބޫލް ބުލައްޔާ 2″ ވެސް ހިމެނެ އެވެ.
